അന്തരിച്ച സംവിധായകന് സച്ചിയുടെ അവസാന ചിത്രമായ അയ്യപ്പനും കോശിയിലെ ദൈമകളേ എന്ന ഗാനത്തിന്റെ ഖെക്കോര്ഡിങ് പൂര്ത്തിയാക്കിയിട്ട് ഇന്ന് ഒരു വര്ഷം തികയുകയാണ്. കഴിഞ്ഞ വര്ഷം രാജിവ് രവിയുടെ കളക്ടീവ് സ്റ്റുഡിയോയില് വെച്ചായിരുന്നു ഗാനത്തിന്റെ റെക്കോര്ഡിങ്. ജേക്സ് ബിജോയ്യുടെ സംഗീതത്തില് അട്ടപ്പാടി സ്വദേശി നഞ്ചിയമ്മയാണ് പാട്ടിനു വരികളൊരുക്കി ആലപിച്ചത്.
ഇപ്പോള് ഗാനത്തിന്റെ ഒന്നാം വാര്ഷികത്തില് സച്ചിയോടുള്ള ആദരസൂചകമായി ചിത്രത്തിന്റെ അണിയറപ്രവര്ത്തകര് ചേര്ന്നൊരു വിഡിയോ പുറത്തിറക്കിയിരിക്കുകയാണ് ഇപ്പോള്. സിനിമയുടെ ലൊക്കേഷനില് നിന്നുള്ള കാഴ്ചകളാണ് വിഡിയോയില് ഉള്പ്പെടുത്തിയിരിക്കുന്നത്. സച്ചിയുടെ ഓര്മകളുണര്ത്തുന്ന ദൃശ്യങ്ങളാണ് അവയെല്ലാം. സംഗീതസംവിധായകന് ജേക്സ് ബിജോയ്യുടെ യൂട്യൂബ് ചാനല് വഴിയാണ് വിഡിയോ റീലീസ് ചെയ്തത്.
'ദൈവമകളെ എന്ന ഗാനം നഞ്ചിയമ്മ പാടി സച്ചിയേട്ടന് കേട്ടിട്ട് ഇന്നേക്ക് ഒരു വര്ഷം തികയുന്നു. ആദ്യമായി സ്റ്റുഡിയോയുടെ ഉള്ളില് വച്ച് ഈ ഗാനം കേട്ട് കഴിഞ്ഞു സച്ചിയേട്ടന് പറഞ്ഞ വാക്കുകള് ഇന്നും എന്റെ മനസ്സിലുണ്ട്. ആ മുഖം മായാതെ ഹൃദയത്തില് ഉണ്ട്. ആ പച്ചയായ മനുഷ്യന്റെ... കലാകാരന്റെ.... നന്മയുള്ള മനസ്സിന്റെ ഉടമയായ എന്റെ സച്ചിയേട്ടന്റെ ഓര്മകള്ക്കു മുന്പില് ഞങ്ങള് ഈ ഗാനം സമര്പ്പിക്കുന്നു'.- പാട്ട് പങ്കുവച്ച് ജേക്സ് ബിജോയ് കുറിച്ചു.
