നടി ആക്രമിക്കപ്പെട്ട കേസിലെ കൂറുമാറ്റത്തിനെതിരെ താരങ്ങളെ വിമര്ശിച്ച് നിരവധി താരങ്ങളാണ് രംഗത്ത് വന്നത്. നടിമാരായ രേവതിയും റിമ കല്ലിങ്കലും, രമ്യ നമ്പീശനും എല്ലാം പ്രതികരണവുമായി രംഗത്ത് വന്നിരുന്നു. ഇതിനു പിന്നാലെയാണ് സെലിബ്രിറ്റി മേക്ക് അപ് ആർട്ടിസ്റ്റ് രഞ്ജു രഞ്ജിമാർ കൂറുമാറിയ നടി ഭാമയ്ക്കെതിരെ രൂക്ഷ വിമർശനമുന്നയിച്ച് രംഗത്തെത്തിയത്. ഭാമയ്ക്കെതിരെ വിവിധ ഭാഗത്ത് നിന്ന് വിമർശനങ്ങൾ ശക്തമായപ്പോൾ ഇൻസ്റ്റാഗ്രാമിലെ തൻ്റെ കമൻ്റ് ബോക്സും താരം പൂട്ടുകയുണ്ടായി.
ഇപ്പോഴിതാ തനിക്കെതിരെ ഭീഷണി കോളുകൾ വന്ന വിവരം പുറത്ത് വിട്ടിരിക്കുകയാണ് സെലിബ്രിറ്റി മേക്ക് അപ് ആർട്ടിസ്റ്റ് രഞ്ജു രഞ്ജിമാർ. ഭാമയെ വിമർശിച്ച് പോസ്റ്റിട്ടതിന് പിന്നാലെ തനിക്ക് ഭീഷണി കോളുകൾ വന്നെന്നും ആർക്കും തന്നെ ഭയപ്പെടുത്താനോ ഒന്നും ചെയ്യുവാനോ കഴിയില്ലെന്ന് രഞ്ജു പറയുന്നു.
എന്നും അവൾക്കൊപ്പമാണ്, സത്യത്തിനൊപ്പം മാത്രമേ താൻ നിൽക്കുകയുള്ളു. തൻ്റെ മകളെ പോലെ കാണുന്ന കുട്ടിയുടെ വിഷയവുമായി ബന്ധപ്പെട്ട് താൻ ഫേസ്ബുക്കിൽ അഭിപ്രായം പങ്കുവെച്ച ശേഷം സിനിമാ മേഖലയിൽ നിന്നുൾപ്പെടെയുള്ളവർ തന്നെ ഫോണിൽ വിളിച്ച് ഭീഷണിപ്പെടുത്തുന്നതായി രഞ്ജു രഞ്ജിമാർ യൂട്യൂബിൽ പങ്കുവെച്ച വീഡിയോയിലൂടെ വ്യക്തമാക്കി.
ഇതൊന്നും കണ്ട് താൻ കരയാനോ പരാതിപ്പെടാനോ പോകുന്നില്ലെന്നും ദൈവം എന്ന സത്യത്തെ താൻ അടിയുറച്ച് വിശ്വസിക്കുന്നുണ്ട്. ആ വിശ്വാസം എന്നോടൊപ്പം എന്നും ഉണ്ടാകുമെന്നും രഞ്ജു പങ്കുവെച്ച വീഡിയോയിൽ പറയുന്നു. ആർക്കും തന്നെ ഒന്നും ചെയ്യാൻ പറ്റില്ലെന്നും തൻ്റെ ഭാഗത്ത് ന്യായമുണ്ടെന്ന് പൂർണ്ണ വിശ്വാസമുണ്ടെന്നും രഞ്ജു പറയുന്നു.
എന്നും നീതിയോടൊപ്പം തന്നെയാണ് താൻ നിൽക്കുന്നതെന്നും അനീതിയ്ക്കൊപ്പം നിന്നിട്ടുള്ള ഒരു പണവും തനിക്ക് വേണ്ടെന്നും അത് തനിക്കാവശ്യമില്ലെന്നും രഞ്ജു വീഡിയോയിൽ വ്യക്തമാക്കുന്നു. സത്യം ജയിക്കട്ടെ എന്നും ഓരോരുത്തരുടെയും പ്രാർത്ഥനയും പിന്തുണയും അവളോടൊപ്പം ഉണ്ടാകണമെന്ന് ആത്മാർത്ഥമായി ആഗ്രഹിക്കുന്നെന്നും രഞ്ജു.
