ഇംഗ്ളീഷ് പ്രീമിയര് ലീഗില് നേരത്തേ തന്നെ കിരീടം നേടിയ ലിവര്പൂളിന് ചാമ്പ്യന്പട്ടം കിട്ടിയതിന് തൊട്ടുപിന്നാലെ നടന്ന മത്സരത്തില് വന് പരാജയം. ലിഗ് പട്ടികയില് രണ്ടാമതുള്ള മാഞ്ചസ്റ്റര് സിറ്റി ഏകപക്ഷീയമായ നാലു ഗോളുകള്ക്കാണ് തകര്ത്തു വിട്ടത്. ഏഴു മത്സരങ്ങള് ബാക്കി നില്ക്കേ തന്നെ കിരീടം നേടിയതിനാല് ഇനിയുള്ള മത്സരങ്ങള് ലിവര്പൂളിന് പോയിന്റ് കൂട്ടാനുള്ളതാണ്.
ഡിബ്രൂയന്, സ്റ്റെര്ലിംഗ്, ഫോഡന് എന്നിവര് സിറ്റിക്കായി ഗോള് നേടിയപ്പോള് അവസാന ഗോള് ഓക്ലേഡ് ചേംബര്ലിന് നല്കിയ സെല്ഫ് ഗോളായിരുന്നു. സിറ്റിയുടെ തട്ടകമായ എത്തിഹാദ് സ്റ്റേഡിയത്തിലായിരുന്നു മത്സരം. 30 വര്ഷത്തെ കാത്തിരിപ്പിന് ശേഷം പ്രീമിയര് ലീഗില് കിരീടം ചൂടിയ ലിവര്പൂളിനെ ഗാര്ഡ് ഓഫ് ഓണര് നല്കിയാണ് സിറ്റി സ്വീകരിച്ചത്. പക്ഷേ കളിയില് ബഹുമാനം കാട്ടിയില്ലെന്ന് മാത്രം. ആദ്യ പകുതി പൂര്ണ്ണമായും കയ്യടി സിറ്റി തങ്ങളുടെ എല്ലാ ഗോളും നേടി.
സിറ്റി താരം റഹീം സ്റ്റെര്ലിംഗിനെ ലിവര്പൂളിന്റെ ജോയി ഗോമസ് ബോക്സില് വീഴ്ത്തിയതിന് കിട്ടിയ പെനാല്റ്റി മുതലാക്കി ഡിബ്രൂയനാണ് ആദ്യം ഗോള് നേടിയത്. പത്തു മിനിറ്റ് കഴിഞ്ഞപ്പോള് ഒരു കൗണ്ടര് അറ്റാക്കിലൂടെ സ്റ്റെര്ലിംഗും ഗോള് നേടി. ഡിബ്രൂയനുമായി വണ് ടൂ പാസുകളിലൂടെ മുന്നേറി ഫോഡനും ലക്ഷ്യം കണ്ടതോടെ സിറ്റി ആദ്യ പകുതി മൂന്ന് ഗോള് നേട്ടവുമായി മടങ്ങി. രണ്ടാം പകുതിയില് സ്റ്റെര്ലിംഗിന്റെ ഗ്രൗണ്ടര് രക്ഷിക്കാന് നടത്തിയ ശ്രമത്തില് അലക്സ് ഓക്സ്ലേഡ് ചേംബര്ലിന് സ്വന്തം വലയില് പന്തെത്തിക്കുകയും ചെയ്തു.
