കോഴിക്കോട്: ദുബായില് വെച്ച് മരിച്ച പ്രവാസിയായ നിതിന്റെ മൃതദേഹം കൊച്ചിയില് നിന്നും കോഴിക്കോട്ടേക്ക് കൊണ്ടുപോയി. മൃതദേഹം ആദ്യം എത്തിക്കുക പ്രസവ ശേഷം ആശുപത്രിയില് കഴിയുന്ന ഭാര്യ ആതിരയുടെ അടുക്കലാണ്. വൈകുന്നേരം പേരാമ്പ്രയില് സംസ്കാരം നടക്കും. ദുബായിലെ താമസസ്ഥലത്ത് വെച്ച് കഴിഞ്ഞ ദിവസം ആയിരുന്നു നിതിന് മരിച്ചത്. ഉറക്കത്തില് ഹൃദയാഘാതം സംഭവിച്ചായിരുന്നു നിതിന്റെ മരണം.
നിതിന് മരിച്ച വിവരം അറിഞ്ഞ ബന്ധുക്കള് ആതിരയെ ഇക്കാര്യം അറിയിക്കാതെ പ്രസവത്തിന് മുന്നോടിയായുള്ള കോവിഡ് ടെസ്റ്റിന് എന്ന പേരില് കോഴിക്കോട്ടെ സ്വകാര്യ ആശുപത്രിയില് പ്രവേശിപ്പിക്കുകയായിരുന്നു. തുടര്ന്ന് ഇന്നലെ സിസേറിയനിലൂടെ ആതിര പെണ്കുഞ്ഞിന് ജന്മം നല്കി. വിദേശത്ത് കുടുങ്ങിയ ഗര്ഭിണികളെ നാട്ടില് എത്തിക്കാന് നിയമ പോരാട്ടം നടത്തിയത് ഗര്ഭിണിയായ ആതിരയും ഭര്ത്താവ് നിതിനുമായിരുന്നു.
തുടര്ന്ന് നാട്ടിലേക്ക് തിരിക്കാന് ആതിരയ്ക്ക് ഒപ്പം ഭര്ത്താവ് നിതിനും ടിക്കറ്റ് ലഭിച്ചിരുന്നു. എന്നാല് അത്യാവശ്യമായി നാട്ടില് എത്തേണ്ട മറ്റൊരാള്ക്ക് തന്റെ ടിക്കറ്റ് നല്കുകയാണ് നിതിന് ചെയ്തത്. ആതിരയുടെ പ്രസവ സമയം നാട്ടില് എത്താനായുള്ള തയ്യാറെടുപ്പിനിടെയാണ് മരണം സംഭവിച്ചത്. ദുബായില് ഐടി എന്ജിനീയറായ ആതിര ലോക്ഡൗണില് വിദേശത്തു കുടുങ്ങിയ ഗര്ഭിണികളെ നാട്ടിലെത്തിക്കണമെന്നാവശ്യപ്പെട്ടു സുപ്രീം കോടതിയെ സമീപിച്ചതോടെയാണു ശ്രദ്ധേയയായത്.
