ഭോപ്പാല്: എംഎല്എ മാരുടെ മുങ്ങലും മാറിനില്ക്കലുമായി രാഷ്ട്രീയ കളികളില് ആടിയുലയുന്ന മദ്ധ്യപ്രദേശ് രാഷ്ട്രീയത്തില് വരും ദിവസം ഏറെ നിര്ണ്ണായകം. ജ്യോതിരാദിത്യ സിന്ധ്യേയും വിമതസ്വരം ഉയര്ത്തിതോടെ സംസ്ഥാന സര്ക്കാര് ആടിയുലയുന്ന മദ്ധ്യപ്രദേശില് ബിജെപി മേല്ക്കൈ നേടുകയാണ്. സിന്ധ്യേ പ്രധാനമന്ത്രി നരേന്ദ്രമോഡിയുമായി ചര്ച്ച നടത്താന് അദ്ദേഹത്തിന്റെ വസതിയില് എത്തി.
അമിത്ഷായും ഉടന് എത്തുന്നതോടെ മൂവരും തമ്മിലുള്ള ചര്ച്ച തുടങ്ങും. കോണ്ഗ്രസും അടിയന്തിര യോഗം വിളിച്ചിരിക്കുകയാണ്. പ്രശ്നം രൂക്ഷമായ സ്ഥിതിയില് എത്തി നില്ക്കേ രാഹുല്ഗാന്ധി മുതിര്ന്ന നേതാക്കളുടെ യോഗം വിളിച്ചു. സിന്ധ്യേയെ അനുനയിപ്പിക്കാനുള്ള ശ്രമങ്ങളും തുടരുകയാണ്. എന്നാല് സിന്ധ്യേയുമായി കോണ്ഗ്രസ് നേതാക്കള്ക്ക് ബന്ധപ്പെടാനായില്ല. കെസി വേണുഗോപാലിന്റെ നേതൃത്വത്തിലുള്ള അനുരഞ്ജന ശ്രമങ്ങളും നടന്നിരുന്നു. എന്നാല് ഒന്നും ഫലപ്രദമായിട്ടില്ല. രാജ്യസഭാ നാമനിര്ദേശത്തിന്റെ സമയം മാര്ച്ച് 13 ന് അവസാനിക്കാനിരിക്കെ ജ്യോതിരാദിത്യ സിന്ധ്യേയെ ബിജെപിയിലേക്ക് മുന് മുഖ്യമന്ത്രി ശിവ്രാജ് സിംഗ് ചൗഹാന് ക്ഷണിച്ചിരുന്നു.
വിമത എംഎല്എമാര് മുങ്ങിയതോടെ കോണ്ഗ്രസിനെ മറികടന്ന് ബിജെപി മേല്ക്കൈ നേടുകയാണെന്നാണ് സൂചന. പ്രതിസന്ധി പരിഹരിക്കാന് മദ്ധ്യപ്രദേശില് കോണ്ഗ്രസ് നേതാക്കള് രാത്രി ഏറെ വൈകിയും ചര്ച്ച നടത്തി. സിന്ധ്യയോടൊപ്പം 17 എംഎല്എ മാര് കൂടി ബംഗലുരുവില് എത്തിയതോടെ മുഖ്യമന്ത്രി കമല്നാഥ് സീനിയര് കോണ്ഗ്രസ് നേതാക്കളായ ദിഗ് വിജയ് സിംഗ്, രാജ്യസഭാ എംപി വിവേക് തന്ഖ, മുന് പ്രതിപക്ഷ നേതാവ് അജയ് സിംഗ് ,10 ക്യാബിനറ്റ് മന്ത്രിമാര് എന്നിവര് അടച്ചിട്ട മുറിയില് ചര്ച്ച നടത്തി.
നിലവില് 230 അംഗ സംഖ്യയുള്ള മദ്ധ്യപ്രദേശ് നിയമസഭയില് മരണത്തെ തുടര്ന്ന് ജൗരാ മണ്ഡലത്തിലെ കോണ്ഗ്രസ് എംഎല്എ ബന്വാരിലാല്ശര്മ്മ ഉത്വാളിലെ ബിജെപി എംഎല്എ മനോഹര് ഉത്വാള് എന്നിവരുടെ സീറ്റുകളാണ് ഒഴിഞ്ഞു കിടക്കുന്നത്. സഖ്യ എംഎല്എമാരുമായി ചേര്ന്ന് ഭരണം നടത്തുന്ന കോണ്ഗ്രസിന് ഒറ്റയ്ക്ക് 114 സീറ്റുകളും ബിജെപിയ്ക്ക് 107 സീറ്റുകളുമാണ് ഉള്ളത്. 17 എംഎല്എ മാര് പുറത്ത് പോയാല് കോണ്ഗ്രസിന്റെ നില 97 എംഎല്എമാരായി ചുരുങ്ങും
നിലവിലെ സാഹചര്യത്തില് കോണ്ഗ്രസിന് രണ്ട് എംപി മാരെ രാജ്യസഭയിലേക്ക് അയയ്ക്കുക പ്രയാസമുള്ള കാര്യമല്ല. എന്നാല് സിന്ധ്യേയുടെ നേതൃത്വത്തിലുള്ള 17 പേരും ഒരാഴ്ചയായി ഇതുവരെ ബന്ധപ്പെടാന് കഴിഞ്ഞിട്ടില്ലാത്ത രണ്ടു പേരും ഉള്പ്പെടെ 19 എംഎല്എമാരുമായി കോണ്ഗ്രസിന് ബന്ധപ്പെടാനായിട്ടില്ല. ഇതോടെ കോണ്ഗ്രസിന്റെ അവസ്ഥ 95 ആയി കുറയും. സഖ്യകക്ഷികളിലെ ഏഴു പേര് കൂടി ചേര്ന്നാലും കോണ്ഗ്രസ് 102 പേരുമായി ബിജെപിയുടെ പിന്നിലാകും.
അതേസമയം രണ്ട് ബിജെപി എംഎല്എ മാര് കൂടി രാജിയുമായി മുഖ്യമന്ത്രി കമല്നാഥിനരികില് എത്തിയിട്ടുള്ളതായി വിവരമുണ്ട്. ഇവര് അയോഗ്യരായാല് സഭയിലെ അംഗസംഖ്യ 226 ആകും. 19 കോണ്ഗ്രസ് വിമതര് പോയാലും സീറ്റ് എണ്ണം 207 ആകും. ഇതോടെ കേവല ഭൂരിപക്ഷം 104 ആകും. ഇങ്ങിനെ സംഭവിക്കുന്നില്ലെങ്കില് ബിജെപിയ്ക്ക് 105 എംഎല്എമാരും കോണ്ഗ്രസിന് 102 എംഎല്എമാരുമാകും. മാര്ച്ച് 26 നാണ് വോട്ടെടുപ്പ് എന്നിരിക്കെ ഇനിയുള്ള രാഷ്ട്രീയ നീക്കങ്ങള് ഏറെ നിര്ണ്ണായകമാകും.
