ന്യൂഡല്ഹി: ഇന്ത്യന് പൗരത്വനിയമ ഭേദഗതിക്കെതിരെ പ്രമേയം അവതരിപ്പിക്കാനുള്ള നീക്കം പുന: പരിശോധിക്കണമെന്ന് ആവശ്യപ്പെട്ട് യൂറോപ്യന് യൂണിയനോട് ഇന്ത്യ. പ്രമേയം അവതരിപ്പിക്കുന്നതിന് മുമ്പായി വസ്തുതകളും കാര്യങ്ങളും വേണ്ടവണ്ണം പഠിക്കണമെന്ന് കേന്ദ്രസര്ക്കാര് യൂറോപ്യന് യൂണിയനോട് ആവശ്യപ്പെട്ടു.
പൗരത്വ നിയമ ഭേദഗതി യൂറോപ്യന് സമൂഹം മുമ്പ് നടത്തിയ രീതിയില് ഏതെങ്കിലും മതത്തിനെതിരേയുള്ള വിവേചനം അല്ലെന്ന് സര്ക്കാര് ആവര്ത്തിച്ച് ആവര്ത്തിച്ച് വ്യക്തമാക്കി. പൗരത്വ നിയമ ഭേദഗതി പൂര്ണ്ണമായും ഇന്ത്യയുടെ ആഭ്യന്തര കാര്യമാണെന്നും ചില അംഗങ്ങളോട് പ്രമേയത്തില് നിന്നും അകന്നു നില്ക്കാന് ആവശ്യപ്പെട്ടിട്ടുണ്ടെന്നും സര്ക്കാര് പറഞ്ഞു. പൂര്ണ്ണമായും ജനാധിപത്യ രീതിക്ക് അനുസരിച്ച് പാര്ലമെന്റിന്റെ ഇരു സഭകളിലും സജീവമായി ചര്ച്ച ചെയ്ത ശേഷമാണ് നിയമമാക്കിയതെന്നും കേന്ദ്രസര്ക്കാര് വ്യക്തമാക്കിയിട്ടുണ്ട്.
യൂറോപ്യന് യൂണിയന് ഒരിക്കലും നടപടിയെടുക്കില്ലെന്നും ഇന്ത്യന് ജനാധിപത്യത്തിലെ തെരഞ്ഞെടുക്കപ്പെട്ട ജനപ്രതിനിധികളുടെ അവകാശങ്ങള് ചോദ്യം ചെയ്യപ്പെടില്ലെന്നും കേന്ദ്രസര്ക്കാര് പ്രതീക്ഷ പ്രകടിപ്പിച്ചു. യുറോപ്യന് യൂണിയന് ഇക്കാര്യം ബുധനാഴ്ച ചര്ച്ച ചെയ്യാനും തൊട്ടടുത്ത ദിവസം തന്നെ വോട്ടിനിടാനും തീരുമാനം എടുത്തിരിക്കുകയാണ്. 751 അംഗങ്ങളുള്ള യൂറോപ്യന് യൂണിയനില് 625 പേരും പൗരത്വ നിയമത്തിനും കശ്മീര് വിഷയത്തിലും ഇന്ത്യയ്ക്കെതിരേ രംഗത്ത് വന്നിരിക്കുകയാണ്.
ഇന്ത്യന് ഭരണകൂടം മതന്യൂനപക്ഷങ്ങളോട് വിവേചനം കാട്ടുകയാണെന്നും ഉപദ്രവിക്കുകയും അവരില് കുറ്റാരോപണം നടത്തുകയും ചെയ്യുകയാണെന്നാണ് യൂറോപ്യന് യൂണിയന് പറയുന്നത്. പ്രതിപക്ഷത്തെയും മനുഷ്യാവകാശ ഗ്രൂപ്പുകളെയും സര്ക്കാര് വിമര്ശനം നടത്തുന്ന മാധ്യമങ്ങളെയും യൂറോപ്യന് യൂണിയന് നിശബ്ദ്ധരാക്കുന്നു എന്നാണ് യൂറോപ്യന് യൂണിയന് പ്രധാനമായും ഉയര്ത്തുന്ന ആരോപണം. പൗരത്വം നേടുന്ന കാര്യത്തില് തുല്യ അവകാശത്തില് നിന്നും മുസ്ളീങ്ങളെ നിയമപരമായി ഒഴിവാക്കുന്നതില് നേരത്തേ യൂറോപ്യന് യൂണിയന് എതിര്പ്പ് പ്രകടിപ്പിച്ചിട്ടുണ്ട്. യൂറോപ്യന് യൂണിയന് പാര്ലമെന്റിലെ 150ല് അധികം പ്രതിനിധികളാണ് പ്രമേയം അവതരിപ്പിക്കാനൊരുങ്ങുന്നത്.
അതിനിടയില് പൗരത്വ നിയമത്തിനെതിരേ കേരളത്തിനും പഞ്ചാബിനും രാജസ്ഥാനും പിന്നാലെ ബംഗാളും പ്രമേയം പാസ്സാക്കാനൊരുങ്ങുകയാണ്. സിപിഎമ്മും കോണ്ഗ്രസും പ്രമേയത്തില് സര്ക്കാരിനൊപ്പം നില്ക്കും. പ്രമേയം അവതരിപ്പിക്കാനുള്ള അനുമതി ബംഗാള് സ്പീക്കര് നല്കിയിട്ടുണ്ട്. പ്രത്യേക യോഗം ചേര്ന്നായിരിക്കും പ്രമേയം അവതരിപ്പിക്കുക.
