തിരുവനന്തപുരം: മുന് ഡി.ജി.പി ടി.പി സെന്കുമാറിന്റെ പരാതിയില് മാധ്യമപ്രവര്ത്തകര്ക്കെതിരെ കേസെടുത്ത നടപടി പിന്വലിക്കുമെന്ന സൂചനയുമായി മുഖ്യമന്ത്രി പിണറായി വിജയന്. കള്ളക്കേസ് എടുത്ത നടപടി മാധ്യമവാര്ത്തകളിലൂടെ അറിഞ്ഞെന്നും അടിയന്തര റിപ്പോര്ട്ട് നല്കാന് ഡി.ജി.പിക്ക് നിര്ദേശം നല്കിയതായും മുഖ്യമന്ത്രി നിയസഭയില് അറിയിച്ചു. അടിയന്തര പ്രമേയ നോട്ടീസില് മേല് ചര്ച്ച നടക്കുന്നതിനിടെയാണ് പ്രതിപക്ഷമാണ് വിഷയം സഭയില് ഉന്നയിച്ചത്.
പോലീസ് നടപടി അസാധാരണമാണെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. ചിലയിടത്ത് പോലീസ് അമിതാവേശം കാണിക്കുമ്പോള് മറ്റ് ചിലടത്ത് പോലീസ് മെല്ലെപ്പോക്കാനാണെന്ന് അടിയന്തര പ്രമേയത്തിന് നോട്ടീസ് നല്കവവേ എ.വിന്സെന്റ് ആരോപിച്ചു.
മുന് ഡി.ജി.പി എന്ന സ്വാധീനം കൂടി ഈ കേസെടുക്കാന് സെന്കുമാര് പോലീസുകാര്ക്കു മേല് ചുമത്തിയോ എന്ന് സംശയമുണ്ടെന്ന് പറഞ്ഞ മുഖ്യമന്ത്രി, സെന്കുമാറിനെ ഇപ്പോഴെങ്കിലും നിങ്ങള്ക്ക് മനസ്സിലായല്ലോ എന്ന് പ്രതിപക്ഷത്തെ പരിഹസിക്കാനും മറന്നില്ല.
തിരുവനന്തപുരം പ്രസ് ക്ലബില് നടത്തിയ വാര്ത്താസമ്മേളനത്തില് സെന്കുമാറിനോട് ചോദ്യം ചോദിച്ചതിനെ തുടര്ന്നുണ്ടായ ബഹളത്തിന്റെ പേരിലാണ് കലാപ്രേമി എഡിറ്റര് കടവില് റഷീദിനെതിരെ കേസെടുത്തത്. മാധ്യമപ്രവര്ത്തകരുടെ വാട്സ്ആപ് ഗ്രൂപ്പില് സെന്കുമാറിനെതിരെ പ്രതിഷേധിച്ച് സന്ദേശമയച്ചതിനാണ് ഏഷ്യാനെറ്റ് ന്യൂസ് കോര്ഡിനേറ്റിംഗ് എഡിറ്റര് പി.ജി സുരേഷ് കുമാറിനെതിരെ ഗൂഢാലോചന കുറ്റം ചുമത്തി കേസെടുത്തത്. ഇതിനെതിരെ പ്രതിപക്ഷ നേതാക്കള് പരസ്യ പ്രതികരണവുമായി രംഗത്തെത്തിയിരുന്നു.
