മലയാളികളുടെ പ്രിയപ്പെട്ട നടനാണ് പ്രതാപ് പോത്തൻ. എൺപതുകളിൽ തെന്നിന്ത്യൻ സിനിമയിൽ നായകനായും സഹതാരമായും വില്ലനായും തിളങ്ങിയ നടനിപ്പോൾ സിനിമകളിലെന്ന പോലെ സോഷ്യൽ മീഡിയയിലും വളരെ സജീവമാണ്. ഇപ്പോഴിതാ നടൻ മൂത്തോൻ എന്ന നിവിൻ പോളി ചിത്രത്തെ പ്രകീർത്തിച്ച് രംഗത്തെത്തിയിരിക്കുകയാണ്. ചിത്രത്തിൻ്റെ ക്യാമറയും സംവിധാനവും എഡിറ്റിങ്ങും താരങ്ങളുടെ അഭിനയവുമടക്കം അത്രമേൽ മികച്ചതാണെന്ന് പ്രതാപ് പോത്തൻ പറയുന്നു. സോഷ്യൽ മീഡിയകളിലൂടെയാണ് പ്രതാപ് പോത്തൻ തൻ്റെ അഭിപ്രായം വെളിപ്പെടുത്തിയത്. പ്രതാപ് പോത്തൻ്റെ കുറിപ്പിൻ്റെ പൂർണ്ണ രൂപം ഇങ്ങനെ.
'സംവിധായകർ സ്ഥിരം സഞ്ചരിക്കുന്ന പാതയിൽ നിന്ന് മാറി സഞ്ചരിക്കുമ്പോഴും കൈവെക്കാൻ ഭയപ്പെടുന്ന മേഖലയിലും വിഷയത്തിലും കൈവെച്ച് വിജയം കൈവരിക്കുമ്പോഴാണ് ഒരു സിനിമ തനിത്തങ്കമായി മാറുന്നത്. മൂത്തോനിലൂടെ ഗീതു മോഹൻദാസ് ചെയ്തിരിക്കുന്നത് അതാണ്. ചിത്രം തുടക്കം മുതൽ അതിൻ്റെ ലോകത്തേക്ക് മാത്രമായി നിങ്ങളോരോരുത്തരെയും വലിച്ചിട്ട് അത്രത്തോളം എൻഗേജിങ് ആക്കുന്നുണ്ട്. ഇതിനു മുൻപ് ഞാൻ കണ്ട സ്വവർഗ്ഗപ്രണയം പറഞ്ഞ ചിത്രം ബ്രോക്ക് ബാക്ക് മൌണ്ടെയ്ൻ ആയിരുന്നു. പക്ഷേ ഈ ചിത്രം സ്വവർഗ്ഗ പ്രണയം മാത്രമല്ല പറഞ്ഞത്. ജീവിതത്തിൻ്റെ ദുർഭാഗ്യപരമായ പാതയിലൂട നടക്കപ്പെടേണ്ടി വന്നവരുടെ കഥ കൂടിയായിരുന്നു. പ്രണയത്തെ കുറിച്ചും സ്നേഹിക്കപ്പെടുന്നവരെ തെരയുന്നവരുടെ കഥ കൂടിയാണ് ചിത്രം പറഞ്ഞത്. ഇന്ന് സിനിമയിൽ അധികം കാണാനില്ലാത്ത സത്യസന്ധതയോടെയാണ് ആ കഥ പറഞ്ഞിരിക്കുന്നത്. ഈ സിനിമയിലുള്ളതെല്ലാം വളരെ മികച്ചതാണ്.'
'ലക്ഷദ്വീപിൻ്റെ സുന്ദരമായ കാഴ്ചകളും മുബൈ നഗരത്തിൻ്റെ അസ്വസ്ഥമാക്കുന്ന കാഴ്ചകളുമെല്ലാം അത്രമേൽ മികച്ചത് തന്നെയായിരുന്നു. ചിത്രത്തിൽ നിവിൻ പോളി കാഴ്ച വെച്ച പ്രകടനം അങ്ങേയറ്റം വിസ്മയസ്തബ്ധനാക്കുന്നത് തന്നെയായിരുന്നു. അതുപോലെ തന്നെയായിരുന്നു റോഷൻ മാത്യുവും. ചിത്രത്തിൻ്റെ ഭൂരിഭാഗം രംഗങ്ങളിലും നിറഞ്ഞു നിന്നത് നിവിനായിരുന്നു, അദ്ദേഹത്തിൻ്റെ മാക്സിമം തന്നെ ഓരോ രംഗങ്ങളിലും നിവിൻ പുറത്തെടുത്തിട്ടുണ്ട്. ചിത്രത്തിൻ്റെ ഭാഗമായ ഓരോ താരങ്ങളും അതിഗംഭീരമായി തന്നെ അഭിനയിച്ചിട്ടുണ്ട്. രാജീവ് രവിയുടെ ഛായാഗ്രഹണവും അതിമനോഹരം തന്നെ. എഡിറ്റിങ്ങും സൌണ്ട് ഡിസൈനിങ്ങും പ്രൊഡക്ഷൻ ഡിസൈനിങ്ങുമെല്ലാം ഫസ്റ്റ് ക്ലാസ്സാണ്.'
'ഇതിലെല്ലാം ഉപരി രണ്ടാമത്തെ ചിത്രം ചെയ്യുന്ന ഗീതു മോഹൻദാസ് ഇതിൽ പുതിയൊരു അളവുകോൽ തന്നെ ഉണ്ടാക്കിയിട്ടുണ്ട്, ഇത് ഗീതു അടുത്ത സിനിമയിൽ മറികടക്കുകയും ചെയ്യും. അവര്ക്കതിനുള്ള പ്രതിഭയുള്ളതു കൊണ്ട് അത് സാധിക്കുകയും ചെയ്യും. വര്ഷങ്ങൾക്കു മുൻപ് ഗീതു മോഹൻദാസ് എൻ്റെ മകളായി അഭിനയിച്ചിട്ടുണ്ട്, അന്ന് അവൾക്ക് അഞ്ചോ ആറോ വയസ്സേ ഉണ്ടാകൂ. അതുകൊണ്ടു തന്നെ സ്വാഭാവികമായും ഒരു അച്ഛനെന്ന നിലയിൽ എനിക്ക് അഭിമാനമുണ്ടാകും. അഭിനന്ദനങ്ങൾ ഗീതൂ, നിങ്ങള് നിങ്ങളുടെ കാലത്തെ ഏറ്റവും മികച്ച സംവിധായകരിൽ ഒരാളായി മാറിയിരിക്കുന്നു.'
