തിരുവനന്തപുരം: സംസ്ഥാനത്ത് കോവിഡ് കേസുകള് വര്ധിച്ചുവരുന്ന സാഹചര്യത്തില് ലോക്ക്ഡൗണ് നിയന്ത്രണങ്ങള് കര്ശനമായി നടപ്പാക്കാന് സംസ്ഥാന പോലീസ് മേധാവി ലോക്നാഥ് ബെഹ്റ ജില്ലാ പോലീസ് മേധാവിമാര്ക്കു നിര്ദേശം നല്കി.
വീട്ടുനിരീക്ഷണത്തില് കഴിയുന്നവര് നിര്ദേശങ്ങള് ലംഘിച്ചു പുറത്തിറങ്ങുന്നതു കണ്ടെത്താന് പോലീസ് മിന്നല് പരിശോധന നടത്തും. ബൈക്ക് പട്രോള്, ഷാഡോ ടീം എന്നിവയുടെ സേവനം ഇതിനായി ഉപയോഗിക്കും. വീട്ടുനിരീക്ഷണം ലംഘിക്കുന്നതു കണ്ടെത്തിയാല് അവരെ സര്ക്കാരിന്റെ ക്വാറൈന്റന് കേന്ദ്രങ്ങളിലേക്കു മാറ്റാനും നിയമനടപടി സ്വീകരിക്കാനും നിര്ദേശിച്ചു. വീടുകളില് നിരീക്ഷണത്തില് കഴിയുന്നവര് നിര്ദേശങ്ങള് ലംഘിക്കുന്നതായി വാര്ഡുതല സമിതികള്, ബൈക്ക് പട്രോള്, ജനമൈത്രി പോലീസ് എന്നിവരുടെ പരിശോധനയില് കണ്ടെത്തിയതിനെത്തുടര്ന്നാണ് ഈ തീരുമാനം.
ഇരുചക്രവാഹനങ്ങള്, ഓട്ടോറിക്ഷ, കാറുകള്, ബസുകള് എന്നിവയില് അനുവദനീയമായതില് കൂടുതല് ആളുക യാത്രചെയ്യുന്നത് നിരുത്സാഹപ്പെടുത്തും. ഗതാഗത തടസമുണ്ടാകാത്ത തരത്തില് ആവശ്യമായ സ്ഥലങ്ങളില് ബാരിക്കേഡ് സ്ഥാപിക്കാനും നിര്ദേശിച്ചിട്ടുണ്ട്.
** സന്നദ്ധപ്രവര്ത്തകരെ പോലീസ് വളണ്ടിയര്മാരായി നിയോഗിക്കും
തിരുവനന്തപുരം: ലോക്ക്ഡൗണ് നിയന്ത്രണങ്ങള് നടപ്പാക്കുന്നതിന് സര്ക്കാരിനെ സഹായിക്കാന് തെരഞ്ഞെടുക്കപ്പെട്ട സന്നദ്ധപ്രവര്ത്തകരുടെ സേവനം ഇനി മുതല് പോലീസിനും ലഭിക്കുമെന്ന് സംസ്ഥാന പോലീസ് മേധാവി ലോക്നാഥ് ബെഹ്റ. പോലീസ് വളണ്ടിയര്മാര് എന്നാണ് ഇവര് അറിയപ്പെടുക.
പോലീസ് വളണ്ടിയേഴ്സ് എന്ന് മഞ്ഞ അക്ഷരത്തിലെഴുതിയ നീല നിറത്തില് മൂന്നിഞ്ച് വീതിയുള്ള തുണിയില് നിര്മിച്ച ആം ബാന്ഡ് ഇവര്ക്ക് നല്കും. രണ്ടു പേരടങ്ങുന്ന പോലീസ് സംഘത്തില് ഒരാളായി ഈ വളണ്ടിയര് ഉണ്ടാകും. ബൈക്ക് പട്രോള് നടത്തുന്ന പോലീസുകാര്ക്കൊപ്പവും ഇവരെ നിയോഗിക്കും. ഇവരുടെ വിശദവിവരങ്ങള് ബന്ധപ്പെട്ട പോലീസ് സ്റ്റേഷനില് സൂക്ഷിക്കും. പോലീസിനോടൊപ്പം ഷിഫ്റ്റ് അടിസ്ഥാനത്തില് ജോലി ചെയ്യുന്നതിന് ആവശ്യമായ പ്രോത്സാഹനവും സഹായവും വളണ്ടിയര്മാര്ക്ക് നല്കണമെന്നു സംസ്ഥാന പോലീസ് മേധാവി ലോക്നാഥ് ബെഹ്റ നിര്ദേശിച്ചു.
