കോഴിക്കോട്: മാവോയിസ്റ്റുകള്ക്ക് ഇസ്ലാമിക തീവ്രവാദികളുമായി ബന്ധമുണ്ടെന്ന സിപിഎം കോഴിക്കോട് ജില്ലാ സെക്രട്ടറിയുടെ പ്രസ്താവന ഉണ്ടാക്കിയ വിവാദം ചില്ലറയല്ല. ഇസ്ലാമിക തീവ്രവാദികളെയാണ് താന് ഉദ്ദേശിച്ചതെന്നും മുസ്ലീം സമുദായത്തെ മുഴുവനുമല്ല എന്ന് പിറ്റേന്ന് വ്യക്തത വരുത്തിയിട്ടും വിവാദം അവസാനിച്ചിട്ടില്ല. എന്നാല് സിപിഎം നേതാക്കള് ഇത്തരം ഒരു ആരോപണം ഉന്നയിക്കാന് കാരണമായി പറയുന്നത് മാവോയിസ്റ്റ് നേതാവ് ഗണപതി ഇസ്ലാമിക തീവ്രവാദികള്ക്ക് പിന്തുണ നല്കുന്ന രീതിയില് ഒരു മാധ്യമത്തിന് കൊടുത്ത അഭിമുഖമാണ്.
സിപിഐ മാവോയിസ്റ്റ് നേതാവ് ഗണപതി ബി.ബി.സി.ക്കു നല്കിയ അഭിമുഖത്തിന്റെ അടിസ്ഥാനത്തിലാണ് സിപിഎം ജില്ലാ സെക്രട്ടറി പി മോഹനന്റെ ആരോപണമെന്നും എന്നാല് അഭിമുഖത്തെ തെറ്റായി വായിച്ചതില് നിന്നാകാം ഇത്തരം ഒരു പ്രതികരണം മോഹനന് നടത്തിയതെന്നുള്ള റിപ്പോര്ട്ടുകളാണ് ഇപ്പോള് പുറത്തുവന്നിരിക്കുന്നത്. അഭിമുഖത്തില് സാമ്രാജ്യത്വത്തിനെതിരേയുള്ള വിപ്ലവം നടത്താന് ഇസ്ലാമിക വാദികളെ സ്വാഗതം ചെയ്യുന്ന ഗണപതി മതമൗലീക വാദത്തിന് വേണ്ടി നടത്തുന്ന വിപ്ലവത്തെ കൃത്യമായി എതിര്ക്കുന്നുണ്ട്.
സിപിഎം ജില്ലാക്കമ്മറ്റിയംഗം കെ ടി കഞ്ഞിക്കണ്ണനിലൂടെ ആദ്യം പുറത്തുവന്ന ആരോപണം മറ്റു പാര്ട്ടി നേതാക്കള് കൂടി ഏറ്റെടുത്തതോടെ വിവാദം മറ്റൊരു തലത്തിലേക്ക് മാറി. 'മാവോയിസം' എന്ന തന്റെ പുസ്തകത്തിലാണ് കുഞ്ഞിക്കണ്ണന്, ഗണപതി ബിബിസിയ്ക്ക് നല്കിയ അഭിമുഖം ഉദ്ധരിച്ചിരിക്കുന്നത്. 2007 ലെ പാര്ട്ടി യൂണിറ്റി കോണ്ഗ്രസില് പുറത്തുവിട്ട അഭിമുഖത്തിലാണ് ഇസ്ലാമിക വിപ്ലവത്തെ ന്യായീകരിക്കുന്നത്.
ഇന്ത്യയില് പോരാടുന്നവര് ലക്ഷ്യം പൂര്ത്തീകരിക്കുന്നതിന് ഇസ്ലാമിക് വിപ്ലവത്തില് വലിയ പ്രതീക്ഷ വെയ്ക്കുന്നുണ്ടെന്ന് ഇതില് പറയുന്നു. സാമ്രാജ്യത്വത്തിന് എതിരേയുള്ള പോരാട്ടത്തില് മുസ്ലീങ്ങള് മതമൗലീക വാദത്തില് നിന്നും മോചിതരാകണമെന്ന് അഭിമുഖത്തില് ഗണപതി പറയുന്നുണ്ട്. ആഗോളവത്ക്കരണത്തിനെതിരേ ലോകത്തുടനീളമുള്ള ജനതയുടെ ഉയിര്പ്പ് വലുതാണെങ്കിലും സാമ്രാജ്യത്വത്തിനെതിരേയുള്ള ജനങ്ങളുടെ നീക്കത്തില് ഇസ്ലാമിക കുതിപ്പ് പ്രധാന പങ്കുവഹിക്കുന്നു. ലോകത്തുടനീളമുള്ള ഇസ്ലാമികള് അവരുടെ ഇടുങ്ങിയ മതാശയങ്ങളില് നിന്നും മൂല്യങ്ങളില് നിന്നും പുറത്തു വരുമ്പോള് മാത്രമേ സാമ്രാജ്യത്വം തുലയ്ക്കപ്പെടു എന്നും ഗണപതി പറയുന്നുണ്ട്.
ജനമുന്നേറ്റം ബന്ധപ്പെട്ടിരിക്കുന്ന സാമ്രാജ്യത്വ വിരുദ്ധതയും ജനാധിപത്യ ബോധ്യവും മുസ്ലീങ്ങളെ മതേതര പുരോഗമന വിപ്ളവ ശക്തികളുമായി അടുപ്പിക്കും. ഇസ്ലാമിക മുന്നേറ്റം ജനാധിപത്യബോദ്ധ്യത്തിന്റെ തുടക്കമായി ഞാന് കാണുന്നു. മുസ്ലീങ്ങളില് മതമൗലീക ആശങ്ങള്ക്ക് മേല് വരേണ്ടത് ജനാധിപത്യബോധമാണ്. മറ്റൊരു അഭിമുഖത്തില് ഇസ്ലാമിക തീവ്രവാദികളോടുള്ള മാവോയിസ്റ്റ് നിലപാടുകള് ഗണപതി കൂടുതല് വ്യക്തമാക്കുന്നുണ്ട്.
ജിഹാദി നീക്കങ്ങള്ക്ക് രണ്ടു ഘടകങ്ങളുണ്ട്. ഒന്ന് അതിന്റെ സാമ്രാജ്യത്വ വിരുദ്ധ നിലപാടാണ്. മറ്റൊന്ന് സാമൂഹ്യ സാംസ്ക്കാരിക വിഷയങ്ങളോടുള്ള പ്രതികരണ നിലപാടും. ഇതില് സാമ്രാജ്യത്വ വിരുദ്ധതയ്ക്ക് മുന്നില് പോരാടുന്നു മുസ്ലീം രാജ്യങ്ങളെയും ജനതയെയും തങ്ങളുടെ പാര്ട്ടി പിന്തുണയ്ക്കുന്നു. എന്നാല് മതമൗലീക വാദത്തില് അധിഷ്ഠിതമായ സാമൂഹ്യ കാഴ്ചപ്പാടിലുള്ള പ്രതികരണങ്ങളെ എതിര്ക്കുകയും ചെയ്യുന്നു.
മുസ്ലീങ്ങളിലെ മതമൗലീകവാദത്തിന്റെ മുകളിലേക്ക് കമ്യുണിസ്റ്റ് വിപ്ളവ ജനാധിപത്യ/മതനിരപേക്ഷ ആശയങ്ങളുടെ വളര്ച്ച ഇസഌമിക ആശയങ്ങളുടെ സ്വാധീനവും അത്തരം നേതൃത്വവും ഇല്ലാതാക്കും. ശരിയായ ആശയങ്ങളെ തടയുന്ന ആശയത്തില് നിന്നും മുസ്ലീങ്ങള് പുറത്തു വരണമെന്നാണ് മാവോയിസ്റ്റുകള് ആഗ്രഹിക്കുന്നത്. പൊതു ശത്രു എന്ന നിലയില് സാമ്രാജ്യത്വത്തിനെതിരേയുള്ള അവരുടെ കൂട്ടായ്മയും പോരാട്ടവും തുടരുകയും വേണം. സാമ്രാജ്യത്വ വിരുദ്ധതയ്ക്ക് എതിരേയുള്ള പോരാട്ടം മുറുകെ പിടിക്കുന്ന ഇസ്ലാമികള് മതമൗലീകവാദത്തെ തള്ളിക്കളയണമെന്നും ഗണപതി പറയുന്നു.
