കൊച്ചി: രാഹുല് ഗാന്ധി എം.പി, ഹൈബി ഈഡന് എം.പി എന്നിവരുടെ തെരഞ്ഞെടുപ്പ് വിജയം ഹൈക്കോടതി ശരിവച്ചു. ഇരുവരുടേയും തെരഞ്ഞെടുപ്പ് വിജയം ചോദ്യം ചെയ്തുകൊണ്ട് സരിത നായര് സമര്പ്പിച്ച ഹര്ജി ഹൈക്കോടതി തള്ളി. വയനാട്ടില് രഹുല് ഗാന്ധിയുടേയും എറണാകുളത്ത് ഹൈബി ഈഡന്റേയും തെരഞ്ഞെടുപ്പ് റദ്ദാക്കണമെന്നാവശ്യപ്പെട്ട് സരിതാ നായര് ഹൈക്കോടതിയില് ഹര്ജി നല്കിയിരുന്നു.
എറണാകുളത്തും വയനാട്ടിലും മത്സരിക്കാന് സരിതാ നായര് നേരത്തേ നാമനിര്ദേശ പത്രിക നല്കിയിരുന്നു. എന്നാല് പത്രിക തള്ളിപ്പോകുകയായിരുന്നു. ക്രിമിനല് കേസില് മൂന്നുവര്ഷത്തില് കുറയാത്ത ശിക്ഷ ലഭിച്ചുവെന്ന കാരണം ചൂണ്ടിക്കാട്ടിയാണ് സരിതാ നായരുടെ നാമനിര്ദേശ പത്രികകള് വരണാധികാരികള് നേരത്തെ തള്ളിയത്.
പത്രിക തള്ളിയ വരണാധികാരികളുടെ നടപടി നിയമപരമാണെന്നും ഇടപെടാന് കാരണം കാണുന്നില്ലെന്നും ഹര്ജികള് തള്ളിക്കൊണ്ട് ജസ്റ്റിസ് ഷാജി പി ചാലി വ്യക്തമാക്കി.
സോളാര് കേസില് സരിതാ നായര്ക്ക് പത്തനംതിട്ട കോടതി മൂന്നു വര്ഷം തടവും പത്ത് ലക്ഷം പിഴയും വിധിച്ചിരുന്നു. ശിക്ഷ ഹൈക്കോടതി സ്റ്റേ ചെയ്തെന്നും മത്സരിക്കാന് അവകാശമുണ്ടെന്നുമായിരുന്നു സരിതയുടെ വാദം. ക്രിമിനല് കേസില് മൂന്നു വര്ഷത്തില് കുറയാതെ ശിക്ഷ ലഭിച്ചവര്ക്ക് ജനപ്രാതിനിധ്യ നിയമ പ്രകാരം വിലക്കുണ്ടെന്ന് ചൂണ്ടിക്കാട്ടിയാണ് പത്രികകള് വിചാരണ കോടതി തള്ളിയത്.
