ന്യൂഡല്ഹി: ഇന്ത്യയിലെ നിരത്തുകളില് ഹൈവേ - ട്രാഫിക്ക് പോലീസുകാര്ക്ക് കൈക്കൂലി ഇനത്തില് ട്രക്ക് ഡ്രൈവര്മാരും ഫ്ളീറ്റ് ഓണര്മാരും ചേര്ന്ന് വര്ഷംതോറും നല്കുന്നത് 48,000 കോടി രൂപ. ഗതാഗത - നികുതി വകുപ്പിലെ ഉദ്യോഗസ്ഥരെ കൂടാതെ നല്കുന്ന തുകയാണ് ഇതെന്നും ഒരു പഠനം വ്യക്തമാക്കുന്നു. രാജ്യത്തെ പത്ത് പ്രധാന ഗതാഗത ഹബ്ബുകളും സഞ്ചാര പഥങ്ങളും കേന്ദ്രീകരിച്ച് നടത്തിയിരിക്കുന്ന പഠനത്തില് പങ്കെടുത്ത 82 ശതമാനം പേരും കൈക്കൂലി നല്കുന്നതായി പ്രതികരിച്ചു.
1217 ട്രക്ക് ഡ്രൈവര്മാരും 110 ഫ്ളീറ്റ് ഓണര്മാരുമാണ് പഠനത്തില് പങ്കെടുത്തത്. ഓരോ ട്രിപ്പിനും ശരാശരി 1257 രൂപ വീതം ഒരു ട്രക്കിന് നല്കേണ്ടി വരുന്നതായിട്ടാണ് വിവരം. ട്രാഫിക്/ഹൈവേ പോലീസുകാര്ക്ക് തങ്ങള് കൈക്കൂലി നല്കുന്നതായി ഡല്ഹിയിലെ 84 ശതമാനം ഡ്രൈവര്മാരും സമ്മതിക്കുകയും ചെയ്തിട്ടുണ്ട്. ഇന്ത്യയില് മൊത്തമായി മൂന്നില് രണ്ട് ( 67 ശതമാനം) ട്രക്കുകളും കൈക്കൂലി നല്കുന്നുണ്ട്. ഡ്രൈവിംഗ് ലൈസന്സ് പുതുക്കുന്ന കാര്യത്തിലാണെങ്കില് പോലും തങ്ങള് കൈക്കൂലി നല്കാറുണ്ടെന്നാണ് 78 ശതമാനം ഡല്ഹി ട്രക്ക് ഉടമകള് പറയുന്നത്. ലൈസന്സ് പുതുക്കലിന് ഏറ്റവും കൂടുതല് കൈക്കൂലി കാര്യത്തിലും ഡല്ഹിയാണ് മുന്നില്. ഡല്ഹിയില് മാത്രം ശരാശരി 2,025 രൂപ വീതം നല്കുന്നുണ്ട്. ഇക്കാര്യത്തില് മാത്രം ട്രക്ക് ഡ്രൈവര്മാര് മൊത്തം നല്കുന്നത് 1789 രൂപയാണ്.
തെരഞ്ഞെടുക്കപ്പെട്ട ട്രാന്സ്പോര്ട്ട് ഹബ്ബുകളില് ഏറ്റവും കൂടുതല് ക്കൈൂലി ഒഴുകുന്നത് ഗുവാഹട്ടിയിലാണ്. 97.5 ശതമാനം ഡ്രൈവര്മാരും തങ്ങള് കൈക്കൂലി കൊടുക്കുന്നതായി സമ്മതിച്ചിട്ടുണ്ട്. രണ്ടാം സ്ഥാനത്ത് ചെന്നൈയാണ്. ഇവിടെ 89 ശതമാനം ട്രക്ക് ഡ്രൈവര്മാരും കൈക്കൂലി നല്കുന്നു. ഡല്ഹിയിലാകട്ടെ ഇത് 84.4 ശതമാനമാണ്. ആര്ടിഒ ഉദ്യോഗസ്ഥരും കൈക്കൂലി കണക്കില് പെട്ടിട്ടുണ്ട്. ഇക്കാര്യത്തില് മുന്നില് ബംഗലുരുവാണ്. 94 ശതമാനവും ഈ രീതിയിലുള്ള അഴിമതി ബംഗലുരുവിലാണ്. 93 ശതമാനവുമായി ഗുവാഹട്ടി ഇവിടെയുമുണ്ട്. രണ്ടാം സ്ഥാനത്താണെന്ന് മാത്രം. വാഹന റജിസ്ട്രേഷനുമായി ബന്ധപ്പെട്ട് കൈക്കൂലി നല്കുന്നതായി 43 ശതമാനം ഫ്ളീറ്റ് ഓണര്മാരും പ്രതികരിച്ചു. ശരാശരി 1360 രൂപ വെച്ചാണ് വാഹന റജിസ്ട്രേഷന് നല്കുന്ന കൈക്കൂലി.
