തിരുവനന്തപുരം: മതംമാറി ഐ.എസില് ചേര്ന്ന മലയാളികളായ ഫാത്തിമ (നിമിഷ), ആയിഷ (സോണിയ സെബാസ്റ്റ്യന്) എന്നിവര്ക്കു നാട്ടില് തിരിച്ചെത്തണമെങ്കില് തരണം ചെയ്യേണ്ടതു ദുര്ഘടമായ നിയമനടപടികള്. ഇപ്പോള് അഫ്ഗാന് സൈന്യത്തിന്റെ കസ്റ്റഡിയിലുള്ള ഇരുവരും അവിടുത്തെയും ഇന്ത്യയിലെയും നിയമ നടപടികള്ക്ക് വിധേയമാകേണ്ടിവരും.രണ്ടു രാജ്യങ്ങളുടെയും രാജ്യദ്രോഹക്കുറ്റങ്ങളാണു നേരിടേണ്ടിവരിക.
ഇന്ത്യയിലേക്ക് തിരിച്ചുവരാന് ആഗ്രഹമുണ്ടെന്ന് ഇവര് പറയുന്നതിന്റെ വീഡിയോ ദൃശ്യങ്ങള് കഴിഞ്ഞ ദിവസം പുറത്തുവന്നിരുന്നു. ഇതു വിവിധ ഇന്റലിജന്സ് ഏജന്സികള് വിശദമായി പരിശോധിക്കുകയാണ്. ഇസ്ലാമിക ജീവിതം ആഗ്രഹിച്ചാണ് അഫ്ഗാനിസ്ഥാനിലേക്കു പോന്നതെന്നും കാര്യങ്ങള് പ്രതീക്ഷിച്ചതുപോലെയായില്ലെന്നും ഇവര് വീഡിയോയില് വ്യക്തമാക്കുന്നുണ്ട്. അമ്മയെ കാണാന് ആഗ്രഹമുണ്ടെന്നും ശിക്ഷിക്കപ്പെടുമോ എന്ന ഭയമുണ്ടെന്നും ജയിലില് അടയ്ക്കില്ലെങ്കില് അമ്മയെ കാണാന് വരണമെന്നുണ്ടെന്നും നിമിഷ ഫാത്തിമ പറയുന്നു.
നിമിഷയുടെ ഭര്ത്താവ് യാഹിയ (ബെക്സണ്) ആയിഷയുടെ ഭര്ത്താവ് അബ്ദുള് റഷീദ് അബ്ദുള്ള എന്നിവര് കൊല്ലപ്പെട്ടതായി ഇവര് വ്യക്തമാക്കിയിട്ടുണ്ട്. ഭര്ത്താക്കന്മാരുടെ മരണശേഷം ഇവര് കീഴടങ്ങുകയായിരുന്നു. ഐ.എസിലുണ്ടായിരുന്ന പ്രതീക്ഷ ഇപ്പോഴില്ലെന്നും ഇനി തിരിച്ചുപോകില്ലെന്നും വീഡിയോയില് സോണിയ പറയുന്നു. അതേസമയം, ഇരുവരുടെയും വീഡിയോ തെളിയിക്കുന്നത് ലൗ ജിഹാദ് ഇന്ത്യയില് നടക്കുന്നുവെന്ന യാഥാര്ഥ്യത്തിന്റെ തെളിവാണെന്ന് ഇന്റലിജന്സ് കേന്ദ്രങ്ങള് ചൂണ്ടിക്കാണിക്കുന്നു. നേരത്തെ കേന്ദ്ര സര്ക്കാര് പുറത്തുവിട്ട റിപ്പോര്ട്ടില് ലൗ ജിഹാദ് ഇല്ലെന്നായിരുന്നു അവകാശപ്പെട്ടിരുന്നത്.
അവളുടെ സ്വരത്തില് രാജ്യസ്നേഹമുണ്ട്: നിമിഷയുടെ അമ്മ ബിന്ദു
തിരുവനന്തപുരം: "നാലു വര്ഷത്തിനുശേഷമാണ് അവളുടെ സ്വരം കേള്ക്കുന്നത്. പൊന്നുമോളെ കാണാന് ആഗ്രഹമുണ്ട്. രാജ്യസ്നേഹമുള്ളവളാണ്. കേന്ദ്ര സര്ക്കാര് കനിയണം. അവളെ എനിക്കു തിരികെ ലഭിക്കാന്"-നിമിഷ ഫാത്തിമയുടെ അമ്മ ബിന്ദുവിന്റെ വാക്കുകളാണിവ.
ഇന്നല്ലെങ്കില് നാളെ അവള് തിരിച്ചെത്തുമെന്ന് ഉറപ്പുണ്ടായിരുന്നു. നിമിഷയുടെ വീഡിയോ കണ്ടപ്പോള് ശുഭകരമായ സന്ദേശമായാണ് തോന്നിയത്. ദൈവം എല്ലാം ശുഭകരമാക്കും. അവള് തെറ്റുതിരുത്തിയ സ്ഥിതിക്ക് മടങ്ങിവരാന് എല്ലാവരും സഹായിക്കണം. ആവശ്യമെങ്കില് കേന്ദ്ര ആഭ്യന്തരമന്ത്രിയെ നേരില് കാണും. ദൈവം മുന്കൈയെടുത്താലേ എല്ലാം സാധിക്കൂ. അവളെ തിരികെയെത്തിക്കാന് വേണ്ടതു ചെയ്യണമെന്നാവശ്യപ്പെട്ട് രണ്ടുമാസം മുന്പ് കേന്ദ്ര സര്ക്കാരിനും അഫ്ഗാനിസ്ഥാന് സര്ക്കാരിനും ഇ-മെയില് അയച്ചിരുന്നു. മാനുഷിക പരിഗണന മുന്നിര്ത്തി അഫ്ഗാനിലുള്ള ഇന്ത്യക്കാരെ തിരിച്ചെത്തിക്കണമെന്നാണ് തന്റെ ആവശ്യം. നിമിഷയുടെ വീഡിയോ പുറത്ത് വന്നത് ആശ്വാസം പകരുന്നു. എല്ലാ കാര്യങ്ങളും പോസിറ്റീവായി നടക്കുമെന്നുറപ്പുണ്ടെന്നും ബിന്ദു പറഞ്ഞു.
