ന്യൂഡല്ഹി: പുരാണവുമായി ബന്ധപ്പെടുത്തിയുള്ള വിവാദ പ്രസ്താവനകള് ബിജെപി നേതാക്കള് അവസാനിപ്പിക്കുന്നില്ല. കേന്ദ്രമന്ത്രിയും ഒരു സംസ്ഥാന ഗവര്ണ്ണറും ചാണകത്തെക്കുറിച്ചും അര്ജുനന്റെ അമ്പിനെക്കുറിച്ചും നടത്തിയിരിക്കുന്ന പ്രസ്താവനയാണ് ഏറ്റവും പുതിയത്. ഇന്ത്യന് സമ്പദ് വ്യവസ്ഥയ്ക്ക് ഗുണകരമാകും വിധം ശാസ്ത്രജ്ഞര് ചാണകത്തെക്കുറിച്ച് ഗവേഷണം നടത്തണമെന്ന കേന്ദ്രമന്ത്രിയുടെ പ്രസ്താവന ചിരി പടര്ത്തുമ്പോള് അര്ജുനന്റെ അമ്പുംവില്ലും ആണവശക്തി ഉള്ളതായിരുന്നെന്ന ബംഗാള് ഗവര്ണറുടെ കണ്ടെത്തല് അമ്പരപ്പിക്കുകയാണ്.
കേന്ദ്രമന്ത്രി ഗിരിരാജ്സിംഗാണ് ചാണകം ശാസ്ത്രജ്ഞ ഗവേഷണ വിഷയമാക്കണം എന്നാവശ്യപ്പെട്ടത്. പശുവിന്റെ ചാണകം, മൂത്രം എന്നിവയില് നിന്നും മൂല്യ വര്ദ്ധിത ഉല്പ്പന്നങ്ങള് നിര്മ്മിക്കാന് സാധിക്കുമെന്നും അത് രാജ്യത്തിന്റെ സമ്പദ് വ്യവസ്ഥയ്ക്ക് ഗുണകരമാകുമെന്നുമാണ് ഗിരിരാജിന്റെ കണ്ടെത്തല്. രാജ്യത്തെ ശാസ്ത്രജ്ഞര് ചാണകം ഗവേഷണ വിഷയമാക്കിയാല് രാജ്യത്തെ ക്ഷീര കര്ഷകര്ക്ക് പശുവിന്റെ പാലില്ലെങ്കിലും പിടിച്ചു നില്ക്കാനാകും. ചാണകത്തില് നിന്നും മൂത്രത്തില് നിന്നും പണം സമ്പാദിക്കാമെന്ന് കണ്ടെത്തിയാല് പിന്നെ കര്ഷകര് പശുവിനെ ഉപേക്ഷിക്കുന്ന രീതിക്ക് മാറ്റം വരും. ഇപ്പോള് തന്നെ യുപിയിലെ തെരുവിലൂടെ അനേകം പശുക്കളാണ് അലഞ്ഞു തിരിഞ്ഞു നടക്കുന്നതെന്നും ചാണകത്തിലെ ഗവേഷണം ഈ രീതിയ്ക്ക് മാറ്റം വരുത്തുമെന്നും പറയുന്നു.
അതേസമയം മറുവശത്ത് അര്ജുനന്റെ അമ്പും വില്ലും ആണവശക്തി ഉള്ളതായിരുന്നു എന്ന കണ്ടെത്തല് നടത്തിയിരിക്കുന്നത് ബംഗാള് ഗവര്ണര് ജഗദീപ് ധന്കറാണ്. 'മഹാഭാരത, രാമായണ കാലത്ത് പറക്കുന്ന ഉപകരണങ്ങള് നമ്മള് ഉപയോഗിച്ചിരുന്നു. എന്നാല്, 1910 1911ല് വിമാനം കണ്ടുപിടിച്ചെന്നാണ് ചരിത്രത്തില് രേഖപ്പെടുത്തിയിട്ടുള്ളത്. മഹാഭാരത യുദ്ധത്തില് അന്ധനായ ധൃതരാഷ്ര്ടര്ക്ക് യുദ്ധത്തിലെ ഓരോ രംഗവും സഞ്ജയന് വിശദീകരിച്ച് കൊടുത്തത് പടക്കളത്തില് നിന്നല്ല. ടിവി ഇല്ലാത്ത കാലത്താണ് ഇതെന്ന് ഓര്ക്കണമെന്നാണ് ഗവര്ണറുടെ കണ്ടെത്തല്.
45ാമത് ഈസ്റ്റേണ് ഇന്ത്യ സയന്സ് ഫെയറില് സംസാരിക്കവേയാണ് ഗവര്ണര് ഇക്കാര്യം വെളിപ്പെടുത്തിയത്. ഗവര്ണറുടെ പരാമര്ശങ്ങള്ക്കെതിരെ വ്യാപക വിമര്ശനമാണ് എങ്ങും ഉയരുന്നത്. അക്കാദമീഷ്യന് നരസിങ്ഹ പ്രസാദ് ബദൂരി ഗവര്ണറെ രൂക്ഷമായി വിമര്ശിച്ചുകൊണ്ട് രംഗത്തെത്തി. ബിജെപി നിയമിക്കുന്ന ഗവര്ണര്മാരുടെ പ്രശ്നം ഇതാണ്, അവര് എല്ലായിടത്തും എന്തിനെ കുറിച്ചും കയറി അഭിപ്രായം പറയുമെന്ന് ബദൂരി പറഞ്ഞു. കേന്ദ്രമന്ത്രി ഗിരിരാജന്റെ ചാണകത്തെക്കുറിച്ചുള്ള പ്രസ്താവന രാജ്യത്തെ 12 സംസ്ഥാനങ്ങളിലെ വൈസ് ചാന്സലര് മാരും മൃഗഡോക്ടര്മാരും പങ്കെടുത്ത പരിപാടിയിലായിരുന്നു.
