തിരുവനന്തപുരം: വെഞ്ഞാറമൂട് ഇരട്ടക്കൊലപാതക കേസില് കോണ്ഗ്രസ് നേതൃത്വത്തിനെതിരെ ആരോപണവുമായി ഡി.വൈ.എഫ്.ഐ നേതാവ് അഡ്വ.എ.എ റഹീം. കൊലപാതകത്തിലെ ഗൂഢാലോചനയില് ഡി.സി.സി നേതാക്കള്ക്ക് പങ്കുണ്ട്. അന്വേഷണം വഴിതിരിച്ചുവിടാന് കൊല്ലപ്പെട്ടവര്ക്കെതിരെ വ്യാജ പ്രചാരണം നടത്തുകയാണ്. ഇത്തരം അരുംകൊലകളില് ആരും നടത്താത്ത പ്രചാരണമാണ് കോണ്ഗ്രസ് നടത്തുന്നത്. ഇരകളെ വ്യക്തിഹത്യ ചെയ്യുന്നതിനെതിരെ നിയമനടപടി സ്വീകരിക്കുമെന്നും റഹീം പറഞ്ഞു.
ബ്ലോക്ക് നേതാവ് പുരുഷോത്തമന് നായര് ഗൂഢാലോചനയില് പങ്കെടുത്തു. ഇന്നലെ അറസ്റ്റിലായ ബിജു എന്ന ഉണ്ണി ഐ.എന്.ടി.യു.സി വാര്ഡ് പ്രസിഡന്റാണ്. പ്രതികളെ രക്ഷപ്പെടുത്താനുള്ള ശ്രമമാണ് കോണ്ഗ്രസ് നേതാക്കള് നടത്തുന്നത്. പ്രതികളെ തള്ളിപ്പറയാന് പോലീസും കോണ്ഗ്രസ് തയ്യാറായിട്ടില്ല. അന്വേഷണം ആരംഭിച്ചപ്പോള് തന്നെ അന്വേഷണ സംഘത്തിനെതിരെ ആരോപണം ഉന്നയിക്കുന്നത് പ്രതികളെ സഹായിക്കാനാണ്.
കൊല്ലപ്പെടുമ്പോള് ഇരകള് വാളുകള് കൈവശം വച്ചിരുന്നില്ല. അത്തരം ആരോപണങ്ങള് പ്രതികളെ സഹായിക്കുമെന്നും എ.എ റഹീം പറഞ്ഞു. ഇരകള് വാളുകള് കൈവശം വച്ചത് സ്വയരക്ഷയ്ക്കാണെന്ന സി.പി.എം ജില്ലാ സെക്രട്ടറി ആനാവൂര് നാഗപ്പന്റെ പ്രസ്താവനയെ തിരുത്തുന്നതാണ് റഹീമിന്റെ പരാമര്ശം.
