ആലപ്പുഴ: സ്കൂള് വിദ്യാര്ത്ഥിനിയെ ബലാത്സംഗം ചെയ്ത് ക്രൂരമായി കൊലപ്പെടുത്തിയ കേസില് ഹൈകോടതിയെ തെറ്റിദ്ധരിപ്പിച്ച് പ്രതി ജാമ്യം നേടിയ സംഭവത്തില് ജാമ്യം റദ്ദാക്കാന് അപ്പീലുമായി പോലീസ്. ആലപ്പുഴയില് തുറവൂര് സ്വദേശിയായ വിദ്യാര്ത്ഥിനിയെ ബലാത്സംഗം ചെയ്ത് കൊലപ്പെടുത്തിയ കേസിലെ പ്രതിയായ എറണാകുളം വെട്ടൂര് സ്വദേശി സഫര്ഷായ്ക്കാണ് ജാമ്യം കിട്ടിയത്. കേസില് കുറ്റപത്രം സമര്പ്പിച്ചത് മറച്ചു വെച്ചാണ് ജാമ്യം നേടിയത്. മെയ് 12 നായിരുന്നു പ്രതി ജാമ്യം നേടി പുറത്ത് വന്നത്.
സംഭവത്തില് പ്രതിഭാഗത്തിനൊപ്പം പ്രോസിക്യൂഷനും തുണച്ചതോടെയാണ് പ്രതിക്ക് കോടതി ജാമ്യം നല്കിയത്. അറസ്റ്റ് ചെയ്ത് 90 ദിവസമായിട്ടും കുറ്റപത്രം സമര്പ്പിച്ചില്ല എന്നതിനാല് സോപാധിക ജാമ്യം നല്കണമെന്ന പ്രതിഭാഗത്തിന്റെ വാദം കോടതി അംഗീകരിക്കുകയായിരുന്നു. കുറ്റപത്രം സമര്പ്പിക്കാന് കഴിഞ്ഞില്ലെന്നായിരുന്നു പ്രോസിക്യൂഷനും പറഞ്ഞത്. കേസില് കുറ്റപത്രം സമര്പ്പിക്കാന് വേണ്ടുന്ന കാലയളവായ 90 ദിവസം പൂര്ത്തിയായത്കഴിഞ്ഞമാസം 8 നായിരുന്നു. എന്നാല് ഏപ്രില് 1 ാം തീയതി തന്നെ പോലീസ് കുറ്റപത്രം സമര്പ്പിക്കുകയും ചെയ്തിരുന്നു.
ഇക്കാര്യം പ്രോസിക്യൂഷന് കോടതിയില് മറച്ചു വെച്ചതാണ് പ്രതിയെ തുണച്ചത്. ഇത്രയും ഗുരുതരമായ കേസില് കുറ്റപത്രം സമര്പ്പിക്കാത്തതിന് അന്വേഷണ ഉദ്യോഗസ്ഥനെ ഹൈക്കോടതി രൂക്ഷമായി വിമര്ശിക്കുകയും ചെയ്തു. പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ചു കൊന്നതിന് സഫര്ഷാ അറസ്റ്റിലായത് 2020 ജനുവരി 8 നായിരുന്നു. ക്രൂരമായ കൊലപാതകത്തിനാണ് സഫര്ഷ അറസ്റ്റിലായത്.
എറണാകുളം കാര് ഷോറൂമിലെ ഡ്രൈവറായ സഫര്ഷാ അവിടെ നിന്നും മോഷ്ടിച്ച കാറില് പ്ളസ്ടൂ വിദ്യാര്ത്ഥിനിയെ കടത്തിക്കൊണ്ടു പോകുകയും ബലാത്സംഗം ചെയ്യുകയും കുത്തിക്കൊലപ്പെടുത്തി മൃതദേഹം വാല്പ്പാറയിലെ തേയിലത്തോട്ടത്തില് തള്ളുകയും ചെയ്തെന്നാണ് കേസ്. ജനുവരി 9 ന് നടന്ന സംഭവത്തില് അന്ന് തന്നെ പിടിയിലായിരുന്നു. 24 ഓളം കുത്തുകളാണ് പെണ്കുട്ടിയുടെ ശരീരത്ത് ഉണ്ടായിരുന്നത്. പ്രേമബന്ധത്തില് നിന്നും പിന്മാറിയതാണ് കൊലപാതകത്തില് കലാശിച്ചതെന്നാണ് പോലീസ് പറഞ്ഞത്.
വൈകിട്ട് 6.30ന് മലക്കപ്പാറ ചെക്ക് പോസ്റ്റ് കടക്കുമ്പോള് ഐ ട്വന്റി കാറിലെ മുന് സീറ്റില് ഉണ്ടായിരുന്ന പെണകുട്ടിയെ പിന്നീട് ആളിയാര് ഭാഗത്ത് വച്ച് ഷേക്കല്മുടി പൊലീസ് പരിശോധനയ്ക്ക് തടഞ്ഞു നിറുത്തുമ്പോള് കണ്ടില്ല. സംശയം തോന്നി പോലീസ് പരിശോധിച്ചപ്പോള് കാറിനുള്ളില് രക്തക്കറ കണ്ടെത്തുകയും സ്റ്റേഷനില് കൊണ്ടു പോയി ചോദ്യം ചെയ്യുകയുമായിരുന്നു. അപ്പോഴാണ് ഞെട്ടിക്കുന്ന കൊലപാതക വിവരം പുറത്തറിഞ്ഞത്. മലക്കപ്പാറ ചെക്ക് പോസ്റ്റില് നിന്ന് ഒരു കിലോ മീറ്റര് അകലെയുള്ള വരട്ടുപാറയില് വച്ച് മൃതദേഹം ഉപേക്ഷിച്ചത്.
