തിരുവനന്തപുരം : മന്ത്രിസഭാ വികസനവും കേരളത്തിന്റെ സംസ്ഥാന അദ്ധ്യക്ഷനെ തീരുമാനിക്കലും മുന്നില് നില്ക്കേ നടന് സുരേഷ് ഗോപിയെ ബിജെപി നേതൃത്വം ഡല്ഹിയിലേക്ക് വിളിപ്പിച്ചതിനെ തുടര്ന്ന് അഭ്യൂഹം പെരുകുന്നു. പാര്ലമെന്റിന്റെ ശീതകാലസമ്മേളനത്തിന് മുമ്പ് കേന്ദ്രമന്ത്രിസഭ വികസനം ഉണ്ടാകുമെന്നിരിക്കെ രാജ്യസഭാംഗമായ സുരേഷ്ഗോപിക്ക് മന്ത്രിസഭയില് അവസരം ലഭിച്ചേക്കുമെന്നാണ് അഭ്യൂഹങ്ങള്.
സത്യന് അന്തിക്കാടിന്റെ മകന് സംവിധാനം ചെയ്യുന്ന കന്നി സിനിമാസംരംഭത്തിന്റെ ഭാഗമായ താരം സിനിമാ തിരക്കിനിടയിലാണ് ഡല്ഹിയില് എത്തിയത്. ബിജെപി അദ്ധ്യക്ഷനും കേന്ദ്ര ആഭ്യന്തരമന്ത്രിയുമായ അമിത്ഷായുമായി കൂടിക്കാഴ്ച നടത്തുകയും ചെയ്തിട്ടുണ്ട്. ഇതോടെയാണ് സുരേഷ്ഗോപിയ്ക്ക് പാര്ട്ടി നേതൃത്വം കേന്ദ്രത്തിലോ സംസ്ഥാനത്തേ നിര്ണ്ണായക ചുമതല നല്കിയേക്കുമെന്ന സൂചനകളും പുറത്തു വന്നിരിക്കുന്നത്.
നേരത്തേ സുരേഷ്ഗോപിയുടെ പേര് ബിജെപി സംസ്ഥാന അദ്ധ്യക്ഷ സ്ഥാനത്തേക്ക് പരിഗണിച്ചേക്കുമെന്ന വാര്ത്തകളും പുറത്തു വന്നിരുന്നു. ഉപ തെരഞ്ഞെടുപ്പിന് പിന്നാലെ പിഎസ് ശ്രീധരന്പിള്ളയെ മിസോറാം ഗവര്ണറായി നിയമിച്ച ഒഴിവില് വന്നിരിക്കുന്ന ബിജെപി സംസ്ഥാന അധ്യക്ഷന്റെ കസേരയിലേക്ക് സുരേഷ് ഗോപി വരുമെന്ന സൂചനകള് നേരത്തേ പുറത്തു വന്നിരുന്നു. ശ്രീധരന്പിള്ളയ്ക്ക് പകരക്കാരാകാനുള്ള പേരുകളില് കെ സുരേന്ദ്രന്, എംടി രമേശ്, ശോഭ സുരേന്ദ്രന് എന്നിവരുടെ പേരുകളും ഉയര്ന്നു വന്നിട്ടുണ്ട്.
സംസ്ഥാന അദ്ധ്യക്ഷപദവി സംബന്ധിച്ചതോ കേന്ദ്രമന്ത്രിപദം സംബന്ധിച്ചതോ ആയ കാര്യം സംസാരിക്കുന്നതിനാണ് സുരേഷ്ഗോപിയെ കേന്ദ്ര നേതൃത്വം ഡല്ഹിയിലേക്ക് വിളിപ്പിച്ചതെന്നാണ് വിവരം. സംസ്ഥാന അദ്ധ്യക്ഷ പദവി സംബന്ധിച്ച കാര്യത്തില് തടസ്സമുണ്ടായാല് വരാനിരിക്കുന്ന മന്ത്രിസഭാ പുന:സംഘടനയില് സുരേഷ്ഗോപിയെ കേന്ദ്രമന്ത്രിയായി കാണാമെന്നാണ് അഭ്യുഹങ്ങള് പ്രചരിക്കുന്നത്.
നരേന്ദ്രമോഡിയും അമിത്ഷായും ഉള്പ്പെടെയുള്ള കേന്ദ്രനേതൃത്വവുമായുള്ള അടുപ്പവും ലോക്സഭാ തെരഞ്ഞെടുപ്പില് തൃശൂരില് സ്ഥാനാര്ത്ഥി ആയത് വഴി ഉണ്ടായ അപ്രതീക്ഷിത ജനപ്രീതിയും താരത്തിന്റെ നേതൃത്വമൂല്യം കൂട്ടിയിട്ടുണ്ടെന്നാണ് വിലയിരുത്തലുകള്. അടുത്തിടെ ഡല്ഹിയില് മനോജ് തിവാരിയെ പാര്ട്ടി സംസ്ഥാന അധ്യക്ഷനായി ചുമതലപ്പെടുത്തിയിരുന്നു. ഇതുപോലെ അപ്രതീക്ഷിത നീക്കമാണ് കേരളത്തിലും പ്രതീക്ഷിക്കുന്നത്.
