ന്യൂഡല്ഹി: യുഎസ് പ്രസിഡന്റ് ഡൊണാള്ഡ് ട്രംപിന്റെ ഇന്ത്യ സന്ദര്ശനത്തിനായി ബന്ധപ്പെട്ട് വലിയ സൈനിക സുരക്ഷയാണ് ഒരുക്കിയിട്ടുള്ളത്. എന്നാല് ട്രംപ് താജ്മഹല് സന്ദര്ശിക്കാനെത്തുമ്പോള് ആഗ്രയില് കുരങ്ങുകള് സൃഷ്ടിക്കുന്ന ദുരിതത്തെ കുറിച്ചോര്ത്ത് അധികൃതരും സുരക്ഷാ സേനയും ആശങ്കയിലാണ്.
പിന്നാലെ ഇതിനെ നേരിടാന് അഞ്ച് ലാംഗ്വാര് ഇനത്തില്പ്പെട്ട (വലിയ വാലുകള് ഉള്ള) കുരങ്ങുകളെ സുരക്ഷക്കായി ഒരുക്കിയിരിക്കുകയാണ് സുരക്ഷ ഏജന്സികള്. പ്രദേശത്തെ വാനരശല്യം ഇല്ലാതാക്കുകയാണ് ഇവയെ നിയോഗിച്ചതിലൂടെ ലക്ഷ്യമിടുന്നത്. ഡൊണാള്ഡ് ട്രംപും ഭാര്യ മെലേന ട്രംപും ഫെബ്രുവരി 24 നാണ് താജ് മഹല് സന്ദര്ശിക്കുന്നതിനായി എത്തുന്നത്.
രണ്ട് ദിവസത്തെ സന്ദര്ശനത്തിനായി ഫെബ്രുവരി 24നാണ് ട്രംപ് ഇന്ത്യയിലെത്തുന്നത്. ട്രംപിന്റെ സന്ദര്ശനത്തോടനുബന്ധിച്ച് ഗുജറാത്തിലെ ചേരികള് മതില് കെട്ടി മറക്കുന്ന നടപടികള് വിവാദമായിരുന്നു. അഹമ്മദാബാദില് പുതുതായി നിര്മ്മിച്ച മൊട്ടേര സ്റ്റേഡിയത്തിലാണ് ട്രംപ് എത്തുന്നത്.
