ന്യൂഡല്ഹി: പൗരത്വ ഭേദഗതി നിയമത്തിനെതിരേ കനത്ത പ്രതിഷേധം നടക്കുന്നതിനിടയില് പത്തു നഗരങ്ങളില് ഇന്ന് പ്രതിഷേ മാര്ച്ച് നടത്താന് പദ്ധതി. ഇതില് ബിജെപി സര്ക്കാരുകള്ക്ക് മേല്ക്കോയ്മയുള്ള ഡല്ഹി ഉള്പ്പെടെയുള്ള മുന്ന് നഗരങ്ങളില് എതിര്ക്കാന് പോലീസ് തീരുമാനമെടുത്തു. ഡല്ഹിയില് നടക്കുന്ന ഏതു റാലിയും എതിര്ക്കാനാണ് തീരുമാനം. ഇതിന് പുറമേ ബിജെപി ഭരിക്കുന്ന കര്ണാടകയിലെ ബംഗലുരു, യുപിയിലെ ലക്നൗ എന്നിവിടങ്ങളിലും പ്രതിഷേധം തടയപ്പെടും.
മുംബൈ, ചെന്നൈ, പൂനെ, ഹൈദരാബാദ്, നാഗ്പൂര്, ഭുവനേശ്വര്, കൊല്ക്കത്ത, ഭോപ്പാല് എന്നീ നഗരങ്ങളിലും പ്രതിഷേധത്തിന് അനുമതിയില്ല. കഴിഞ്ഞയാഴ്ച ബില്ല് പാസ്സാക്കപ്പെട്ടതിന് പിന്നാലെ രാജ്യത്തുടനീളം വലിയ പ്രതിഷേധങ്ങളാണ് നടക്കുന്നത്. ഏറ്റവും കൂടുതല് പ്രതിഷേധങ്ങള് കണ്ടത് വടക്കു കിഴക്കന് സംസ്ഥാനങ്ങളും ഡല്ഹിയുമാണ്. ഈ പ്രതിഷേധങ്ങളാകട്ടെ രൂക്ഷിതവുമായിരുന്നു. ഡല്ഹിയില് ഈ ആഴ്ച രണ്ടു തവണയാണ് പോലീസ് പ്രതിഷേധക്കാരുമായി ഏറ്റുമുട്ടിയത്.
ഇന്ന് ജാമിയ മിലിയ സര്വകാലാശാല വിദ്യാര്ത്ഥികള് ഇന്ന് റെഡ്ഫോര്ട്ടിലേക്ക് മാര്ച്ച് നടത്താനാണ് തീരുമാനം. എന്നാല് ട്രാഫിക് പോയിന്റ് എന്ന നിലയില് ക്രമസമാധാന പാലനം മുന് നിര്ത്തി പ്രതിഷേധ മാര്ച്ചിന് ഡല്ഹി പോലീസ് ബുധനാഴ്ച വൈകിട്ട് അനുമതി നിഷേധിച്ചിരുന്നു. നഗരത്തില് കനത്ത സുരക്ഷാ സംവിധാനം ഒരുക്കിയിരിക്കുകയാണ്. നാലു മെട്രോ സ്റ്റേഷനുകള് അടച്ചു.
രാവിലെ 11 മണിക്കാണ് ബംഗലുരുവില് പ്രതിഷേധം നിശ്ചയിച്ചിരിക്കുന്നത്. ഇവിടെയും പോലീസ് അനുമതി നിഷേധിച്ചിട്ടുണ്ട്. അനുവാദം കൂടാതെ നടന്ന പ്രതിഷേധങ്ങളില് കല്ലേറ് ഉണ്ടായതിനെ തുടര്ന്ന് ആള്ക്കാര്ക്ക് പരിക്കേല്ക്കുകയും പൊതുമുതല് നശിപ്പിക്കപ്പെടുന്ന സാഹചര്യം ഉണ്ടാവുകയും ചെയ്തിരുന്നതായി ബംഗലുരു പോലീസ് കമ്മീഷണര് ഭാസ്ക്കര് റാവു പറഞ്ഞു. ഇന്ന് രാവിലെ ആറ് മണി മുതല് ഡിസംബര് 21 വരെ ബംഗലുരുവില് എല്ലാത്തരം നീക്കവും നിഷേധിച്ചിരിക്കുകയാണ്.
ഇന്ത്യയിലെ വിവിധ നഗരങ്ങളില് പദ്ധതിയിട്ടിരിക്കുന്ന പ്രതിഷേധങ്ങളില് അനേകം രാഷ്ട്രീയ പാര്ട്ടികളും സംഘടനകളും നാട്ടുകാരും പങ്കാളികളാകുമെന്നാണ് വിവരം. ഇന്നലെ ഉച്ച മുതല് സാമൂഹ്യ മാധ്യമങ്ങളില് പ്രതിഷേധത്തിന്റെ സമയവും വേദിയും സംബന്ധിച്ച അറിയിപ്പുകള് വന്നു കൊണ്ടിരിക്കുകയാണ്. രാവിലെ 10 മണിക്ക് ബുവനേശ്വറിലാണ് ആദ്യ പ്രതിഷേധം. മുംബൈയില് വൈകിട്ട് നാലു മണിക്കും ചെന്നൈയില് വൈകിട്ട് 3 മണിക്കും ഭോപാലില് ഉച്ചയ്ക്ക് രണ്ടു മണിക്കും ഹൈദരാബാദില് നാലു മണിക്കും പൂനെയില് 4.30 യ്ക്കുമായിരിക്കും പ്രതിഷേധം.
കൊല്ക്കത്തയില് കഴിഞ്ഞ മൂന്ന ദിവസമായി ബംഗാള് മുഖ്യമന്ത്രി മമതാ ബാനര്ജി കാല്നട യാത്ര നടത്തുകയാണ്. ഇന്നത്തെ യാത്ര ഉച്ചയ്ക്ക് തുടങ്ങും. അഫ്ഗാനിസ്ഥാന്, ബംഗ്ളാദേശ്, പാകിസ്താന് എന്നിവിടങ്ങളില് നിന്നും ഇന്ത്യയിലേക്ക് കുടിയേറിയവരില് മുസ്ളീങ്ങള് ഒഴികെയുള്ള മതവിഭാഗങ്ങള്ക്ക് ഇന്ത്യയില് പൗരത്വം നല്കുന്ന നിയമത്തിനെതിരേ വലിയ പ്രതിഷേധമാണ് നടക്കുന്നത്. ഇന്ത്യന് ഭരണഘടനയിലെ മതേതര സ്വഭാവത്തെ വെല്ലുവിളിക്കുന്നെന്നാണ് ആരോപണം. 59 ഹര്ജികളാണ് ഇതിനെതിരേ സുപ്രീംകോടതിയില് കഴിഞ്ഞ ദിവസം എത്തിയത്്.
