ദുല്ഖര് സല്മാനെ നായകനാക്കി സത്യന് അന്തിക്കാടിന്റെ മകന് അനൂപ് സത്യന് സംവിധാനം ചെയ്യുന്ന വരനെ ആവശ്യമുണ്ടെന്ന ചിത്രത്തില് വലിയ സര്പ്രൈസുകളാണ് അണിയറ പ്രവര്ത്തകര് ഒരുക്കിയിരിക്കുന്നത്. സുരേഷ് ഗോപിയും ശോഭനയും കേന്ദ്രകഥാപാത്രത്തെ അവതരിപ്പിക്കുന്ന ചിത്രത്തില് കല്യാണി പ്രിയദര്ശനാണ് ദുല്ഖറിന്റെ നായികയായി എത്തുന്നത്. എന്നാല് ഇവരെയൊന്നും കൂടാതെ മറ്റൊരു സെലിബ്രിറ്റി കിഡ് കൂടി ചിത്രത്തിലുണ്ട് എന്നതാണ് ആ സര്പ്രൈസ്. സംവിധായകന് അനൂപ് സത്യന് തന്നെയാണ് ഇക്കാര്യം പുറത്ത് വിട്ടതും.
പ്രശസ്ത ഛായാഗ്രഹകന് സന്തോഷ് ശിവന്റെ മകന് ചിത്രത്തില് സുപ്രധാന കഥാപാത്രത്തെ അവതരിപ്പിക്കുന്നു എന്നതാണ് വരനെ ആവശ്യമുണ്ട് എന്ന ചിത്രത്തില് ഒളിപ്പിച്ചിരിക്കുന്ന മറ്റൊരു സവിശേഷത. സര്വജിത്ത് സന്തോഷ് ശിവന് എന്ന പേരുള്ള കുട്ടി മിടുക്കന്റെ സൂപ്പര് ക്യൂട്ട് വീഡിയോ പങ്കുവെച്ചുകൊണ്ടാണ് അനൂപ് ഇക്കാര്യം വെളിപ്പെടുത്തിയിരിക്കുന്നത്. അപ്പു എന്ന് വിളിപ്പേരുള്ള സര്വ്വജിത്തിന്റെ കുട്ടിക്കാലത്തുള്ള വീഡിയോ ആണ് അനൂപ് പങ്കുവെച്ചിരിക്കുന്നത്.
ഫ്ലൈഓവറിനടുത്തുള്ള പഴയവീട്ടിലൊരു ഫ്ലൈറ്റുണ്ടെന്നും അത് നമുക്ക് പറത്താമെന്നും അപ്പു പറയുന്നു. സന്തോഷ് ശിവന് പകര്ത്തിയ വീഡിയോയില് അച്ഛനെ ഫ്ലൈറ്റില് കയറ്റാമെന്നും അമ്മയെയും കയറ്റാമെന്നും താന് ഫ്ലൈറ്റ് പറത്താമെന്നും ഓമനത്തം തുളുമ്പുന്ന ഭാവങ്ങളോടെ അപ്പു പറയുന്നുണ്ട്. എന്നാല് പതിനെട്ട് തികയാതെ നീ എങ്ങനെയാണ് ഫ്ലൈറ്റ് പറത്തുന്നതെന്ന് സന്തോഷ് ശിവന് ചോദിക്കുന്നതും വീഡിയോയില് കേള്ക്കാം.
ഈ വീഡിയോ ആണ് താന് സ്ട്രെസ്സ് ബസ്റ്ററായി കാണാറുള്ളതെന്നും അപ്പുവിന്റെ അച്ഛന് സന്തോഷ് ശിവന് തന്നെയാണ് വീഡിയോ തനിക്ക് പങ്കുവെച്ചതെന്നും അനൂപ് വീഡിയോ പങ്കുവെച്ചുകൊണ്ട് കുറിച്ചിരിക്കുന്നു. അനൂപ് സത്യന് അന്തിക്കാട് ആദ്യമായി ഒരുക്കുന്ന ചിത്രമാണ് വരനെ ആവശ്യമുണ്ട്. ചിത്രത്തിന്റെ പ്രഖ്യാപന വേളയില് തന്നെ ഏറെ ശ്രദ്ധ ആകര്ഷിച്ച ചിത്രമാണ് ഇത്. ശോഭനയും സുരേഷ് ഗോപിയും ഏറെ കാലത്തിന് ശേഷം ഒന്നിച്ചഭിനയിക്കുന്നു എന്നതും കല്യാണിയും ദുല്ഖറും ആദ്യമായി ഒന്നിച്ചഭിനയിക്കുന്നു എന്നതുമാണ് വലിയ പ്രത്യേകതകള്.
അതോടൊപ്പം ഈ വീഡിയോ പങ്കുവെച്ചതിനോടൊപ്പം തന്നെ അനൂപ് സത്യന് ചിത്രത്തിന്റെ ലൊക്കേഷന് ചിത്രങ്ങളും പങ്കുവെച്ചിട്ടുണ്ട്. ശോഭനയ്ക്കും അനൂപ് സത്യനും ദുല്ഖറിനുമൊപ്പം ഉള്ള അപ്പുവിന്റെ ചിത്രങ്ങളും ഷൂട്ടിങ്ങിനിടെ പകര്ത്തിയ ചെറു വീഡിയോയും പങ്കുവെച്ചിട്ടുണ്ട്. ചിത്രത്തില് വളരെ പ്രധാനമായ കഥാപാത്രത്തെയാണ് അപ്പു അവതരിപ്പിക്കുന്നതെന്നാണ് ഇതില് നിന്ന് വ്യക്തമാകുന്നത്.
പത്രങ്ങളിലെ മാട്രിമോണി ക്ലാസിഫൈഡ്സ് പരസ്യങ്ങളുടെ പേജിന്റെ മാതൃകയിലാണ് വരനെ ആവശ്യമുണ്ട് എന്ന ചിത്രത്തിന്റെ ടൈറ്റില് പോസ്റ്റര് പുറത്ത് വിട്ടിരുന്നത്. 2020ല് ദുല്ഖറിന്റേതായി ഒരുങ്ങുന്ന ഏറെ പ്രതീക്ഷയുള്ള ചിത്രം കൂടിയാണിത്. ദുല്ഖര് പ്രൊഡക്ഷന്സിന്റെ ബാനറില് എം സ്റ്റാര് ഫിലിംസും വേഫെറര് ഫിലിംസും ചേര്ന്ന് നിര്മ്മിക്കുന്ന ചിത്രം പ്രഖ്യാപന വേളയില് തന്നെ ഏറെ ശ്രദ്ധിക്കപ്പെട്ടിരുന്നു.
