ആസിഫ് അലി നായകനായ കെട്ട്യോളാണ് മാലാഖയിലെ സ്ലീവാച്ചന്റെ മാലാഖ റിന്സിയായി മലയാളി പ്രേക്ഷകരുടെ ഇഷ്ടം നേടിയ താരമാണ് വീണ നന്ദകുമാര്. മലയാളികളുടെ മനസ് അഭിനയത്തിലൂടെ കീഴടക്കിയ വീണ ചെറുപ്പത്തില് തനിക്ക് സൗന്ദര്യമില്ലാത്തതിനാല് തനിക്ക് പ്രണയം തോന്നിയവര് ആരും തന്നെ തിരിഞ്ഞു നോക്കിയിട്ടില്ലെന്ന് തുറന്നു പറയുകയാണ്. തന്റെ ആദ്യ പ്രണയത്തിന്റെ ഓര്മയെല്ലാം സുഖകരമല്ലാത്ത വണ്വേ സ്റ്റോറികളായിരുന്നുവെന്നാണ് വീണ പറയുന്നത്.
'' അയ്യോ ഈ കുഞ്ഞ് ഇതെന്താ ഇങ്ങനെ, ഇതിന് അമ്മയുടെ സൗന്ദര്യമൊന്നും കിട്ടിയിട്ടില്ലല്ലോ'' എന്റെ ചെറുപ്പത്തില് ഞാന് ഏറ്റവും കൂടുതല് കേട്ടിട്ടുള്ള വാക്കുകളാണിത്. അത്ര മനസ്സു വേദനിച്ചിട്ടുണ്ട്. അതു സത്യവുമായിരുന്നു. ഇന്ന് കാണുന്ന ഈ വീണയായിരുന്നില്ല പതിനേഴ് വയസ്സു വരെ. വല്ലാതെ മെലിഞ്ഞ്, ഒട്ടിയ കവിളുകളൊക്കെയായി, ഒരു ചെറിയ പെണ്കുട്ടി. എന്റെ അമ്മയാണെങ്കില് അതിസുന്ദരി. കാണുന്നവരൊക്കെ ഇങ്ങനെ പറയുമ്പോള് എന്റെ അമ്മ പറയും, കുറച്ചു കാലം കഴിയുമ്പോള് നീ നല്ല സുന്ദരിയാകുമെന്ന്. പക്ഷേ, ആ കുറച്ചു കാലത്തിന് വളരെ നീളം കൂടുതലായിരുന്നു.
എന്റെ ആദ്യ പ്രണയങ്ങളെല്ലാം ആ സൗന്ദര്യമില്ലായ്മയില് മുങ്ങിപ്പോയി. സ്കൂള് കാലഘട്ടത്തിലാണല്ലോ ആണ്കുട്ടികളോട് ക്രഷ്, ഇന്ഫാക്ച്വേഷന് ഇങ്ങനെ പല പേരുകളില് നമ്മള് വിളിക്കുന്ന പ്രണയം തോന്നുന്നത്. പലരോടും ഞാനതു തുറന്നു പറഞ്ഞപ്പോള് നെഗറ്റീവായിരുന്നു മറുപടി. ചിലരോട് ഞാന് പറയാതെ ഉള്ളില് തന്നെ വച്ചു. കാരണം അവര്ക്കും മനസ്സില് അതിസുന്ദരിയായ പെണ്കുട്ടിയാണെങ്കിലോ? അങ്ങനെ എന്റെ ആദ്യ പ്രണയത്തിന്റെ ഓര്മയെല്ലാം സുഖകരമല്ലാത്ത വണ്വേ സ്റ്റോറികളായി മാറി. പക്ഷേ, എനിക്ക് പതിനേഴ് വയസ്സായപ്പോഴേക്കും അമ്മയുടെ വാക്കുകള് പോലെ ഒരുപാട് മാറ്റങ്ങള് വന്നു. എന്നെ ആണ്കുട്ടികള് ഇഷ്ടത്തോടെ നോക്കാന് തുടങ്ങിയത് ഞാന് അറിഞ്ഞു. പക്ഷേ, ആദ്യ പ്രണയം എന്ന സുഖമുള്ള ഓര്മ സ്കൂള് കാലത്തു തന്നെ തകര്ന്നു പോയില്ലേ.
കഥയുടെ ട്വിസ്റ്റ് അവിടെയല്ല. പണ്ട് എന്റെ പ്രണയം നിരസിച്ച പയ്യന് എനിക്ക് പതിനെട്ടു വയസ്സായപ്പോള് പ്രണയാഭ്യര്ഥനയുമായി വന്നു. സൗന്ദര്യം മാത്രം നോക്കിയല്ല പ്രണയിക്കേണ്ടത് എന്ന് മറുപടി കൊടുത്ത് അവനെ പറഞ്ഞു വിട്ടു. പിന്നെ, പല അവസരങ്ങളിലായി പണ്ട് ഞാനിഷ്ടപ്പെട്ടിരുന്ന പലരും പ്രപ്പോസ് ചെയ്തിട്ടുണ്ട്. ഉള്ളില് സന്തോഷിച്ചെങ്കിലും സൗന്ദര്യത്തിന്റെ തുലാസില് പ്രണയത്തെ അളന്നവരോടെല്ലാം ഒന്നേ പറയാനുണ്ടായിരുന്നുള്ളൂ. ഗുഡ്ബൈ...'' - വീണ പറയുന്നു
