കൊല്ക്കത്ത: ലോകത്തുടനീളമായി കൊറോണാ വൈറസിന്റെ ഭീതി പരക്കുകയും ഇന്ത്യയില് 29 പേര്ക്ക് രോഗം സ്ഥിരീകരിക്കുകയും ചെയ്ത സാഹചര്യത്തില് കൊറോണയെയും പ്രചരണ ആയുധമാക്കി ബിജെപി. രോഗം പടരാതിരിക്കാന് ബംഗാളില് ബിജെപി പ്രവര്ത്തകര് േവിതരണം ചെയ്ത മാസ്ക്കിലും നരേന്ദ്ര മോഡിയുടെ പേര്. കഴിഞ്ഞ ദിവസമായിരുന്നു അടുത്ത തെരഞ്ഞെടുപ്പില് ബിജെപി ബംഗാളില് അധികാരത്തില് എത്തുമെന്ന് ആഭ്യന്തരമന്ത്രി അമിത് ഷാ വ്യക്തമാക്കിയത്.
'' സേവ് ഫ്രം കൊറോണ വൈറസ് ഇന്ഫെക്ഷന്, മോഡി ജി, ബിജെപി(ഡബ്ല്യൂ ബി)'' എന്നാണ് മാസ്കില് രേഖപ്പെടുത്തിയിരിക്കുന്നത്. താമരയുടെ ചിത്രവുമുണ്ട്. അതേസമയം മോഡിയുടെയും ബിജെപിയുടേയും നാമം ആലേഖനം ചെയ്ത മാസ്ക്കുമായി ബന്ധമില്ലെന്നാണ് ബിജെപി മീഡിയാ സെല് ഇന്ചാര്ജ്ജ് വ്യക്തമാക്കിയിരിക്കുന്നത്. പാര്ട്ടി ഇത്തരമൊരു പരിപാടി എടുത്തിട്ടില്ലെന്നും ആരെങ്കിലും ഇങ്ങിനെ ചെയ്തിട്ടുണ്ടെങ്കില് അത് അവരുടെ സ്വന്തം പേരിലുള്ള പരിപാടിയാണെന്നും ബിജെപി മീഡിയാസെല് വ്യക്തമാക്കുന്നു.
നേരത്തേ ബംഗാളില് ബിജെപിയുടെ വോട്ടുശതമാനം കൂടി വരികയാണെന്നും അടുത്ത തെരഞ്ഞെടുപ്പില് തൃണമൂല് കോണ്ഗ്രസിന്റെ വാഴ്ചയും മമതാബാനര്ജിയുടെ കുടുംബവാഴ്ചയും അവസാനിപ്പിച്ച് ബിജെപി അധികാരത്തില് എത്തുമെന്ന് അമിത് ഷാ വ്യക്തമാക്കിയിരുന്നു. കൊല്ക്കത്തയില് കോവിഡ് 19 ബാധിച്ചെന്ന സംശയമുള്ള മൂന്ന് കേസുകള് റിപ്പോര്ട്ട് ചെയ്തിട്ടുണ്ട്. ഇവരെ വിമാനത്താവള ടെര്മിനലില് തന്നെ പ്രത്യേക ഐസൊലേഷന് ക്യാമ്പ് സജ്ജമാക്കി പാര്പ്പിച്ചിരിക്കുകയാണ്. അടുത്തിടെ തായ്ലന്റ് സന്ദര്ശിച്ച ഡംഡമില് നിന്നുള്ള ആള്ക്കും രണ്ടു സുഹൃത്തുക്കള്ക്കുമാണ് രോഗബാധ സംശയിക്കുന്നത്. 92 ഐസൊലേഷന് ബഡുകള് ബംഗാള് ക്രമീകരിച്ചിട്ടുണ്ട്.
ഇന്ത്യയില് ഇതുവരെ 29 പേര്ക്കാണ് കൊറോണ സ്ഥിരീകരിച്ചിരിക്കുന്നത്. ഇവരില് 16 പേര് ഇറ്റാലിയന് വിനോദസഞ്ചാരികളാണ്. ഇതോടെ എല്ലാ അന്താരാഷ്ട്ര വിമാനത്താവളങ്ങളിലും യാത്രക്കാരെ കര്ശനമായ പരിശോധനയ്ക്ക് വിധേയമാക്കാന് ആരോഗ്യ മന്ത്രാലയം നിര്ദേശം നല്കിയിരിക്കുകയാണ്. ഡല്ഹി മായൂര് വിഹാറിലെ ഒരു 45 കാരനും ഇയാളുടെ ആഗ്രയിലെ ആറ് ബന്ധുക്കളുമാണ് അസുഖബാധിതര്. എല്ലാവരും സഫ്ദര്ജംഗ് ആശുപത്രിയില് ചികിത്സയിലാണ്. ഹൈദരാബാദില് നിന്നുള്ള ഒരു 24 കാരന് രോഗബാധ സ്ഥിരീകരിച്ചിരുന്നു. ചൈനയ്ക്ക പുറത്ത് 12,600 പേര്ക്കാണ് വൈറസ് ബാധ സ്ഥിരീകരിച്ചിരിക്കുന്നത്. 214 പേര് മരണമടയുകയും ചെയ്തു. ചൈനയില് മരണസംഖ്യ 3012 ആണ്.
