ബത്തേരി: സര്വജന ഗവ. ഹൈസ്ക്കൂളില് അഞ്ചാം ക്ളാസ്സ് വിദ്യാര്ത്ഥിനി ഷഹ്ല ഷെറിന് പാമ്പുകടിയേറ്റ് മരിച്ച സംഭവത്തില് ബാലക്ഷേമസമിതി കേസെടുത്തു. സംഭവത്തില് സ്കൂള് അധികൃതര്ക്കും ഡോക്ടര്ക്കും വീഴ്ച സംഭവിച്ചതായി കണ്ടെത്തിയിട്ടുണ്ട്. ജില്ലാ മെഡിക്കല് ഓഫീസറും വിദ്യാഭ്യാസ ഉപ ഡയറക്ടറോടും റിപ്പോര്ട്ട് നല്കാന് ആവശ്യപ്പെട്ടിട്ടുണ്ട്. റിപ്പോര്ട്ട് കിട്ടിയ ശേഷം നടപടിക്ക് ശുപാര്ശ ചെയ്യും. സംഭവത്തില് പ്രതിഷേധം ശക്തമാകുകയാണ്. ജില്ലയില് ഇന്ന് വിദ്യാഭ്യാസ ബന്ദിന് ആഹ്വാനം ചെയ്തിരിക്കുകയാണ് കെഎസ്യു.
വയനാട്ടിലെ മുഴുവന് സ്കൂളുകളും ശുചിയാക്കാന് പൊതുവിദ്യാഭ്യാസ ഉപ ഡയറക്ടര് ഉത്തരവിടുകയും ചെയ്തിട്ടുണ്ട്. പിടിഎയും പ്രധാന അദ്ധ്യാപകനും എല്ലാ ക്ളാസ്മുറികളും സുരക്ഷിതമാണോ എന്ന് പരിശോധന നടത്തി ആവശ്യമെങ്കില് നടപടി എടുക്കണം. ടോയ്ലറ്റും ടോയ്ലറ്റിലേക്കുള്ള വഴിയും ഇന്നു തന്നെ വൃത്തിയാക്കണം. എല്ലാമാസവും ഈ പരിശോധന നടത്തണമെന്നും ഉത്തരവിലുണ്ട്.
കളിസ്ഥലം വരെ സുരക്ഷിതമാണെന്ന് ഉറപ്പാക്കണം. ജാഗ്രതക്കുറവ് തുടര്ന്നാല് നടപടിയെടുക്കുമെന്നും ഉത്തരവില് മുന്നറിയിപ്പ് നല്കിയിട്ടുണ്ട്. വയനാട് ബത്തേരിയില് വിദ്യാര്ത്ഥിനി മരിച്ച സംഭവത്തില് അടിയന്തിര സാഹചര്യത്തില് ഇടപെടുന്നതില് സ്കൂള് അധികൃതര്ക്ക് വീഴ്ച പറ്റിയെന്ന് ഉത്തരവില് പറയുന്നു. പ്രൈമറി വിഭാഗം അധ്യാപകന് സി.പി. ഷജിലിനെയും ചികിത്സയില് അനാസ്ഥ കാട്ടിയ ബത്തേരി താലൂക്കാശുപത്രിയിലെ ഡോ. ജിസയേയും സസ്പെന്ഡ് ചെയ്തു.
ക്ളാസ്സ് മുറികള് പ്രധാന അദ്ധ്യാപകന് പരിശോധിച്ച് സുരക്ഷ ഉറപ്പാക്കാണം. കളി സ്ഥലത്തും ബോക്സുകളിലും പാമ്പ് വരാനുള്ള സാഹചര്യമില്ലെന്ന് ഉറപ്പാക്കണം. പ്രധാനാദ്ധ്യാപകന്റെ നിര്ദേശം സ്കൂളിലെ അദ്ധ്യാപകര് പാലിച്ചില്ലെങ്കില് കര്ശന നടപടിയെടുക്കുമെന്നും ഉത്തരവില് പറയുന്നു. സംഭവത്തിന്റെ പശ്ചാത്തലത്തില് വയനാട്ടിലെ സ്കൂളുകളുടെ സുരക്ഷ ഉറപ്പാക്കാന് വയനാട് കളക്ടറും ഇടപെട്ടിട്ടുണ്ട്. ജില്ലാ വിദ്യാഭ്യാസ ഓഫീസര് ഇന്ന് കളക്ടര്ക്ക് റിപ്പോര്ട്ട് നല്കും.
പഞ്ചായത്ത് സെക്രട്ടറിമാര്ക്കും വനംവകുപ്പ് ഉദ്യോഗസ്ഥര്ക്കും പ്രത്യേക നിര്ദേശം നല്കി. സ്കൂളുകളുടെ സുരക്ഷ നേരിട്ടു പരിശോധിക്കാനാണ് പഞ്ചായത്ത് സെക്രട്ടറിമാരോട് പറഞ്ഞിരിക്കുന്നത്. പാമ്പുകടിയേറ്റാല് എന്തു ചെയ്യണം എന്ന കാര്യത്തില് സര്ക്കാര്, സ്വകാര്യ ആശുപത്രികള്ക്ക് പരിശീലനം നല്കണമെന്നാണ് വനം വകുപ്പിന് നല്കിയിരക്കുന്ന നിര്ദേശം. പരിശീലനം അവഗണിക്കുന്ന സ്ഥാനങ്ങള്ക്കെതിരേ നടപടിയെടുക്കണമെന്നും ആവശ്യപ്പെട്ടിട്ടുണ്ട്.
