സംസ്ഥാനത്ത് ആരും ശ്രദ്ധിക്കപ്പെടാതെ കത്തിക്കയറുന്ന കോവിഡ് മഹാമാരി സര്ക്കാരിനെതിരേ തെരുവില് നടക്കുന്ന പ്രതിഷേധവുമായി കൂടിക്കുഴഞ്ഞ് കേരളത്തിന്റെ സ്ഥിതി കൂടുതല് വഷളാക്കുകയാണെന്ന് പ്രമുഖ കോണ്ഗ്രസ് നേതാവ് ശശി തരൂര്. സര്ക്കാരിന്റെ ശരിയായ രീതിയിലല്ലാത്ത പരിപാലനവും കെടുകാര്യസ്ഥതയും ദിനംപ്രതി കോവിഡ് കണക്കുകള് കുത്തനെ ഉയരുന്നതിലേക്ക് നയിക്കുന്നതായും സര്ക്കാരിന്റെ സാമ്പത്തീക സ്ഥിതി മോശമായ സാഹചര്യത്തില് മുഖ്യമന്ത്രിയുടെ ഓഫീസ് ധവളപത്രം ഇറക്കണമെന്നുമാണ് ശശി തരൂര് ആവശ്യപ്പെട്ടിരിക്കുന്നത്.
ഇന്നലെ ട്വീറ്റിലൂടെയായിരുന്നു തന്റെ അഭിപ്രായം ശശി തരൂര് പങ്കുവെച്ചിരിക്കുന്നത്. സ്വര്ണ്ണക്കടത്തുമായി ബന്ധപ്പെട്ട് സംസ്ഥാനത്ത് കോവിഡ് നിയന്ത്രണം പോലും നോക്കാതെ പ്രതിപക്ഷ പാര്ട്ടികളുടെ ശക്തമായ സമരമാണ് നടക്കുന്നത്. എട്ടു ദിവസമായി സംസ്ഥാനത്ത് ഉടനീളം കോണ്ഗ്രസും ബിജെപിയും സര്ക്കാരിനെതിരേ നടത്തുന്ന പ്രതിഷേധം പോലീസ് ഏറ്റുമുട്ടലിലാണ് അവസാനിക്കുന്നത്. വിവിധ ജില്ലാ ആസ്ഥാനങ്ങളില് സമരങ്ങള് പതിവായി മാറിയതോടെ കോവിഡ് മാനദണ്ഡങ്ങളെല്ലാം കാറ്റില് പറക്കുകയാണ്. തുടര്ച്ചയായി രണ്ടു ദിവസമായി കോവിഡ് രോഗികളുടെ എണ്ണം 4000 കടന്നു. മരണം 500 കടന്നിരിക്കുകയാണ്.
ശക്തമായ പ്രതിഷേധം നടക്കുന്ന തിരുവനന്തപുരം ജില്ലയില് പ്രതിദിന രോഗബാധിതരുടെ എണ്ണം ആയിരത്തിലേക്കു കടന്നിരിക്കുകയാണ്. ഇന്നലെ സ്ഥിരീകരിച്ചത് 926 പേര്ക്ക്. 12 മരണം കൂടി റിപ്പോര്ട്ട് ചെയ്തതോടെ ആകെ മരണം 501 ആയി. 3849 പേര്ക്കു സമ്പര്ക്കത്തിലൂടെയാണു രോഗം ബാധിച്ചത്. 410 പേരുടെ സമ്പര്ക്ക ഉറവിടം വ്യക്തമല്ല. 102 ആരോഗ്യ പ്രവര്ത്തകര്ക്കും രോഗം ബാധിച്ചു. കോവിഡ് പ്രൊട്ടോക്കോള് ലംഘിച്ച് സമരം നടത്തുന്നവര്ക്കെതിരേ കര്ശന നടപടിയെടുക്കാന് സംസ്ഥാന സര്ക്കാരിനോടു ഹൈക്കോടതി നിര്ദേശിച്ചിരുന്നു.
ദുരന്തനിവാരണ നിയമപ്രകാരം നടപടിയെടുക്കാനാണു ഡിവിഷന് ബെഞ്ചിന്റെ നിര്ദേശം. പൊതുസ്ഥലത്തു കൂട്ടംകൂടിയുള്ള പ്രതിഷേധങ്ങളും പ്രകടനങ്ങളും വിലക്കിക്കൊണ്ട് െഹെക്കോടതി ജൂെലെ 15-ന് ഉത്തരവിട്ടിരുന്നു. മന്ത്രി കെ.ടി. ജലീലിന്റെ രാജിആവശ്യത്തില് നിന്നു പിന്നോട്ടില്ലാതെ പ്രതിപക്ഷ യുവജനസംഘടനകള് തുടരുന്ന പ്രതിഷേധത്തില് സംസ്ഥാനത്തെ തെരുവുകള് യുദ്ധക്കളമായി മാറിയിരിക്കുകയാണ്. കോണ്ഗ്രസിനും യൂത്ത് കോണ്ഗ്രസിനും കെഎസ് യുവിനും ബിജെപിയ്ക്കും യുവമോര്ച്ചയ്ക്കും പിന്നാലെ സ്വര്ണ്ണക്കടത്ത് കേസില് കേന്ദ്രവിദേശകാര്യസഹമന്ത്രി വി. മുരളീധരന് സ്വര്ണക്കടത്ത് കേസ് അട്ടിമറിക്കാന് ശ്രമിക്കുകയാണെന്ന് ആരോപിച്ച് ഡി.െവെ.എഫ്.ഐ.യും മാര്ച്ച് നടത്തി.
