തിരുവനന്തപുരം: സ്വപ്നയും സരിത്തുമായും സൗഹൃദമാണ് ഉണ്ടായിരുന്നതെന്നും അവരുടെ ബിസിനസിനെ കുറിച്ചോ സ്വര്ണ്ണക്കടത്തിനെ കുറിച്ചോ അറിവുണ്ടായിരുന്നില്ലെന്നും മുഖ്യമന്ത്രിയുടെ മൂന് പ്രിന്സിപ്പല് സെക്രട്ടറി എം ശിവശങ്കരന് മൊഴി നല്കിയതായി റിപ്പോര്ട്ട്. സ്വപ്നയ്ക്കും കൂട്ടാളികള്ക്കും സ്വര്ണ്ണം കടത്തുന്ന പരിപാടി ഉണ്ടായിരുന്നതായി ഒരു വിവരവും തനിക്കില്ലായിരുന്നു എന്നും അറിയാമായിരുന്നെങ്കില് അകറ്റി നിര്ത്തുമായിരുന്നു എന്നും എന്ഐഎ യുടെ ചോദ്യം ചെയ്യലില് ശിവശങ്കരന് മൊഴി നല്കി.
കസ്റ്റംസിന് നല്കിയതിന് സമാനമായ മൊഴിയാണ് ശിവശങ്കരന് എന്ഐഎ യ്ക്കും നല്കിയത്. സ്വപ്നയാണ് സരിത്തിനെ പരിചയപ്പെടുത്തിയത് ഇവരുമായി സൗഹൃദത്തിനപ്പുറത്തുള്ള ഒരു ബന്ധവും ഉണ്ടായിരുന്നില്ല. സ്വപ്ന സുരേഷിന്റെ ഭര്ത്താവ് തന്റെ ബന്ധുവാണെന്നും ആ അടുപ്പമാണ് ഇവരുടെ കുടുംബവുമായി ഉണ്ടായിരുന്നതെന്നും ശിവശങ്കര് പറഞ്ഞതായാണു വിവരം. സ്വപ്നയുമായി തനിക്ക് സൃഹൃദ്ബന്ധം മാത്രമാണുണ്ടായിരുന്നത്. സ്വപ്ന സംഘടിപ്പിക്കുന്ന മദ്യസല്ക്കാരങ്ങളിലും പാര്ട്ടികളിലും പങ്കെടുത്തിട്ടുണ്ട്.
വിദേശയാത്രയില് ഒപ്പം സ്വപ്നയും ഉണ്ടായിരുന്നു. അതൊന്നും ഒരുപരിധിക്കപ്പുറം പോയിട്ടില്ലെന്നു ശിവശങ്കര് മൊഴി നല്കി. സ്വര്ണ ക്കടത്തുകാരുമായി സ്വപ്നയ്ക്കുള്ള ബന്ധം തിരിച്ചറിയാന് കഴിയാതിരുന്നതു വ്യക്തിപരമായ വീഴ്ചയാണ്. രഹസ്യാന്വേഷണ വിഭാഗങ്ങളൊന്നും ഇക്കാര്യത്തില് മുന്നറിയിപ്പും നല്കിയിരുന്നില്ല. അത്തരം ഒരു മുന്നറിയിപ്പ് ഉണ്ടായിരുന്നെങ്കില് അവരെ അകറ്റി നിര്ത്തുമായിരുന്നെന്നും പറഞ്ഞതായാണു സൂചന. കസ്റ്റംസിന് നല്കിയ മൊഴി തന്നെ ശിവശങ്കരന് എന്ഐഎ യ്ക്കും നല്കി.
എല്ലാം അറിഞ്ഞുകൊണ്ടാണോ ശിവശങ്കരന് കള്ളക്കടത്ത് സംഘത്തോട് ഇടപെട്ടിരുന്നത് എന്നായിരുന്നു എന്ഐഎയ്ക്ക് അറിയേണ്ടിയിരുന്നത്. പ്രതികളുമായുള്ള ബന്ധത്തിന്റെ വിശദാംശങ്ങള്, സംഘത്തിന് ഔദ്യോഗിക പദവി ഉപയോഗിച്ചോ വ്യക്തിപരമായോ ഏതെങ്കിലും തരത്തിലുള്ള സഹായം ചെയ്തിട്ടുണ്ടോ തുടങ്ങിയ കാര്യങ്ങളില് വ്യക്തത വരുത്തുകയായിരുന്നു ചോദ്യം ചെയ്യിലിന്റെ പ്രധാന ഉദ്ദേശം. പേരൂര്ക്കട പോലീസ് ക്ലബ്ബില് വെച്ച് മണിക്കൂറോളമായിരുന്നു ചോദ്യം ചെയ്യല്.
സ്വര്ണക്കടത്തും തീവ്രവാദബന്ധവുമുള്ള ആറുപേരുടെ ചിത്രങ്ങള് കാണിച്ചായിരുന്നു ചോദ്യം ചെയ്യലെന്നാണ് സൂചന. സ്വപ്നയും യു.എ.ഇ. കോണ്സുലേറ്റിലെ അറ്റാഷെയും തമ്മിലുള്ള ബന്ധം, മറ്റുപ്രതികളായ സരിത്തിന്റെയും സന്ദീപ് നായരുടെയും ഇടപാടുകള്, സ്പേസ് പാര്ക്കില് സ്വപ്നയെ നിയമിച്ച സാഹചര്യം, ശാസ്ത്രരംഗത്തെ പ്രമുഖരുമായി സ്വപ്ന ബന്ധം സ്ഥാപിച്ചിട്ടുണ്ടോ തുടങ്ങിയ വിവരങ്ങളാണ് പ്രധാനമായും എന്.ഐ.എ. ആരാഞ്ഞത്.
ശിവശങ്കറിനു സ്വര്ണക്കടത്തില് ബന്ധമുണ്ടെന്ന് ഒന്നാംപ്രതി സരിത്ത് മൊഴി നല്കിയിരുന്നു. ആ മൊഴിയും എന്.ഐ.എ. ശേഖരിച്ച തെളിവുകളും ഫോണ് സന്ദേശങ്ങളും മുന്നില് നിരത്തി ശിവശങ്കര് നല്കിയ മൊഴിയിലെ വൈരുദ്ധ്യം എന്.ഐ.എ. പരിശോധിച്ചു. സ്വപ്നയുമായി നടത്തിയ സാമ്പത്തിക ഇടപാടുകള്, സരിത്തുമായുള്ള സൗഹൃദം, സ്വര്ണക്കടത്തു കേസിലെ പ്രതികളുമായുള്ള ഫോണ് വിളികള്, വിദേശ യാത്രകള് തുടങ്ങിയ കാര്യങ്ങളിലെല്ലാം വ്യക്തത വരുത്താനാണ് എന്.ഐ.എ. ശ്രമം.
സ്വര്ണം പിടികൂടുന്നതിന് മുമ്പ് പ്രതികള് ശിവശങ്കറിന്റെ ഓഫീസിലെത്തി കണ്ടോയെന്ന കാര്യം കൂടി എന്ഐഎ അന്വേഷിക്കുന്നുണ്ട്. സെക്രട്ടറിയേറ്റിലെ സിസിടിവി ദൃശ്യങ്ങളും എന്ഐഎ പരിശോധിക്കും. ഇതിനായി ജൂലായ് ഒന്ന് മുതല് 12 വരെയുള്ള സെക്രട്ടറിയേറ്റിലെ സിസിടിവി ദൃശ്യങ്ങള് എന്ഐഎ ആവശ്യപ്പെട്ടിട്ടുണ്ട്.
