ന്യൂഡല്ഹി: ഒരു അതിരില് നിന്നും ചൈന നിരന്തരം പ്രശ്നങ്ങള് ഉണ്ടാക്കി ഇന്ത്യയെ യുദ്ധത്തിന്റെ തൊട്ടു മുന്നില് നിര്ത്തിയിരിക്കുമ്പോള് മറുവശത്ത് ഇന്ത്യയ്ക്ക് ചൂടു കൂട്ടി പാകിസ്താനും പ്രകോപനം സൃഷ്ടിക്കുന്നു. കശ്മീരിന് പ്രത്യേക പദവി നല്കുന്ന ഭരണഘടനയിലെ വകുപ്പുകള് എടുത്തുമാറ്റിയതിന് ശേഷം പാകിസ്താനും നിരന്തരം പ്രകോപനം സൃഷ്ടിക്കുമ്പോള് രണ്ടു ശത്രുക്കളോട് ഒരേസമയം ഏറ്റുമുട്ടേണ്ട സ്ഥിതി.
കശ്മീര് താഴ്വാരത്ത് കഴിഞ്ഞ വര്ഷം നടത്തിയതിനേക്കാര് കുടുതല് തീവ്രവാദി ആക്രമണവും ഈ വര്ഷം റിപ്പോര്ട്ട് ചെയ്തിരിക്കുകയാണ്. നിയന്ത്രണരേഖയില് മെയ് മാസത്തിനും ജൂണിനും ഇടയില് മാത്രം വെടിനിര്ത്തല് ലംഘിക്കപ്പെട്ടത് 382 തവണ. ജൂണില് മാത്രം 302 വെടിനിര്ത്തല് ലംഘനം ഉണ്ടായി. കഴിഞ്ഞവര്ഷം ഇതേ സമയത്ത് റിപ്പോര്ട്ട് ചെയ്യപ്പെട്ടത് 221 സംഭവങ്ങളായിരുന്നെങ്കില് ഈ വര്ഷം അത് 181 എണ്ണം കൂടി കൂടുതലായി. സുരക്ഷ ഉദ്യോഗസ്ഥര് തീവ്രവാദികളുമായി നടത്തുന്ന പോരാട്ടവും കൂടി. ജൂണില് മാത്രം കൊലപ്പെടുത്തിയത് 41 തീവ്രവാദികളെയാണ്.
ജൂണ് 21 വരെ ഈ വര്ഷം 2215 വെടിനിര്ത്തല് ലംഘനങ്ങള് ഉണ്ടായി. 2019 ല് മൊത്തം റിപ്പോര്ട്ട് ചെയ്തത് 3163 വെടി നിര്ത്തല് ലംഘനങ്ങളായിരുന്നു. 2018 ല് അത് 1629 ആയിരുന്നു. കഴിഞ്ഞ വര്ഷം കശ്മീരിന് പ്രത്യേക പദവി നല്കുന്ന ഭരണഘടനയിലെ വകുപ്പുകള് എടുത്തു മാറ്റി ജമ്മു കശ്മീരും ലഡാക്കുമായി കശ്മീരിനെ രണ്ടു കേന്ദ്രഭരണ പ്രദേശങ്ങളായി മാറ്റിയ ശേഷമാണ് ഇവിടെ വെടിനിര്ത്തല് കരാര് ലംഘനം കൂടിയത്. കഴിഞ്ഞ വര്ഷം മുതല് തുടങ്ങിയ വെടിനിര്ത്തല് ലംഘനം കൂടാനുള്ള പ്രവണത ഈ വര്ഷവും കൂടിയ നിലയിലാണ്.
ഇതിനൊപ്പം തന്നെ കശ്മീരിലേക്ക് തീവ്രവാദികളെ വിടുന്ന പ്രവര്ത്തനങ്ങളും പാക് സൈന്യം കൂട്ടിയിട്ടുണ്ട്. ഇന്ത്യയിലേക്ക് തീവ്രവാദികളെ നുഴഞ്ഞുകയറാന് സഹായിക്കുന്ന പാക് സൈന്യം അപ്പോഴെല്ലാം വെടിനിര്ത്തല് കരാര് ലംഘിക്കാറുണ്ടെന്നാണ് സൈനിക വൃത്തങ്ങള് നല്കുന്ന സൂചനകള്. ഈ വര്ഷം ജൂണ് 21 വരെ 119 തീവ്രവദികളെയാണ് ഇന്ത്യന് സുരക്ഷാവിഭാഗം കശ്മീര് താഴ്വാരത്ത് കൊലപ്പെടുത്തിയത്. ജൂണില് മാത്രം അത് 41 ആണ്. 2019 ല് 158 തീവ്രവാദികളെ കൊലപ്പെടുത്തി. 2018 ല് ഇത് 254 ആയിരുന്നു. 2017 ല് 213 ും.
