മാഡ്രിഡ്: ലോകഫുട്ബോളിലെ ഇതിഹാസ താരങ്ങളായ ക്രിസ്ത്യാനോ റൊണാള്ഡോയും ലിയോണെല് മെസ്സിയും ഒരുമിച്ച് ഒരു ടീമില് കളിക്കുക എന്ന ആരാധകര് കാത്തിരുന്ന ഈ വാര്ത്ത എത്ര നല്ല നടക്കാത്ത സ്വപ്നം തന്നെ. ക്രിസ്ത്യാനോ യുവന്റസ് വിടാനോ ബാഴ്സയിലേക്ക് ചേക്കേറാനോ സാധ്യതയില്ല. കഴിഞ്ഞയാഴ്ചയായിരുന്നു ക്രിസ്ത്യാനോ ഇറ്റലി വിടുകയാണെന്നും ബാഴ്സയിലേക്ക് ചേക്കേറിയേക്കുമെന്നും ഊഹാപോഹം തുടങ്ങിയത്. എന്നാല് ക്രിസ്ത്യാനോയ്ക്ക് ക്ലബ്ബ് വിടാന് താല്പ്പര്യമില്ലെന്ന് വന്നതോടെ പൊലിഞ്ഞു.
ക്രിസ്റ്റിയാനോ യുവന്റസ് വിടില്ലെന്നും ബാഴ്സയിലേക്ക് ചേക്കേറില്ലെന്നും താരത്തിന്റെ അടുത്തു നില്ക്കുന്നവരെ ഉദ്ധരിച്ച് സ്പാനിഷ് മാധ്യമമായ എഎസാണ് റിപ്പോര്ട്ട് ചെയ്തത്. വരുന്ന ട്രാന്സ്ഫര് വിപണിയില് ക്രിസ്റ്റ്യാനോയെ ഒഴിവാക്കാന് യുവന്റസ് ശ്രമിക്കുന്നു എന്നായിരുന്നു റിപ്പോര്ട്ടുകള്. സ്പാനിഷ് മാധ്യമപ്രവര്ത്തകന് ഗ്വല്ലെം ബലാഗ് ഇക്കാര്യം വെളിപ്പെടുത്തിയതോടെ ക്രിസ്ത്യാനോ ബാഴ്സയില് എത്തുമെന്നും മെസ്സിക്കൊപ്പം കളിക്കും എന്നായി അഭ്യൂഹങ്ങള്. എന്നാല് ക്രിസ്റ്റ്യാനോയുടെ സംഘം ഈ റിപ്പോര്ട്ടുകള് നിഷേധിച്ചതായാണ് വിവരം.
ക്രിസ്ത്യാനോയെ സ്വന്തമാക്കാന് ബാഴ്സിലോണയ്ക്ക് താല്പ്പര്യം ഉണ്ടായാല് തന്നെയും ടൂറിന് വിടാന് ക്രിസ്ത്യാനോയ്ക്ക് താല്പ്പര്യമില്ല എന്നതാണ് ഏറ്റവും പുതിയ വിവരം. 2022 വരെയാണ് ക്രിസ്റ്റ്യാനോയും യുവന്റമായുള്ള കരാര്. പ്രതിവര്ഷം 28 മില്യണ് യൂറോയാണ് പ്രതിഫലം. 2018 ല് ഇറ്റലിയില് എത്തിയ ക്രിസ്ത്യാനോയ്ക്ക് പക്ഷേ മൂന്നാമത്തെ ടീമിനൊപ്പം ഇതുവരെ ചാംപ്യന്സ് ലീഗില് കിരീടം നേടാനായിട്ടില്ല. സൂപ്പര്താരത്തെ ടീമിലെത്തിച്ച് യൂറോപ്പിലെ രാജാക്കന്മാരാകാനുള്ള മോഹം യുവന്റസിന് ഇതുവരെ സാധ്യമായിട്ടില്ല.
യുവന്റസിലെ രണ്ടാമത്തെ കൂടിയ പ്രതിഫലം വാങ്ങുന്ന മതിജ്സിന്റെ നാല് മടങ്ങാണ് ക്രിസ്റ്റ്യാനോയ്ക്ക് ലഭിക്കുന്നത്. കഴിഞ്ഞ രണ്ട് സീസണിലും ചാംപ്യന്സ് ലീഗ് നേടാന് താരത്തിനായിട്ടില്ല. ഇതോടെ താരം സൃഷ്ടിക്കുന്ന സാമ്പത്തിക ബാധ്യത മറികടക്കാനായി താരത്തെ വില്ക്കാന് ക്ലബ് തയ്യാറെടുക്കുന്നു എന്നാണ് റിപ്പോര്ട്ടുകള്. ഇതോടെ റൊണാള്ഡോയുടെ ഏജന്റിനോട് താരത്തിനായി പുതിയ ക്ലബ് അന്വേഷിക്കാന് യുവന്റസ് ആവശ്യപ്പെട്ടു എന്നായിരുന്നു റിപ്പോര്ട്ടില് പറഞ്ഞിരുന്നത്. എന്നാല് മാഞ്ചസ്റ്ററിനും റയല് മാഡ്രിഡിനും ശേഷം തന്റെ മൂന്നാമത്തെ ക്ലബിനൊപ്പം ചാമ്പ്യന്സ് ലീഗ് ജയിക്കുകയാണ് ക്രിസ്റ്റ്യാനോ ലക്ഷ്യം വെക്കുന്നത്. മറ്റുള്ള റിപ്പോര്ട്ടുകളെല്ലാം വ്യാജമാണെന്നും എഎസ് റിപ്പോര്ട്ട് ചെയ്യുന്നു.
