ന്യൂഡല്ഹി: ജെഎന്യു അക്രമസംഭവുമായി ബന്ധപ്പെട്ട് ആപ്പിള്, വാട്്സാപ്പ്, ഫെയ്സ്ബുക്ക്, ഗൂഗിള് എന്നീ കമ്പനികള്ക്ക് ഹൈക്കോടതിയുടെ നോട്ടീസ്. അക്രമ സംഭവങ്ങളിലെ തെളിവുകളായ സിസിടിവി ദൃശ്യങ്ങളും വാട്സാപില് ഉള്പ്പെടെ സാമൂഹ്യമാധ്യമങ്ങളിലുടെ വന്ന സന്ദേശങ്ങളും സൂക്ഷിക്കണമെന്ന് ആവശ്യപ്പെട്ടുകൊണ്ടാണ് ഡല്ഹി ഹൈക്കോടതി നോട്ടീസ് അയച്ചിരിക്കുന്നത്. തെളിവുകള് സൂക്ഷിക്കണമെന്ന് ആവശ്യപ്പെട്ടുകൊണ്ടുള്ള ഹര്ജിയിലാണ് കോടതിയുടെ നടപടി.
ജെഎന്യുവിലെ പ്രൊഫസര്മാര് സമര്പ്പിച്ച ഹര്ജി പരിഗണിച്ച ഹൈക്കോടതി ഇക്കാര്യത്തില് പോലീസില് നിന്നും വിശദീകരണം തേടി. ജെഎന്യുവിലെ മൂന്ന് പ്രൊഫസര്മാരാണ് സിസിടിവി ദൃശ്യങ്ങളും സാമൂഹ്യമാധ്യമങ്ങളിലെ വിവരങ്ങളും സംരക്ഷിക്കണമെന്ന് ആവശ്യപ്പെട്ടാണ് കോടതിയെ സമീപിച്ചത്.
സിസിടിവി ദൃശ്യങ്ങള്ക്കായി സര്വകലാശാല അധികൃതരെ സമീപിച്ചിട്ടുണ്ടെന്നും എന്നാല് അധികൃതരില് നിന്നും മറുപടി ലഭ്യമായിട്ടില്ലെന്നുമാണ് പോലീസിന്റെ വാദം. മറുപടിക്കായി കാത്തിരിക്കുകയാണെന്നും പോലീസ് കോടതിയെ അറിയിച്ചു. വാട്സാപ് ഗ്രൂപ്പുകളിലെ വിവരങ്ങള് തേടിയും ഡല്ഹി പോലീസ് വാട്സാപിനും കത്തയച്ചിട്ടുണ്ട്.
