കൊച്ചി: മലയാള സിനിമാ അഭിനേതാക്കളുടെ സംഘടനയായ അമ്മയില് അധികാരം ചിലരില് മാത്രം കേന്ദ്രീകരിച്ചുവെന്ന് നടി പാര്വതി തിരുവോത്ത്. സംഘടനയുടെ ജനറല് സെക്രട്ടറി ആക്രമിക്കപ്പെട്ട നടിക്കെതിരേയും ഡബ്ല്യു.സി.സിക്കെതിരെയും പരാമര്ശങ്ങള് നടത്തിയത് നേതൃത്വത്തിന്റെ നിരുപാധിക പിന്തുണയുളളതുകൊണ്ടാണെന്നും പാര്വ്വതി പറഞ്ഞു. റിപ്പോര്ട്ട് ടി.വിയോടായിരുന്നു പാര്വതിയുടെ പ്രതികരണം.
‘മറുവശത്ത് ഒന്നും കേള്ക്കാത്ത നിശ്ശബ്ദതയാണ്. മൂര്ത്തീ വിഗ്രഹങ്ങള് എല്ലാം ഓക്കെയാണെന്ന പ്രതീതി സൃഷ്ടിക്കുകയാണ്. ചോദ്യങ്ങള് ചോദിക്കേണ്ടത് അവരോടാണ്. ‘വിഗ്രഹങ്ങളുടെ’ നിശ്ശബ്ദത ഇനിയും അനുവദിച്ചുകൊടുക്കരുത്’, പാര്വതി പറഞ്ഞു. സിനിമ ആരുടേയും തറവാട് സ്വത്തല്ലെന്നും സര്ഗാത്മകമായി നേരിടാന് തങ്ങള്ക്ക് കെല്പുണ്ടെന്നും പാര്വതി കൂട്ടിച്ചേര്ത്തു.
അതേസമയം അമ്മയില് മാറ്റമുണ്ടാകുമെന്ന പ്രതീക്ഷയില്ലെന്ന് നടി രേവതിയും പ്രതികരിച്ചു. സംഘടനാ നേതൃത്വത്തിന് സ്ത്രീകളുടെ പ്രശ്നങ്ങളോട് പുച്ഛമാണെന്നും അവര് പറയുന്നതിനോട് വഴങ്ങുന്നവര്ക്ക് മാത്രമേ അവിടെ നിലനില്പ്പുള്ളുവെന്നും രേവതി പറഞ്ഞു. ‘ആദ്യം എക്സ്ക്യുട്ടീവ് കമ്മറ്റി മീറ്റിംഗിന് പോയപ്പോള് ഒരു മാറ്റമുണ്ടാവും എന്ന പ്രതീക്ഷയുണ്ടായിരുന്നു. അതില് ആവശ്യപ്പെട്ട പല കാര്യങ്ങള്ക്കും പിന്നീടുള്ള ഏഴ് മാസത്തോളം ഒരു മറുപടിയുമുണ്ടായില്ല. അമ്മയുടെ പ്രസിഡന്റിന് നിരവധി ഇ-മെയിലുകള് അയച്ചു. പക്ഷേ, ഞങ്ങളോട് ഒരു മറുപടിയും നല്കിയില്ല. മാധ്യമങ്ങളോടാണ് മറുപടി നല്കിയത്. അതോടെ ഞങ്ങള്ക്ക് മനസിലായി ഒരു മാറ്റം ഉണ്ടാക്കുക എന്നത് ഒട്ടും എളുപ്പമുള്ള കാര്യമല്ലെന്ന്’- രേവതി പറഞ്ഞു.
