കൊല്ലം: ഡി.സി.സി അധ്യക്ഷ ബിന്ദു കൃഷ്ണയ്ക്കെതിരെ ഡി.സി.സി ഓഫീസിന് മുന്നില് പോസ്റ്റര്. ക്രിമിനല് കേസ് പ്രതിയായ യൂത്ത് കോണ്ഗ്രസ് ജനറല് സെക്രട്ടറി ഫൈസല് കുളപ്പാടത്തിനെ ബിന്ദു കൃഷ്ണ സംരക്ഷിക്കുന്നുവെന്ന് ചൂണ്ടിക്കാട്ടിയാണ് പ്രതിഷേധ പോസ്റ്ററുകള്. സേവ് കോണ്ഗ്രസ് എന്ന പേരിലാണ് പോസ്റ്റര്.
ക്രിമിനല് കേസില് റിമാന്ഡില് കഴിയുന്ന യൂത്ത് കോണ്ഗ്രസ് നേതാവ് ഫൈസല് കുളപ്പാടത്തിനെ പാര്ട്ടിയില് നിന്ന് പുറത്താക്കാതെ ബിന്ദു കൃഷ്ണ സംരക്ഷിക്കുന്നുവെന്നാണ് പാര്ട്ടിക്കുള്ളിലെ വിമര്ശനം. ബിന്ദു കൃഷ്ണയെ കൂടാതെ ജില്ലയിലെ മുതിര്ന്ന എ ഗ്രൂപ്പ് നേതാവിനെതിരെയും പോസ്റ്ററില് വിമര്ശനമുണ്ട്.
അതേസമയം ക്രിമിനല് കേസ് പ്രതിയായ യൂത്ത് കോണ്ഗ്രസ് നേതാവിനെ പുറത്താക്കേണ്ടത് യൂത്ത് കോണ്ഗ്രസ് സംസ്ഥാന നേതൃത്വമാണെന്നാണ് ബിന്ദു കൃഷ്ണയുടെ വാദം. സാമ്പത്തിക ഇടപാടുകളുമായി ബന്ധപ്പെട്ട് യുവാവിനെ തട്ടിക്കൊണ്ടുപോയി മര്ദ്ദിച്ച കേസിലാണ് ഫൈസല് കുളപ്പാടം നിലവില് റിമാന്ഡില് കഴിയുന്നത്.
