ചെറുതും വലുതുമായ വേഷങ്ങളിലൂടെ മലയാളത്തിന്റെ പ്രിയങ്കരനായ താരമാണ് നന്ദലാല് കൃഷ്ണമൂര്ത്തി എന്ന നന്ദു. സംവിധായകനും നടനുമായിരുന്ന വേണു നാഗവള്ളിയുമായുള്ള പരിചയത്തിലൂടെയാണ് നന്ദു സിനിമയിലേക്കെത്തിയത്. ഇപ്പോള് അന്തരിച്ച മലയാളത്തിന്റെ പ്രിയനടി കല്പ്പനയെ കുറിച്ചുള്ള നന്ദുവിന്റെ തുറന്നു പറച്ചിലാണ് ശ്രദ്ധേയമാകുന്നത്. സ്പിരിറ്റ് എന്ന മോഹന്ലാല് ചിത്രത്തില് ഇരുവരും ഭാര്യാഭര്ത്താക്കന്മാരായി അഭിനയിച്ചിരുന്നു.
'' സ്പിരിറ്റില് ഞങ്ങള് ഭാര്യ ഭര്ത്താക്കന്മാരായി ആണ് അഭിനയിച്ചത്. ഇത്രയും വയ്യാത്ത കല്പനയെ തൂക്കിയിട്ട് അടി കൊടുക്കുന്ന സീനുകള് ഉണ്ടല്ലോ സ്പിരിറ്റില്, എനിക്ക് അതൊക്കെ ബുദ്ധിമുട്ടായിരുന്നു. കാരണം അവര്ക്ക് ഒരുപാട് ശാരീരിക പ്രശ്നങ്ങള് ഉണ്ടായിരുന്നു. ഇടിക്കുകയും വേണം അവര്ക്ക് കൊള്ളാനും പാടില്ല. കല്പന പറയും, അങ്ങനെ ചിന്തിക്കുകയേ വേണ്ട സ്വാമി, നല്ല അടി തന്നോ എന്നു. ഞാന് ശ്രദ്ധിച്ചും ടെന്ഷനിലും അഭിനയിച്ചതാണത്.
കല്പനയുമായി എനിക്ക് വളരെ അടുത്ത ബന്ധമാണ് ഉള്ളത്. ഒരുപാട് ശാരീരീക പ്രശ്നങ്ങള് ഉണ്ടായിരുന്നു കല്പനക്ക്. ശരീരത്തില് നീര്ക്കെട്ട്, ഇസ്നോഫീലിയ അങ്ങനെ. ഞങ്ങള് ഒരുമിച്ചു അമേരിക്കന് ട്രിപ്പ് ഒക്കെ പോയിട്ടുണ്ട്. എന്നെ സാമി എന്നാണ് വിളിക്കുന്നത്. ഞങ്ങള് ഇടക്കൊക്കെ തമിഴില് സംസാരിക്കും. എവിടെ പോയാലും പറയും ' എനിക്ക് താമസിക്കാന് നല്ലൊരു റൂം ശെരിയാക്കി തരണേ, നല്ലൊരു വണ്ടി ഏര്പ്പാടാക്കി തരണേ എന്നൊക്കെ. കല്പനക്ക് എ സി ഇടുന്നത് ഇഷ്ടമില്ല, അതിനു അനുസരിച്ചു ഞാന് സൗകര്യങ്ങള് ചെയ്തു കൊടുക്കും.
ഹൈദരാബാദില് സിനിമാ ചിത്രീകരണത്തിനിടെയായിരുന്നു ആകസ്മികമായുള്ള കല്പനയുടെ മരണം. മൂന്നൂറിലേറെ സിനിമകളില് അഭിനയിച്ചിട്ടുള്ള കല്പനയെ തേടി ഒടുവില് ദേശീയ പുരസ്കാരവും എത്തിയിരുന്നു. എന്നാല് ഇത്രയും സിനിമകളില് അഭിനയിച്ചിട്ടും ലഭിക്കേണ്ട അംഗീകാരമോ പരിഗണനയോ കല്പനയ്ക്ക് സിനിമാ ലോകം കൊടുത്തിട്ടുണ്ടോ എന്നുള്ളത് സംശയമാണ്.'' നന്ദു പറയുന്നു.
