കോഴിക്കോട്: സ്കൂള് കായികമേള ട്രാക്കില് വീണ്ടും ഹാമര് ദുരന്തം. കോഴിക്കോട് റവന്യൂ ജില്ലാ സ്കൂള് കായികമേളയ്ക്കിടെയാണ് അപകടം ഉണ്ടായത്. ഹാമര് ത്രോ മത്സരത്തിനിടെ ഹാമറിന്റെ സ്ട്രിങ് പൊട്ടിവീണ് വിദ്യാര്ത്ഥിയുടെ രണ്ട് വിരലുകള്ക്കാണ് പരിക്കേറ്റത്. വിദ്യാര്ത്ഥിയെ കോഴിക്കോട് മെഡിക്കല് കോളേജ് ആശുപത്രിയില് പ്രവേശിപ്പിച്ചു.
പ്ലസ്ടൂ വിദ്യാര്ത്ഥി ടി.ടി. മുഹമ്മദ് നിഷാദിന്റെ ഇടതുകയ്യിലെ വിരലുകള്ക്കാണ് പരിക്കേറ്റിരിക്കുന്നത്. അതേസമയം അഞ്ച് കിലോയ്ക്ക് പകരം കുട്ടി എറിഞ്ഞത് ഏഴ് കിലോയുടെ ഹാമറാണെന്ന ആരോപണവും ഉയരുന്നുണ്ട്.
കഴിഞ്ഞ മാസം പാലായില് നടന്ന സംസ്ഥാന ജൂനിയര് അത്ലറ്റിക് മീറ്റിനിടെ ഹാമര് തലയില് പതിച്ച് വോളന്റീയറായിരുന്ന വിദ്യാര്ത്ഥി മരണമടഞ്ഞിരുന്നു. പാലാ സെന്റ് തോമസ് ഹയര് സെക്കന്ഡറി സ്കൂളിലെ പ്ലസ് വണ് വിദ്യാര്ത്ഥിയായ അഫീല് ജോണ്സനാണ് ഗുരുതരമായി പരിക്കേറ്റ് ചികിത്സയിലിരിക്കെ മരിച്ചത്. കോട്ടയം മെഡിക്കല് കോളേജ് ആശുപത്രിയില് 17 ദിവസം തീവ്ര പരിചരണ വിഭാഗത്തില് കഴിഞ്ഞതിനു ശേഷം കഴിഞ്ഞ നവംബര് 21 നാണ് അഫീല് മരിച്ചത്.
