ചമോലി (ഉത്തരാഖണ്ഡ്): മഞ്ഞുകാലം ഉത്തരേന്ത്യയില് പലയിടങ്ങളിലും ജീവിതം ദുരിതപൂര്ണ്ണമാക്കാറുണ്ട്. എന്നു കരുതി ജീവിതത്തിലെ ഒരു കാര്യങ്ങളും അവര് മാറ്റിവയ്ക്കാറില്ല. കനത്ത മഞ്ഞുവീഴ്ച മൂലം റോഡുകള് വരെ അടച്ചിട്ട് ഗതാഗതം പൂര്ണ്ണമായും നിലയ്ക്കുന്ന സമയത്ത് നിശ്ചയിച്ച വിവാഹത്തിനായി യാത്ര ചെയ്യുന്ന വരന്റെയും കൂട്ടരുടെയും ചിത്രമാണ് വാര്ത്ത ഏജന്സിയായ എ.എന്.ഐ പുറത്തുവിട്ടിരിക്കുന്നത്.
ഉത്തരാഖണ്ഡിലെ ചമോലിയില് ബിര്ജയിലുള്ള വധുവിന്റെ ഗൃഹത്തിലേക്ക് വിവാഹത്തിനായി ലുന്താരയില് നിന്നും വരനും കൂട്ടരും എത്തിയത് കനത്ത മഞ്ഞിലൂടെ നാലു കിലോമീറ്റര് നടന്നാണ്. മഞ്ഞ് ദേഹത്ത് വീഴുന്നത് തടയാന് വരന് ഒരു കുടയും ചൂടി. വിവാഹ വസ്ത്രം ധരിച്ചായിരുന്നു വരന്റെ യാത്ര.
ചമോലി മേഖലയില് വിവാഹ സീസണ് കൂടിയാണിത്. മഞ്ഞുവീഴ്ചയും മരംകോച്ചുന്ന തണുപ്പുമൊക്കെ ദൈനംദിന ജീവിതത്തെ ബാധിക്കുന്നുണ്ടെങ്കിലും ആഘോഷങ്ങള് വേണ്ടെന്നുവയ്ക്കാന് അവര് തയ്യാറാകുന്നില്ല.
