സാക്ഷാല് അമിതാഭ് ബച്ചന്റെ പോലും മനം കവര്ന്ന് മലയാളികള്ക്ക് അഭിമാനമായിരിക്കുകയാണ് ആര്യ ദയാല്. കര്ണാടക സംഗീതവും പോപ് സംഗീതവും ചേര്ത്ത് വ്യത്യസ്തമായ പാട്ടവതരണം സമൂഹമാധ്യമങ്ങളിലാകെ പ്രചരിച്ചിരുന്നു.
കോവിഡ് ബാധിച്ച് ആശുപത്രിയില് കഴിയവെയാണ് അമിതാഭ് ബച്ചന് ആര്യ ദയാലിന്റെ പാട്ടു കേള്ക്കാനിടയായത്. ആശുപത്രിയില് എത്തിയിട്ട് ഇത്രയധികം സന്തോഷം ലഭിച്ച വേറെ ദിവസമുണ്ടായിട്ടില്ല എന്നു കുറിച്ച് താരം പാട്ട് പങ്കുവയ്ക്കുകയും ചെയ്തു.
'എന്റെ സുഹൃത്താണ് ഈ വിഡിയോ എനിക്ക് അയച്ചു തന്നത്. ആരാണ് ഈ പെണ്കുട്ടിയെന്ന് എനിക്കറിയില്ല. പക്ഷേ ഒരു കാര്യം ഞാന് ഉറപ്പിച്ചു പറയാം. ഇവള് പ്രത്യേക കഴിവുള്ളവളാണ്. ഈശ്വരന് അനുഗ്രഹിക്കട്ടെ. കര്ണാട്ടിക്കും വേസ്റ്റേണ് മ്യൂസിക്കും മിക്സ് ചെയ്യുക എന്നത് എളുപ്പമല്ല. പക്ഷേ എത്ര സുന്ദരമായാണ് ഈ പെണ്കുട്ടി അത് ചെയ്തിരിക്കുന്നത് എന്നു നോക്കൂ. രണ്ടിലും അല്പം പോലും മായം ചേര്ക്കാത്ത മനോഹരമായ പാട്ട്. കുഞ്ഞേ, നിന്റെ നാദം എത്ര ധന്യം. എന്റെ ആശുപത്രിക്കിടക്കയിലെ നിറമില്ലാത്ത വിരസമായ ഒരു ദിനത്തെയാണ് നീ തെളിച്ചമുള്ളതാക്കിയത്' പാട്ട് പങ്കുവച്ച് അമിതാഭ് ബച്ചന് കുറിച്ചു.
ആര്യ ദയാല് എന്ന കണ്ണൂരുകാരി പെണ്കുട്ടിക്ക് ലഭിച്ച അംഗീകാരമാണ് ഈ അഭിനന്ദനം.
'സഖാവ്' എന്ന കവിത പാടി കയ്യടി നേടിയ ആര്യയ്ക്ക് ആരാധകരും ഏറെയാണ്. 2017ല് പുറത്തിറങ്ങിയ എഡ്വാര്ഡ് ക്രിസ്റ്റഫറിന്റെ 'ഷെയ്പ് ഓഫ് യു' കൗമാരക്കാരുടെ ഇഷ്ട ആല്ബമാണ്. ഈ ആല്ബത്തിന്റെ നിരവധി കവര് പതിപ്പുകള് പുറത്തിറങ്ങിയിട്ടുമുണ്ട്.
