ന്യുഡല്ഹി: ഇന്ത്യയെ വീണ്ടും ഞെട്ടിച്ചുകൊണ്ട് ഇന്ത്യന് ക്രിക്കറ്റ് ടീം നായകന് എംഎസ് ധോനിയുടെ മകള് അഞ്ചു വയസ്സുകാരി സിവയ്ക്ക് നേരെയും ബലാത്സംഗ ഭീഷണി. ചൊവ്വാഴ്ച ഐപിഎല്ലില് കൊല്ക്കത്ത നൈറ്റ് റൈഡേഴ്സിനോട് ധോനിയുടെ ടീമായ ചെന്നൈ സൂപ്പര്കിംഗ്സ് പരാജയപ്പെട്ടതിന് തൊട്ടു പിന്നാലെ ആയിരുന്നു സാമൂഹ്യമാധ്യങ്ങളില് ഭീഷണി എത്തിയത്.
ധോനിയുടെ ഭാര്യ സാക്ഷിയുടെ ഇന്സ്റ്റാഗ്രാം അക്കൗണ്ടിലായിരുന്നു ഭീഷണി സന്ദേശം. സംഭവം സാമൂഹ്യ മാധ്യമങ്ങളില് വന് ചര്ച്ചയാകുകയും സ്ത്രീപക്ഷത്ത് നിന്നും ശക്തമായ പ്രതിഷേധം ഉയര്ന്നു വരികയും ചെയ്തിട്ടുണ്ട്. രാജ്യത്തെ നയിക്കുന്നവര് എവിടെപ്പോയി? ധോനിയുടെ അഞ്ചു വയസ്സുകാരി സിവയ്ക്ക് നേരെ വരെ ബലാത്സംഗ ഭീഷണി ഉയരുന്നു നമ്മുടെ രാജ്യത്തിന് ഇത് എന്തുപറ്റി എന്നായിരുന്നു പ്രൈം മിനിസ്റ്റര് എന്ന ഹാഷ്ടാഗില് നടി നഗ്മ കുറിച്ചത്. ഇത് തന്നെ കര്ണാടകയിലെ ജയനഗര എംഎല്എ സൗമ്യാ റെഡ്ഡിയും ചോദിച്ചു.
ഇത് വൃത്തികേടാണെന്നും നമ്മുടെ രാജ്യത്തിന് എന്താണ് പറ്റിയതെന്നും സൗമ്യ കുറിച്ചു. സാമൂഹ്യ മാധ്യമങ്ങള് അസഹിഷ്ണുതയുടെ ഏറ്റവും വലിയ ഇടമായി മാറുന്നതിന് ഇതിനേക്കാള് മികച്ച ഉദാഹരണമില്ല എന്നായിരുന്നു രാജ്യസഭാ എംപി പ്രിയങ്കാ ചതുര്വേദി പ്രതികരിച്ചത്. എല്ലാ കളിയും ജയിക്കാന് കളിക്കാര് ആത്മാര്ത്ഥമായി ശ്രമിക്കാറുണ്ട്. കഠിനാദ്ധ്വാനം ചെയ്താലും അത് എല്ലായ്പ്പോഴും വിജയിക്കണമെന്നില്ല. അതിനെ വിമര്ശിക്കാന് ആരാധകര്ക്ക് അവകാശവുമുണ്ട്. എന്നാല് അതിന്റെ പേരില് ഈ രീതിയില് പെരുമാറുന്നത് ശരിയല്ലെന്ന് മുന് താരം ഇര്ഫാന് പത്താനും പറഞ്ഞു.
ടീം തോല്ക്കുന്നതില് കളിക്കാര്ക്ക് നേരെയും ടീമിനെതിരേയും ആരാധകരുടെ രോഷം തിരിയാറുണ്ട്. കളിക്കാരുടെ വീടിന് നേരെ കല്ലെറിയുക. ഇവരുടെ പോസ്റ്ററുകള് കീറിക്കളയുക, ചീത്തവിളിക്കുക എന്നിവയെല്ലാം സാധാരണമാണ്. എന്നാല് കളിക്കാരന്റെ മകളെ ലക്ഷ്യമിടുന്നത് കേട്ടുകേഴ്വി പോലും ഇല്ലാത്ത കാര്യമാണെന്ന്.
