സോഷ്യല് മീഡിയയില് കഴിഞ്ഞ ദിവസം വൈറലായ ഒരു വാര്ത്തയായിരുന്നു യുപിഎസ്സി പരീക്ഷ വിജയിച്ച ബസ് കണ്ടക്ടറുടേത്. ബാംഗ്ലൂരിലെ യുപിഎസ്സി പരീക്ഷ വിജയിച്ച ബസ് കണ്ടക്ടര് എന്നതായിരുന്നു ആ വാര്ത്ത. തിരക്കേറിയ ജോലിക്കിടെ ദിവസവും അഞ്ചു മണിക്കൂര് മാത്രം പഠിച്ച് സിവില് സര്വീസ് പ്രിലിമിനറി, മെയിന് പരീക്ഷകള് വിജയിച്ചത് എന്സി മധുവെന്ന ബസ് കണ്ടക്ടറാണെന്നതായിരുന്നു വാര്ത്ത.
നടനും രാഷ്ട്രീയക്കാരനുമായ ശത്രുഘ്നന് സിന്ഹ ഉള്പ്പെടെ പല പ്രമുഖരും ഈ വാര്ത്ത ട്വീറ്റ് ചെയ്യുകയും ചെയ്തു. എന്നാല് ഇതു തട്ടിപ്പായിരുന്നെന്നും എന്സി മധുവെന്നയാള് യുപിഎസ്സി പരീക്ഷ വിജയിച്ചിട്ടില്ലെന്നുമാണ് ഇപ്പോള് പുറത്തു വരുന്ന വിവരം. ബാംഗ്ലൂരിലെ ഒരു മാധ്യമസ്ഥാപനം നടത്തിയ അന്വേഷണത്തിലാണ് മധുവിന്റെ തട്ടിപ്പ് പുറത്ത് വന്നത്.
പ്രിലിമിനറിയും മെയിനും കഴിഞ്ഞ് അഭിമുഖ പരീക്ഷയ്ക്ക് വിളിക്കപ്പെട്ടവരുടെ പേരു വിവരങ്ങളാണ് ലോജിക്കല് ഇന്ത്യന് എന്ന മാധ്യമ സ്ഥാപനം പരിശോധിച്ചത്. തന്റേതെന്ന രീതിയില് മധു കാണിച്ച മാര്ക്ക് ലിസ്റ്റ് മധുകുമാരി എന്നൊരാളുടേത് ആണെന്നാണ് തെളിഞ്ഞത്. ബാംഗ്ലൂര് മെട്രോപൊളിറ്റന് ട്രാന്സ്പോര്ട്ട് കോര്പ്പറേഷനിലെ (ബിഎംടിസി) ബസ് കണ്ടക്ടറാണ് മധു.
