ന്യൂഡല്ഹി: ലോക്ക്ഡൗണിന്റെ പശ്ചാത്തലത്തില് പുതിയതായി കൊണ്ടുവരുന്ന തൊഴില് നിയമത്തിനെതിരേ മെയ് 22 ന് ദേശീയ പണിമുടക്കിന് ട്രേഡ് യൂണിയനുകളുടെ ആഹ്വാനമെന്ന് റിപ്പോര്ട്ട്. എട്ടു മണിക്കൂറിന് പകരം 12 മണിക്കൂര് വരെ ജോലി ചെയ്യേണ്ടി വരുന്നത് ഉള്പ്പെടെയുള്ള കാര്യങ്ങള് വിവിധ സംസ്ഥാനങ്ങള് ആസൂത്രണം ചെയ്യുന്ന സാഹചര്യത്തില് 10 തൊഴിലാളി സംഘടനകള് വരുന്ന സംയുക്ത സംഘടനയാണ് പണിമുടക്കിന് ആഹ്വാനം ചെയ്തിരിക്കുന്നത്. ഇത്തരം അട്ടിമറികള്ക്കെതിരേ അന്താരാഷ്ട്ര തൊഴില് സംഘടനയെ സമീപിക്കുമെന്നാണ് ഇവര് പറയുന്നത്.
ദേശീയമാധ്യമങ്ങളാണ് പണിമുടക്ക് സംബന്ധിച്ച വാര്ത്ത പുറത്തുവിട്ടിരിക്കുന്നത്. അന്ന് ദേശീയ നേതാക്കള് രാജ്ഘട്ടില് ഉപവാസവും ഇരിക്കും. മെയ് 14 ന് ചേര്ന്ന യോഗത്തിലാണ് സംയുക്ത പണിമുടക്കിന് തീരുമാനം എടുത്തതെന്നാണ് വാര്ത്തയില് പറയുന്നത്. കഴിഞ്ഞ മൂന്ന് വര്ഷമായി ഉത്തര്പ്രദേശ് അനേകം തൊഴില് നിയമങ്ങള് മരവിപ്പിച്ചു. ഇതിന് പിന്നാലെ മദ്ധ്യപ്രദേശ് ജോലിക്കെടുത്ത ഉടന് പിരിച്ചുവിടാന് കമ്പനികള്ക്ക അനുവാദം നല്കി. ഗുജറാത്ത്, ഹിമാചല്പ്രദേശ്, ഹരിയാന, ഒഡീഷ, മഹാരാഷ്ട്ര, രാജസ്ഥാന്, ബീഹാര്, പഞ്ചാബ് എന്നിവിടങ്ങളില് തൊഴില് നിയമം എട്ടില് നിന്നും 12 ആക്കി ഉയര്ത്തി തുടങ്ങിയ കാര്യങ്ങള് പ്രസ്താവനയില് പറയുന്നു.
കോവിഡ് മഹാമാരി എന്ന കുടയ്ക്ക് കീഴില് സര്ക്കാര് ഓരോ പുതിയ തീരുമാനം എടുത്ത് ലോക്ക്ഡൗണിന്റെ ദുരിതത്തില് കഴിയുന്ന കൂലിപ്പണിക്കാരെയും സാധാരണക്കാരേയും ദൈനംദിനം ആക്രമിക്കുകയാണെന്നും പറയുന്നു. ഐഎന്ടിയുസിയും സിഐടിയുവും യുടിയുസിയും എല്പിഎഫും ഉള്പ്പെടെയുള്ള പത്ത് ട്രേഡ് യൂണിയനുകളാണ് രംഗത്ത് വന്നിരിക്കുന്നത്.
ലോക്ക്ഡൗണിന്റെയും അതിന്റെ സാമ്പത്തീക പ്രതിസന്ധിയുടേയും പശ്ചാത്തലത്തില് സാമ്പത്തീക പ്രവര്ത്തനങ്ങള് ത്വരിതപ്പെടുത്തുക ലക്ഷ്യമിട്ട് വിവിധ സംസ്ഥാനങ്ങള് ജോലിസമയവും കൂലിയും ഉള്പ്പെടെയുള്ള കാര്യങ്ങളിലെ നിലവിലെ തൊഴില് നിയമങ്ങള് താല്ക്കാലികമായി എങ്കിലും മരവിപ്പിക്കാനുള്ള നീക്കം നടത്തുന്നുണ്ട്. ഉത്തര്പ്രദേശാണ് ഇക്കാര്യത്തില് മുന്നില്. പിന്നാലെ മദ്ധ്യപ്രദേശും, ഗുജറാത്തും, ത്രിപുരയും ഉള്പ്പെടെബിജെപി ഭരിക്കുന്ന മറ്റ് ചില സംസ്ഥാനങ്ങളും ഈ ആലോചനയിലാണ്. എന്നാല് ഇതിനെതിരേ ആദ്യം രംഗത്ത് വന്നതും വിമര്ശനം ഉന്നയിച്ചതും ബിജെപിയുടെ തന്നെ തൊഴിലാളി സംഘടനയായ ബിഎംഎസ് തന്നെയാണ്.
ജനാധിപത്യം ഇല്ലാത്ത രാജ്യങ്ങളില് പോലും നടക്കാത്ത കാര്യമാണ് ഇതെന്നും മെയ് 20 ന് രാജ്യവ്യാപകമായി സൂചനാപ്രതിഷേധം നടത്തുമെന്നും ബിഎംഎസ് ജനറല് സെക്രട്ടറി വിജ്രേഷ് ഉപാദ്ധ്യായ പറയുകയും ചെയ്തിരുന്നു. ഇതിന് പിന്നാലെ സിപിഎമ്മും സിപിഐ യും ഉള്പ്പെടെയുള്ള ഇടതുപാര്ട്ടികളുടെ ട്രേഡ് യൂണിയനുകളും രംഗത്ത് വരികയായിരുന്നു. ഏഴു പാര്ട്ടികള് ചേര്ന്ന് ഇക്കാര്യത്തില് രാഷ്ട്രപതി രാംനാഥ് കോവിന്ദിന് കത്ത് നല്കുന്നത് ഉള്പ്പെടെയുള്ള നടപടികളും ആസൂത്രണം ചെയ്യുന്നുണ്ട്.
