യുപിയില് അതി ദാരുണമായി ഒരു പെണ്കുട്ടി കൂടി കൊല്ലപ്പെട്ടിരിക്കുകയാണ്. പെണ്കുട്ടിയെ ബലാത്സംഗം ചെയ്ത് കൊലപ്പെടുത്തിയ സംഭവത്തില് വന് പ്രതിഷേധം അലയടിക്കുകയാണ്. ഈ സാഹചര്യത്തില് ഡോ. നെല്സണ് ജോസഫ് പങ്കുവെച്ച കുറിപ്പ് സോഷ്യല് മീഡിയകളില് ശ്രദ്ധേയമാവുകയാണ്. എവിടെയാണ് നീതിക്കുവേണ്ടിയുള്ള നിലവിളികള്?, എവിടെയാണ് പ്രതിഷേധത്തിന്റെ സ്വരം എന്നും അദ്ദേഹം ഫേസ്ബുക്ക് കുറിപ്പിലൂടെ ചോദിക്കുന്നു.
ഫേസ്ബുക്ക് കുറിപ്പിന്റെ പൂര്ണരൂപം,
എവിടെയാണ് നീതിക്ക് വേണ്ടിയുള്ള നിലവിളികള്?
എവിടെ പ്രതിഷേധത്തിന്റെ സ്വരം?
മയക്കുമരുന്ന് കേസില് ചോദ്യം ചെയ്യാന് വിളിപ്പിക്കപ്പെട്ട ബോളിവുഡ് നടിയുടെ കാറിന് പിറകെ പാഞ്ഞ് ഒപ്പമെത്തി ഓവര്ടേക് ചെയ്യുന്നതിനിടെ ചോദ്യം വിളിച്ചു കൂവുന്ന ആങ്കറെ കണ്ടിരുന്നു ഈയിടെ ഒരു ചാനലില്.
ഇന്നലെ വെളുപ്പിന് ഒരു മൃതദേഹം സംസ്കരിക്കപ്പെട്ടിട്ടുണ്ട് ഉത്തര്പ്രദേശില്.
എത്ര പേര് അതിനു പിന്നാലെ ഉണ്ടാവുമെന്ന് അറിയില്ല.
എന്.ഡി.ടി.വിയുടെ റിപ്പോര്ട്ട് വായിക്കുന്ന മനസാക്ഷിയുള്ള ഒരാള്ക്കും നെഞ്ചിലൊരു കല്ലെടുത്ത് വച്ചതുപോലൊരു തോന്നല് ഉണ്ടാവാതിരിക്കുമെന്ന് തോന്നുന്നില്ല.
വാര്ത്തയില് നിന്നുള്ള വിവരങ്ങള് ചുരുക്കി എഴുതുകയാണ്.
ഉത്തര് പ്രദേശില് ഹത്രാസില് നിന്നുള്ള പെണ്കുട്ടി ചൊവ്വാഴ്ച ഡല്ഹിയിലെ സഫ്ദര്ജങ്ങ് ആശുപത്രിയില് മരണമടഞ്ഞു. ഇന്നലെ രാത്രി തന്നെ അവളുടെ മൃതദേഹം സംസ്കരിക്കുകയും ചെയ്തു..
അത്രയും മാത്രം വായിച്ചതുകൊണ്ടായില്ല.
ഒന്നിലധികം ഒടിവുകളും നാക്കില് ആഴത്തിലുള്ള മുറിവുമടക്കം ക്രൂരമായ ആക്രമണം നേരിട്ടതിന്റെ ഒന്നിലധികം സൂചനകള് അവളുടെ ശരീരത്തിലുണ്ടായിരുന്നു.
അവളുടെ മരണത്തിനു ശേഷം കുടുംബത്തിനു നേരിടേണ്ടിവന്ന ദുരിതങ്ങളെക്കുറിച്ചുകൂടി അറിയുമ്പൊഴേ ചിത്രം പൂര്ണമാവുകയുള്ളൂ.
കുടുംബാംഗങ്ങള് പൊലീസിനോട് തര്ക്കിക്കുന്നതും അവളുടെ ശരീരം ഉത്തര്പ്രദേശിലേക്ക് കൊണ്ടുപോവുന്ന ആംബുലന്സിന്റെ മുന്നില് തടസമായി നിന്നും ബോണറ്റില് കെട്ടിപ്പിടിച്ച് മുന്നോട്ടുള്ള യാത്ര തടയാന് ശ്രമിച്ചുമൊക്കെ അവളെ അവസാനമായി ഒന്ന് കാണാനെങ്കിലും ശ്രമിക്കുന്ന ദൃശ്യങ്ങള്...
അവളുടെ അമ്മ നിസഹായയായി വഴിയിലിരുന്ന് നെഞ്ചത്തടിച്ച് കരയുന്ന ദൃശ്യങ്ങള്...
അവസാനം പൊലീസുകാര് ഉണ്ടാക്കിയ മനുഷ്യച്ചങ്ങലകൊണ്ട് മാദ്ധ്യമങ്ങളെയും മറ്റുള്ളവരെയും അകറ്റി അര്ദ്ധരാത്രി കഴിഞ്ഞ് സംസ്കാരം..
അവള് ഒരു ദളിത് പെണ്കുട്ടിയാണെന്ന് വായിച്ചിരുന്നു. അവള്ക്ക് വേണ്ടി ശബ്ദമുയര്ത്തുന്നതില് നിന്ന് അത് നിങ്ങളെ ഏതെങ്കിലും രീതിയില് പിന്നോട്ട് വലിക്കുന്നുവെങ്കില് കഷ്ടമെന്നേ പറയാനുള്ളൂ.
ഉത്തര്പ്രദേശില് കൊല്ലപ്പെടുന്ന ഒന്നാമത്തെ പെണ്കുട്ടിയല്ല അവള്..
അക്കമിട്ട് സംഭവങ്ങളെഴുതിയ ഒരു കുറിപ്പ് ഫേസ്ബുക്കില് കണ്ടിരുന്നു... ക്രൂരമായി പീഢിപ്പിക്കപ്പെട്ടതിന്റെയും കൊന്നതിന്റെയും വാര്ത്തകളടക്കമുള്ളൊരു കുറിപ്പ്..
ഒരിക്കല്ക്കൂടി ചോദിക്കുന്നു..
എവിടെയാണ് നീതിക്ക് വേണ്ടിയുള്ള നിലവിളികള്?
എവിടെ പ്രതിഷേധത്തിന്റെ സ്വരം?
ഉത്തര്പ്രദേശ് ഭരിക്കുന്നവരോട് എന്തിനാണ് അവളെ രാത്രിയുടെ മറവില് തിടുക്കപ്പെട്ട് മറവുചെയ്ത് ഒറ്റയ്ക്കാക്കിക്കളഞ്ഞതെന്ന് ചോദിക്കാന് നാക്ക് പൊങ്ങുന്നില്ലെങ്കില് പിന്നെ എന്തിനാണ് മനുഷ്യനാണെന്ന് പറഞ്ഞു നടക്കുന്നത്?
