മാഡ്രിഡ്: ബ്രസീലിന്റെ സ്ട്രൈക്കര് ഗബ്രിയേല് ജീസസിനെ സ്വന്തമാക്കാനൊരുങ്ങി സ്പാനിഷ് ഫുട്ബോള് ക്ലബ് ബാഴ്സലോണ. ഇംഗ്ലീഷ് പ്രീമി യബ് മാഞ്ചസ്റ്റര് സിറ്റിയുടെ താരമാണു ജീസസ്. അര്ജന്റീനയുടെ സൂപ്പര് താരം ലയണല് മെസി ബാഴ്സ വിടാനൊരുങ്ങുന്നെന്ന വാര്ത്തകള് സജീവമായി നില്ക്കേയാണു പുതിയ കരാറിനെ കുറിച്ചുള്ള വിവരങ്ങള് പുറത്തുവരുന്നത്.
ചാമ്പ്യന്സ് ലീഗ് ക്വാര്ട്ടര് ഫൈനലില് ബയേണ് മ്യൂണിക്കിനോട് 8-2 നു തോറ്റതിനു പിന്നാലെ ബാഴ്സ കോച്ച് ക്വികെ സെറ്റിയന് സ്പോര്ട്ടിങ് ഡയറക്ടര് എറിക് അബിദാല് എന്നിവരെ പുറത്താക്കി. സെറ്റിയന്റെ പകരക്കാരനായി വന്ന റൊണാള്ഡ് കൊയ്മന് യുറുഗ്വേക്കാരന് സ്ട്രൈക്കര് ലൂയിസ് സുവാരസ് അടക്കമുള്ള വെറ്ററന് താരങ്ങളോടു ക്ലബ് വിടാന് നിര്ദേശിച്ചിരുന്നു. അദ്ദേഹം പക്ഷേ മെസിയോടു തുടരാന് ആവശ്യപ്പെട്ടിരുന്നു.
സുവാരസിനു പകരക്കാരനായാണു ജീസസിനെ ബാഴ്സ സ്വന്തമാക്കാന് ശ്രമിക്കുന്നത്. സുവാരസ് തന്റെ പഴയ ക്ലബായ അയാക്സിലേക്കു മടങ്ങുമെന്നാണു സൂചന. ബാഴ്സയിലെ തന്റെ ഭാവി മെസി എടുക്കുന്ന തീരുമാനം അനുസരിച്ചാകുമെന്നു മാത്രമാണു സുവാരസ് ഇതുവരെ പ്രതികരിച്ചത്. 23 വയസുകാരനായ ജീസസ് സുവാരസ് പത്ത് വയസ് ഇളയതാണ്. ജീസസിനു സിറ്റിയുമായി 2023 വരെ കരാറുണ്ട്.
2016 സീസണിലാണു ബ്രസീല് താരം സിറ്റിയുടെ ഭാഗമായത്. കഴിഞ്ഞ നാലു സീസണുകളിലായി 152 മത്സരങ്ങളില്നിന്ന് 68 ഗോളുകളടിക്കാന് കൊയ്മാനായി. സിറ്റി തുടര്ച്ചയായി രണ്ടുവട്ടം പ്രീമിയര് ലീഗ് കിരീടം നേടാനും (2017-18, 2018-19) ജീസസ് കാരണക്കാരനായി. ബ്രസീലിലെ വിഖ്യാതമായ പാല്മീറാസ് ക്ലബിലാണു ജീസസ് കളിച്ചു തുടങ്ങിയത്. 83 മത്സരങ്ങളിലായി 28 ഗോളുകളടിച്ച ശേഷമാണു ജീസസ് ലണ്ടനിലേക്കു വിമാനം കയറിയത്.
അതിനിടെ മെസിയും സുവാരസും ബാഴ്സലോണയിലെ ഒരു റസ്റ്റോറന്റില് ഒരുമിച്ചെത്തിയതു സാമൂഹിക മാധ്യമങ്ങളില് സജീവ ചര്ച്ചയായി. കോയ്മാന് അധികാരമേറ്റ ശേഷം ആദ്യമായാണു മെസിയും സുവാരസും തമ്മില് കാണുന്നത്. ഇരുവരും അടുത്ത സുഹൃത്തുക്കളായതിനാല് കൂടിക്കാഴ്ചയ്ക്കു കളിയെഴുത്തുകാര് വലിയ പ്രാധാന്യം നല്കുന്നുണ്ട്. കൂടിക്കാഴ്ചയ്ക്കു ശേഷമാണു മെസിയുടെ തീരുമാനം തന്നെയും ബാധിക്കുമെന്നു സുവാരസ് പറഞ്ഞത്.
അഭിഭാഷകന് അലഹാന്ഡ്രോ ബാല്ബി മുഖേനായാണു സുവാരസ് നിലപാട് വ്യക്തമാക്കിയത്. മെസിയില്ലാതെ സുവാരസ് ബാഴ്സയില് തുടരില്ലെന്നും ബാല്ബി വ്യക്തമാക്കി. സെറ്റിയനു കീഴില് നിറംമങ്ങിയ ഫ്രഞ്ച് താരം അന്റോണി ഗ്രീസ്മാനെയാണ് ആക്രമണത്തിന്റെ കുന്തമുനയായി കൊയ്മന് കാണുന്നത്. വിങ്ങറല്ലാത്ത ഗ്രീസ്മാനെ അദ്ദേഹത്തിന്റെ ശൈലിക്കു വിപരീതമായി കളിപ്പിച്ചതാണു പ്രകടനം പിന്നോട്ടാകാന് കാരണമെന്നു കൊയ്മന് നിരീക്ഷിച്ചിരുന്നു. ഹോളണ്ടിന്റെ മധ്യനിര താരം ഡോണി വാന് ഡി ബീക്കിനെ ക്ലബിലെത്തിക്കാനും കൊയ്മന് ശ്രമം തുടങ്ങിയിരുന്നു.
അയാക്സ് ആംസ്റ്റര്ഡാമിന്റെ താരമായ ബീക്കിനു വേണ്ടി 50 ദശലക്ഷം യൂറോ ബാഴ്സ വാഗ്ദാനം ചെയ്തു. ബീക്കെത്തിയാല് മധ്യനിരയുടെ ദൗര്ബല്യം മാറിക്കിട്ടുമെന്നാണു കരുതുന്നത്. സുവാരസ് ബാഴ്സ വിടാന് അത്ര താല്പര്യം കാണിക്കുന്നില്ല. യുറുഗ്വേ താരത്തിനു ബാഴ്സയുമായുള്ള കരാര് പ്രകാരം ഒരു വര്ഷം കൂടി ബാക്കിയുണ്ട്. കൊയ്മാന് ഹോളണ്ട് കോച്ചായിരിക്കേയാണു ബീക്കിനെ താരമായി ഉയര്ത്തുന്നത്. പഴയ ഗുരു വിളിച്ചാല് താരം പോകുമെന്നാണു ബീക്കിനോട് അടുത്ത വൃത്തങ്ങള് സൂചിപ്പിക്കുന്നത്.
ബീക്കിന്റെ മികവിലാണ് അയാക്സ് 2018-19 സീസണില് ഇരട്ടക്കിരീടം നേടിയതും ചാമ്പ്യന്സ് ലീഗ് സെമി ഫൈനലില് കളിച്ചതും. സഹ താരങ്ങളായ ഫ്രെങ്കി ഡി ജോങ്, മതിയാസ് ഡി ലൈറ്റ് എന്നിവര് കൂടുമാറിയെങ്കിലും ബീക് അയാക്സില് തുടരുകയായിരുന്നു. സുവാരസിനൊപ്പം ഐവാന് റാക്കിറ്റിച്ച്, ആര്ടുറോ വിദാല് തുടങ്ങിയ മധ്യനിരക്കാരോടും സാമുവല് ഉംറ്റിറ്റിയോടും ക്ലബ് വിടാന് നിര്ദേശം നല്കി. ഇന്റര് മിലാനില്നിന്ന് സ്ട്രൈക്കര് ലൗറ്റാരോ മാര്ട്ടിനെസിനെ കൊണ്ടു വരാനുള്ള ശ്രമങ്ങള് ബാഴ്സ നടത്തുന്നുണ്ട്. 2007 മുതല് 2011 വരെ അയാക്സിനായി കളിച്ച സുവാരസ് താരം ലിവര്പൂളിലേക്കു മാറി. 2014 ല് ബാഴ്സയിലെത്തി. മെസി - സുവാരസ് - നെയ്മര് ത്രയം പ്രസിദ്ധമായിരുന്നു.
