ചെന്നൈ: കരിയറില് ഇനിയാര്ക്കും എത്തിപ്പിടിക്കാനാകാത്ത റെക്കോര്ഡുകള് സ്വന്തമാക്കിയാണ് ഇന്ത്യയുടെ പ്രിയപ്പെട്ട ഗായകന് എസ്.പി ബാലസുബ്രഹ്മണ്യം വിട പറഞ്ഞിരിക്കുന്നത്. 54 വര്ഷം നീണ്ട കരിയറില് 16 ഭാഷകളില് 40,000ത്തില് അധികം ഗാനങ്ങള്ക്ക് അദ്ദേഹം ശബ്ദം പകര്ന്നു. അതായത് വര്ഷത്തില് ശരാശരി 741 പാട്ടുകള് അദ്ദേഹം പാടി. ദിവസക്കണക്ക് നോക്കിയാല് ഒരു ദിവസം രണ്ട് പാട്ട് വീതം.
ഒരു ദിവസം രണ്ട് പാട്ട് എന്നത് എസ്.പി.ബിയെ സംബന്ധിച്ച് ഒരു വെല്ലുവിളിയേ അല്ല. കാരണം, 12 മണിക്കൂര് കൊണ്ട് അദ്ദേഹം 21 കന്നഡ ഗാനങ്ങള് പാടി റെക്കോര്ഡ് ചെയ്തിട്ടുണ്ട്. തമിഴില് 19 പാട്ടുകളും ഹിന്ദിയില് 16 പാട്ടുകളും ഒരു ദിവസം കൊണ്ട് അദ്ദേഹം പാടി റെക്കോര്ഡ് ചെയ്തിട്ടുണ്ട്.
ആന്ധ്രാപ്രദേശിലെ നെല്ലൂരില് എസ്.പി സാമ്പമൂര്ത്തിയുടെയും ശകുന്തളാമ്മയുടെയും മകനായാണ് എസ്.പി ബാലസുബ്രഹ്മണ്യത്തിന്െ്റ ജനനം. അടുപ്പക്കാര് എസ്.പി.ബിയെന്നും ബാലുവെന്നും വിളിക്കും. ഗായിക എസ്.പി ഷൈലജ അടക്കം രണ്ട് സഹോദരന്മാരും അഞ്ച് സഹോദരിമാരുമുണ്ട്. പിതാവ് സാമ്പമൂത്തി ഹരികഥാ കലാകാരനായിരുന്നു. നാടകങ്ങളിലും അദ്ദേഹം അഭിനയിച്ചിട്ടുണ്ട്.
ചെറുപ്പം മുതല് തന്നെ സംഗീതം എസ്.പി.ബിക്ക് കൂട്ടായി ഉണ്ടായിരുന്നു. ഇളയരാജ, ഗംഗൈ അമരന് സഹോദരന്മാര്ക്കൊപ്പം സംഗീത ട്രൂപ്പില് അംഗമായിരുന്നു. ശ്രീ ശ്രീ മര്യാദ രാമണ എന്ന തെലുങ്ക് സിനിമയില് പാടി 1967ലാണ് എസ്.പി.ബി സിനിമാ രംഗത്തേക്ക് കടന്നുവരുന്നത്. എസ്.പി.ബിയുടെ ഗുരു എസ്.പി കൊണ്ടകപാണിയാണ് മര്യാദ രാമണയുടെ സംഗീത സംവിധാനം നിര്വഹിച്ചത്.
എഴുപതുകളുടെ തുടക്കത്തില് എം.ജി.ആര് നായകനായ അടിമൈ പെണ് എന്ന സിനിമയിലൂടെ എസ്.പി.ബി തമിഴില് അരങ്ങേറി. എം.ജി.ആര് തന്നെയാണ് എസ്.പി.ബിയെ സംഗീത സംവിധായകന് കെ.വി മഹാദേവന് ശിപാര്ശ ചെയ്തത്. ഒരിക്കല് എ.വി.എം സ്റ്റുഡിയോയില് ചിത്രീകരണത്തിനിടെ വിശ്രമിക്കുകയായിരുന്ന എം.ജി.ആര് എസ്.പി.ബിയുടെ തെലുങ്ക് പാട്ട് കേള്ക്കുകയും തന്റെ ചിത്രമായ അടിമൈ പെണ്ണിലേക്ക് ശിപാര്ശ ചെയ്യുകയുമായിരുന്നു. അക്കാലത്ത് സ്റ്റുഡിയോയില് എ.സി സൗകര്യമില്ലാതിരുന്നതിനാല് ജാലകങ്ങള് തുറന്നിട്ടാണ് പാടിയിരുന്നത്. അങ്ങനെ എസ്.പി.ബിയുടെ തെലുങ്ക് പാട്ട് എം.ജി.ആര് കേള്ക്കുകയും തന്റെ അസിസ്റ്റന്റിനെ വിട്ട് ആ ഗായകന് ആരാണെന്ന് എം.ജി.ആര് അന്വേഷിക്കുകയുമായിരുന്നു.
എം.ജി.ആറിന് പുറമെ അക്കാലത്തെ സൂപ്പര് താരങ്ങളായ ശിവാജി ഗണേശന്, ജമിനി ഗണേശന് തുടങ്ങിയവര്ക്ക് വേണ്ടിയും എസ്.പി.ബി പാടിയിട്ടുണ്ട്. അവര്ക്ക് ശേഷം വന്ന തലമുറയിലെ രജനീകാന്ത്, കമല്ഹാസന് മുതല് ബോളിവുഡില് സല്മാന് ഖാന് വേണ്ടി വരെയും എസ്.പി.ബി ശബ്ദം നല്കി. 1981ല് ആദ്യമായി പാടിയ ഏക് ദുജേ കേ ലിയെ എന്ന ഹിന്ദി സിനിമയ്ക്ക് തന്നെ എസ്.പി.ബി ദേശീയ പുരസ്കാരം നേടി. പതിറ്റാണ്ടുകളോളം സൂപ്പര് താരം രജനീകാന്തിന്റെ സിനിമകളില് അദ്ദേഹത്തിന്റെ ഇന്ഡ്രഡൊക്ഷന് സീന് എസ്.പി.ബിയുടെ പാട്ടോട് കൂടിയായിരുന്നു.
