സൂറത്ത്: മൂന്നാം നിലയിലെ ജനാലവഴി താഴേയ്ക്ക് വീഴുകയും രണ്ടാം നിലയിലെ ജനാലഴിയില് പിടുത്തം കിട്ടുകയും അവിടെ നിന്നും വീണ്ടും താഴേയ്ക്ക് പതിക്കുകയും ചെയ്ത രണ്ടു വയസ്സുകാരനെ വഴിയാത്രക്കാര് ചേര്ന്ന് സൂപ്പര് ക്യാച്ചെടുത്ത് ജീവിതത്തിലേക്ക് തിരികെ നടത്തി. സൂറത്തിലെ ദാമനില് ഞായറാഴ്ച നടന്ന സംഭവത്തില് രണ്ടു വയസ്സുകാരന് ജമാലിനെയാണ് താഴെ വീണുള്ള അപകടത്തില് പെടുത്താതെ ഭാഗ്യം സുരക്ഷിത കരങ്ങളിലേക്ക് ലാന്റ് ചെയ്യിച്ചത്. ചൊവ്വാഴ്ച സാമൂഹ്യമാധ്യമങ്ങള് വഴി പ്രചരിച്ച സംഭവത്തിന്റെ സിസിടിവി ദൃശ്യങ്ങള് വൈറലായിരിക്കുകയാണ്.
മൂന്നാം നിലയിലെ ജനാലയില് നിന്നും വീണ പയ്യന് രണ്ടാം നിലയിലെ ജനലഴിയില് പിടിച്ചു കിടക്കുകയും ഒരു മിനിറ്റ് അലറിവിളിക്കുകയും ചെയ്തതോടെയാണ് താഴെ തെരുവിലൂടെ കടന്നുപോയ വഴിപോക്കര് പയ്യനെ രക്ഷിക്കാനായി കൈകള് കോര്ത്തതും താഴെ വീഴാതെ പിടിച്ചെടുത്തതും. ഉടന് തന്നെ കുട്ടിയെ ദാമനിലെ സര്ക്കാര് ആശുപത്രിയില് കൊണ്ടുപോയി പരിശോധനയ്ക്ക് വിധേയമാക്കി ഒരു പരിക്കുമില്ലെന്ന് ഉറപ്പാക്കുകയും ചെയ്തിട്ടുണ്ട്. ഞായറാഴ്ച മൂത്തസഹോദരനൊപ്പം മുറിയില് കളിക്കുന്നതിനിടയിലാണ് ജമാല് ആകസ്മികമായി ജനാലയിലൂടെ താഴേയ്ക്ക് വീണത്.
ജനലിനരികില് നിന്നു കളിക്കുന്നതിനിടയില് സഹോദരന് അടുക്കളയിലേക്ക് പോയി. ഈ സമയത്ത് പുറത്തെ കാഴ്ചകള് കണ്ടുകൊണ്ടിരിക്കെ ജനാലയുടെ കൊളത്ത് വിട്ടുപോകുകയും വാതില് തുറന്നുപോകുകയുമായിരുന്നു. താഴേയ്ക്ക് വീണ പയ്യന് രണ്ടാം നിലയിലെ ജനാലഴിയില് ചെറുതായി പിടുത്തം കിട്ടിയെങ്കിലും അധികനേരം തൂങ്ങിക്കിടക്കാനായില്ല. പയ്യന്റെ അലര്ച്ച കേട്ട് ഓടിയെത്തിയവര് നിലത്ത് മുട്ടും മുമ്പ് പയ്യനെ പിടിക്കുകയായിരുന്നു.
സംഭവത്തില് ജമാലിനെ രക്ഷിച്ചവര്ക്കും ദൈവത്തിനും നന്ദി പറയുകയാണ് കുടുംബം. കുട്ടിയെ പിടിച്ചവരും പോലീസും നല്കിയ വിവരണം കുട്ടിയുടെ മാതാവും കുടുംബാംഗങ്ങളും പേടിയോടെയാണ് കേട്ടത്. കുട്ടി താഴേയ്ക്ക് വീണ സമയം വീട്ടുകാര് കുട്ടിയെ കാണാതെ വീടു മുഴുവന് തെരയുകയായിരുന്നു. രണ്ടു ദിവസത്തിന് ശേഷവും കുടുംബം ഞെട്ടലില് നിന്നും മോചിതമായിട്ടില്ലെന്നാണ് കുടുംബം പറയുന്നത്.
