പൃഥ്വിരാജ് സുകുമാരന് എന്ന ചെറുപ്പക്കാരനെ മലയാളികള്ക്ക് പരിചയപ്പെടുത്തി കൊടുക്കുന്നത് സംവിധായകന് രഞ്ജിത്ത് ആണ്. ഫാസിലിന്റെ ചിത്രത്തിലൂടെ അരങ്ങേറാനുള്ള അവസരം കയ്യെത്തും അകലെ വച്ചാണ് പൃഥ്വിക്ക് നഷ്ടമാകുന്നത്. പിന്നാലെയാണ് രഞ്ജിത്തുമായുള്ള കൂടിക്കാഴ്ച നടക്കുന്നതും നന്ദനത്തിലെത്തുന്നതും. ഒരു മാഗസീനു നല്കിയ അഭിമുഖത്തിലാണ് പൃഥ്വിരാജ് നന്ദനത്തിലേക്ക് എത്തിച്ചേര്ന്നതിനെ കുറിച്ചും തനിക്ക് പൃഥ്വിയോടുള്ള വാത്സല്യത്തെ കുറിച്ചുമെല്ലാം രഞ്ജിത്ത് വാചാലനാകുന്നത്.
ഫാസില് തീരുമാനിച്ചിരുന്ന സിനിമ നടക്കാതെ പോവുകയായിരുന്നു. ഫാസിലില് നിന്നുമാണ് രഞ്ജിത്ത് പൃഥ്വിയെ കുറിച്ച് അറിയുന്നത്. തുടര്ന്ന് പൃഥ്വിയുടെ അമ്മ മല്ലിക സുകുമാരനെ വിളിച്ച് ഇളയമകനെ കാണണമെന്ന് പറയുകയായിരുന്നു. പിന്നാലെ തന്നെ കാണാനായി പൃഥ്വിരാജ് കോഴിക്കോട്ടേക്ക് ട്രെയിനില് വരികയായിരുന്നുവെന്ന് രഞ്ജിത്ത് പറയുന്നു.
''ആദ്യ കാഴ്ചയില് തന്നെ എന്റെ മനു ഇവനാണെന്ന് ഞാന് ഉറപ്പിച്ചിരുന്നു. താടി വടിച്ചു കളയരുതെന്ന് പറഞ്ഞ ശേഷം ഞാനവനെ തിരികെ അയച്ചു'' പൃഥ്വിയുമായുള്ള കൂടിക്കാഴ്ചയെ കുറിച്ച് രഞ്ജിത്ത് പറയുന്നു. ഇന്ന് പൃഥ്വി മലയാള സിനിമയിലെ വലിയൊരു ബ്രാന്റ് തന്നെയാണ്. അന്ന് തന്നെ കാണാന് വന്ന പയ്യനില് നിന്നുമുള്ള പൃഥ്വിയുടെ വളര്ച്ചയെ ഒരു അച്ഛന്റെ വാത്സല്യത്തോടെ താന് നോക്കിക്കാണുകയാണെന്നും അദ്ദേഹം പറയുന്നു.
'രാജുവിന്റെ മലയാള സിനിമയിലെ വളര്ച്ച അച്ഛന് മകനെ നോക്കിക്കാണുന്നത് പോലെ താന് കാണുകയായിരുന്നു.' രഞ്ജിത്ത് പറയുന്നു. ജീവിതത്തില് പരസ്പരം അത്രമേല് അടുപ്പമുള്ള ഇരുവരും അഞ്ജലി മേനോന്റെ കൂടെയില് അച്ഛനും മകനുമായി അഭിനയിച്ചിരുന്നു. രണ്ടുപേരുടേയും കെമിസ്ര്ട്രി ശ്രദ്ധ നേടിയിരുന്നു.
ഇപ്പോള് ഇരുവരും വീണ്ടും ഒരുമിക്കുകയാണ്. അയ്യപ്പനും കോശിയും എന്ന ചിത്രത്തിലാണ് ഇരുവരും അഭിനയിക്കുന്നത്. നേരത്തെ രഞ്ജിത്തിന്റെ ഇന്ത്യന് റുപ്പി, തിരക്കഥ എന്നീ ചിത്രങ്ങളിലും പൃഥ്വിരാജ് നായകനായിരുന്നു. സച്ചിയാണ് അയ്യപ്പനും കോശിയും സംവിധാനം ചെയ്യുന്നത്. ഈ ചിത്രത്തിലും അച്ഛനും മകനുമായാണ് രണ്ടുപേരും എത്തുന്നത്.
