ലഖ്നൗ: അയോധ്യയില് മുസ്ലീം പള്ളി നിര്മ്മിക്കുന്നതിന് സ്ഥലങ്ങള് കണ്ടെത്തിയതായി ഉത്തര്പ്രദേശ് സര്ക്കാര്. അയോധ്യയില് ക്ഷേത്രത്തിന് 15 കിലോമീറ്റര് ചുറ്റളവിന് പുറത്താണ് പ്ലോട്ടുകള് കണ്ടെത്തിയത്. എല്ലാം ദേശീയപാതയ്ക്ക് സമീപമാണെന്നും സര്ക്കാര് പറയുന്നു. പ്ലോട്ടുകളുടെ പട്ടിക കേന്ദ്ര ആഭ്യന്തര മന്ത്രാലയത്തിന്റെ അംഗീകാരത്തിന് കൈമാറി. എന്നാല് സ്ഥലം സ്വീകരിക്കുന്നതില് തീരുമാനമെടുത്തിട്ടില്ലെന്ന് മുസ്ലീം വ്യക്തി നിയമ ബോര്ഡ് വ്യക്തമാക്കി.
രാമജന്മഭൂമി- ബാബ്റി മസ്ജിദ് കേസില് സുപ്രീം കോടതി നവംബര് 9ന് പുറപ്പെടുവിച്ച വിധിയുടെ അടിസ്ഥാനത്തിലാണ് പള്ളി നിര്മ്മാണത്തിനായി യു.പി സര്ക്കാര് സുന്നി വഖഫ് ബോര്ഡിന് അഞ്ച് ഏക്കര് സ്ഥലം കണ്ടെത്തി നല്കുന്നത്. അഞ്ച് പ്ലോട്ടുകളാണ് കണ്ടെത്തിയിരിക്കുന്നത്. അയോധ്യ- ഫൈസാബാദ് റോഡ്, അയോധ്യ -ബസ്തി റോഡ്, അയോധ്യ -സുല്ത്താന്പുര് റോഡ്, അയോധ്യ ഗോരഖ്പുര് റോഡ് എന്നിവിടങ്ങളിലാണ് നാല് പ്ലോട്ടുകള്.
'പഞ്ചകോശി പരികര്മ്മ'യുടെ 15 കിലോമീറ്റര് ചുറ്റളവിനു പുറത്തായതിനാല് ഹിന്ദു, മുസ്ലീം വിഭാഗങ്ങളുടെ ആഘോഷങ്ങള് ഒരേ സമയം വരുന്ന വേളയില് ഇരുവിഭാഗത്തെയും ഭക്തര്ക്ക് ഒരു അസൗകര്യവും ഉണ്ടാകില്ലെന്ന് ഉറപ്പാക്കുന്നുവെന്നും സര്ക്കാര് വ്യക്തമാക്കുന്നു. ദേശീയപാതയ്ക്ക് തൊട്ടടുത്തു തന്നെ സൗകര്യപ്രദമായ സ്ഥലമാണ് നല്കുന്നതെന്നും സര്ക്കാര് പറയുന്നു.
അതേസമയം, സ്ഥലം ഏറ്റെടുക്കുന്നത് സംബന്ധിച്ച് തീരുമാനമെടുത്തിട്ടില്ലെന്ന് സുന്നി വഖഫ് ബോര്ഡ് അറിയിച്ചു. തര്ക്കത്തിലിരുന്ന ഭൂമിക്ക് പകരമായി സ്ഥലം എന്നതിനെ ജമിയത്ത് ഉലമ ഐ ഹിന്ദ്, അഖിലേന്ത്യ മുസ്ലീം വ്യക്തി നിയമ ബോര്ഡ് എന്നിവ എതിര്ക്കുകയാണ്.
എന്നാല് സുപ്രീം കോടതിയുടെ വിധിയുടെ അടിസ്ഥാനത്തില് പള്ളി നിര്മ്മാണത്തിന് പകരം സ്ഥലം കണ്ടെത്താനുള്ള നടപടിക്രമം കേന്ദ്രസര്ക്കാര് ആരംഭിക്കുകയും നിര്ദേശങ്ങള് സമര്പ്പിക്കാന് യു.പി സര്ക്കാരിനോട് ആവശ്യപ്പെടുകയും ചെയ്തിരുന്നു. സംസ്ഥാന സര്ക്കാരിന്റെ നിര്ദേശപ്രകാരം ഫൈസാബാദ് ജില്ലാ ഭരണകൂടം ആണ് അഞ്ച് സ്ഥലങ്ങള് കണ്ടെത്തി സര്ക്കാരിന് കൈമാറിയത്.
