തിരുപ്പൂര് : ഉദുമലപേട്ടയില് യുവാവിനെ വെട്ടിക്കൊലപ്പെടുത്തിയ കേസില് പ്രതികളുടെ വധശിക്ഷ റദ്ദാക്കി ഹൈക്കോടതി. പെണ്കുട്ടിയുടെ പിതാവ് പഴനി സ്വദേശി ചിന്നസ്വാമിയെ കോടതി കുറ്റവിമുക്തനാക്കി. അഞ്ചു പ്രതികളുടെ ശിക്ഷ ജീവപര്യന്തമായി കുറച്ചു.
തേവര് സമുദായത്തില്പ്പെട്ട കൗസല്യ എന്ന യുവതിയെ പ്രണയിച്ചു വിവാഹം കഴിച്ച ദലിത് യുവാവായ ദിണ്ഡിഗല് സ്വദേശി ശങ്കറിനെ 2016 മാര്ച്ച് 13നാണു ഉദുമലപേട്ട നഗരമധ്യത്തില് ക്വട്ടേഷന് സംഘം വെട്ടിക്കൊലപ്പെടുത്തിയത്.കൗസല്യയുടെ പിതാവ് ചിന്നസ്വാമി, മാതാവ് അന്നലക്ഷ്മി, അമ്മാവന് പാണ്ടിദുരൈ എന്നിവരുടെ നിര്ദേശപ്രകാരമായിരുന്നു കൊലപാതകമെന്നാണു കേസ്. കൗസല്യയുടെ അമ്മയും അമ്മാവനും ഉള്പ്പെടെ മൂന്നു പ്രതികളെ നേരത്തെ വെറുതെ വിട്ടിരുന്നു.
തേവര് സമുദായാംഗമായ കൗസല്യ, ദലിത് (അരുന്ധതിയാര്) സമുദായത്തില്പ്പെട്ട ശങ്കറിനെ വീട്ടുകാരുടെ എതിര്പ്പ് അവഗണിച്ചു രഹസ്യമായി വിവാഹം ചെയ്തതാണു കൊലപാതകത്തില് കലാശിച്ചത്. കൗസല്യയുടെ മാതാപിതാക്കള് വിവാഹം നടന്നത് അറിഞ്ഞ ഉടന് കൗസല്യയെ, വിദ്യാഭ്യാസം അവസാനിപ്പിച്ചു വീട്ടില് തിരികെയെത്തിച്ചു. എന്നാല് ഒരു മാസത്തിനുശേഷം ശങ്കറിന്റെ വീട്ടിലേക്കു കൗസല്യ എത്തി. ഇതേത്തുടര്ന്നു ശങ്കറിനോടൊപ്പം താമസിക്കാന് ശങ്കറിന്റെ വീട്ടുകാര് കൗസല്യയെ അനുവദിച്ചു. ഇതു കൗസല്യയുടെ വീട്ടുകാരെയും സമുദായാംഗങ്ങളെയും പ്രകോപിതരാക്കി. തുടര്ന്ന് ഉണ്ടായ ദുരഭിമാന പ്രശ്നങ്ങള് കൊലപാതകത്തിലേയ്ക്ക് നയിക്കുകയായിരുന്നു.
