മാമാങ്കം തിയറ്ററുകളില് നിറഞ്ഞ പ്രദര്ശനം തുടരുമ്പോള് ചിത്രത്തിന്റെ വ്യാജപതിപ്പുകള് ഇന്റര്നെറ്റില് വിവിധ സൈറ്റുകളില് പ്രത്യക്ഷപ്പെട്ടിരുന്നു. ഇതില് പൊലീസ് അന്വേഷണം നടക്കുകയാണ്. എക്സിക്യൂട്ടീവ് പ്രൊഡ്യൂസര് ആന്റണി ജോസഫ് നല്കിയ പരാതിയില് സിനിമ അപ്ലോഡ് ചെയ്തയാളെ ഒന്നാം പ്രതിയാക്കി പൊലീസ് കേസെടുത്തിട്ടുണ്ട്.
സിനിമ ഇന്റര്നെറ്റില് നിന്ന ഡൗണ്ലോഡ് ചെയ്തവരെയും കേസില് പ്രതിചേര്ക്കും. ഇതിന് പിന്നില് ഒരു പ്രമുഖ സിനിമാ നിര്മ്മാതാവിന് പങ്കുണ്ടെന്ന സംശയത്തിലാണ് പോലീസ്. ഈ നിര്മ്മാതാവിനെ ചുറ്റിപ്പറ്റിയും അന്വേഷണം പുരോഗമിക്കുകയാണ്. ഇയാളുടേതുള്പ്പെടെ ചില ഫോണുകള് പൊലീസ് നിരീക്ഷണത്തിലാണെന്നാണ് ലഭിക്കുന്ന സൂചന. നേരത്തെ സൈബര് ആക്രമണത്തിനെതിരെ മാമാങ്കം സിനിമയുടെ നിര്മ്മാതാക്കള് നല്കിയ പരാതിയില് വിതുര പൊലീസാണ് കേസ് രജിസ്റ്റര് ചെയ്തിരുന്നത്.
മുന് സംവിധായകന് ഉള്പ്പടെ ഏഴോളം പേരാണ് പ്രതികള്. അന്വേഷണ സംഘം ചില ഫോണ് കോള് വിശദാംശങ്ങളും ശേഖരിച്ച് കഴിഞ്ഞതായാണ് ലഭിക്കുന്ന സൂചന. സാധാരണ ഒരു സൈബര് കേസ് എന്നതിലുപരി സംഘടിതമായ ഒരു ഗൂഢാലോചന തന്നെ സിനിമക്കെതിരെ നടക്കുന്നുണ്ടെന്ന നിഗമനത്തിലാണിപ്പോള് പൊലീസ്. ഈ സാഹചര്യത്തില് പൊലീസിന്റെ സൈബര് വിഭാഗവും സിനിമക്കെതിരായ സംഘടിത നീക്കത്തെ ഗൗരവമായി കണ്ടാണ് തുടര് നടപടികള് സ്വീകരിച്ച് വരുന്നത്
