ഹാരി രാജകുമാരനും മേഗന് മാര്ക്കലും തമ്മിലുള്ള രാജകീയ വിവാഹത്തിന് രാജകുടുംബത്തിന് താല്പര്യം ഉണ്ടായിരുന്നില്ലെന്ന വെളിപ്പെടുത്തലാണ് ഇപ്പോള് പുറത്ത് വരുന്നത്. അന്വേഷണാത്മക മാധ്യമപ്രവര്ത്തക ഡൈലാന് ഹോവാര്ഡും ആന്ഡി ഡില്ലെറ്റും ചേര്ന്ന രചിച്ച പുസ്തകമായ ഇന് റോയല് അറ്റ് വാര് എന്ന പുസ്തകത്തിലാണ് ഇതേ കുറിച്ച് പരാമര്ശിച്ചിരിക്കുന്നത്. നടിയായ മേഗനെ ഹാരി വിവാഹം കഴിക്കുന്നതിനോട് രാജകുടുംബത്തിന് താല്പര്യമുണ്ടായിരുന്നില്ലെന്നാണ് പുസ്തകത്തില് പറയുന്നത്.
മേഗനുമായുള്ള വിവാഹത്തോടെയാണ് രാജകുടുംബത്തില് അകല്ച്ച വരാന് തുടങ്ങിയതെന്നും ഹൊവാര്ഡും ടില്ലെറ്റും പറയുന്നു. ഭാര്യക്കും ഒരുവയസ്സുകാരനായ മകന് ആര്ച്ചിക്കുമൊപ്പം ഹാരി ലോസ്ആഞ്ജിലിസിലേക്കു പോയതോടെ രാജകുടുംബവുമായി വീണ്ടും അകന്നുവെന്നും പറയുന്നു. തീര്ത്തും വ്യത്യസ്തമായ പശ്ചാത്തലത്തില് നിന്നും കരിയറില് നിന്നും വരുന്ന മേഗന് രാജകുടുംബവുമായി ഒത്തുപോവാന് സമയമെടുക്കുമെന്നും എടുത്തുചാടി കാര്യങ്ങള് തീരുമാനിക്കരുതെന്നും കേറ്റ് ഹാരിയോട് പറഞ്ഞിരുന്നുവെന്നും പുസ്തകത്തില് പറയുന്നു.
മേഗനെ തന്നെയാണോ വിവാഹം കഴിക്കേണ്ടതെന്ന് വില്യമും ഹാരിയോട് ചോദിച്ചിരുന്നുവെന്നും പുസ്തകത്തില് പറയുന്നു. വിവാഹത്തോട് അനുബന്ധിച്ച് ഹാരി പണം ധൂര്ത്തടിച്ചുവെന്നും ഇതും വില്യമിനും ഹാരിക്കുമിടയില് വിള്ളല് വരുത്തിയെന്നും പുസ്തകത്തില് പറയുന്നുണ്ട്. എന്നാല് മേഗന്റെ ആത്മവിശ്വാസത്തിലും ലക്ഷ്യബോധത്തിലും പ്രതിബദ്ധതയിലും പൂര്ണവിശ്വാസം അര്പ്പിച്ചിരുന്ന ഹാരി തീരുമാനത്തില് ഉറച്ചു നില്ക്കുകയായിരുന്നു. ഒരുവേള തനിക്ക് നഷ്ടപ്പെട്ട അമ്മയുടെ സ്ഥാനം പോലും ഹാരി മേഗനില് കാണുകയായിരുന്നുവെന്നും പുസ്തകം പ്രതിപാദിക്കുന്നു.
