പത്തനംതിട്ട : സെക്രട്ടേറിയറ്റ് പ്രോട്ടോക്കോള് വിഭാഗത്തിലുണ്ടായ തീപിടിത്തം സംബന്ധിച്ച് ഫോറന്സിക് -കെമിസ്ട്രി വിഭാഗം തയാറാക്കുന്ന റിപ്പോര്ട്ട് തടയാന് ഉന്നതതല നീക്കം. തീപിടിത്തം ഷോര്ട്ട് സര്ക്യൂട്ട് മൂലമല്ലെന്നുള്ള ഫോറന്സിക് റിപ്പോര്ട്ടിന്റെ പേരില് ഒരു ഐ.ജി, ഉദ്യോഗസ്ഥരെ വിളിച്ചുവരുത്തി ഭീഷണിപ്പെടുത്തിയെന്ന പ്രതിപക്ഷ നേതാവിന്റെ ആരോപണം സാധൂകരിക്കുന്നതാണു പുതിയ നീക്കം.
തീപിടിത്തത്തില് സ്ഫോടക വസ്തുക്കളുടെയോ ഇന്ധനത്തിന്റെയോ സ്വാധീനം ഉണ്ടോയെന്നു കണ്ടെത്താനാണു എഫ്.എസ്.എല്. കെമിസ്ട്രി വിഭാഗം രാസപരിശോധന നടത്തുന്നത്. ഈ റിപ്പോര്ട്ട് കോടതിയിലെത്തുന്നതു തടയുക എന്ന ലക്ഷ്യമാണു ഭീഷണിക്കു പിന്നില്. തെളിവു നിയമം 75 അനുസരിച്ച് എഫ്.എസ്.എല്. നല്കുന്ന റിപ്പോര്ട്ട് കോടതി പൂര്ണമായും അംഗീകരിക്കുകയാണ് പതിവ്.
പോലീസ് വകുപ്പിന് കീഴിലാണെങ്കിലും സ്വതന്ത്രമായി പ്രവര്ത്തിക്കുന്ന സ്ഥാപനങ്ങളാണ് ഫോറന്സിക്, ഫിംഗര് പ്രിന്റ് വിഭാഗങ്ങള്. ആഭ്യന്തര വകുപ്പിന്റെ കീഴിലുള്ള ഫോറന്സിക് വിഭാഗത്തെ ജുഡീഷ്യറിയുടെ കീഴിലേക്ക് മാറ്റണമെന്ന ഉദ്യോഗസ്ഥരുടെ ആവശ്യത്തിനു വര്ഷങ്ങളുടെ പഴക്കമുണ്ട്.
കേസ് തെളിയിക്കാന് ആവശ്യമായ ശാസ്ത്രീയ പരിശോധനകള് നടത്തുകയാണ് ഈ വിഭാഗങ്ങളുടെ ജോലി. ശാസ്ത്ര സാങ്കേതിക മേഖലയില് ഉന്നത ബിരുദമുള്ളവരെ പി.എസ്.സി. വഴിയാണ് നിയമിക്കുന്നത്. പല കേസുകളിലും ഫോറന്സിക് വിഭാഗത്തിന്റെ കണ്ടെത്തലുകള് പോലീസിന് തലവേദന സൃഷ്ടിച്ചിരുന്നു.
ജിഷ കേസ് അടക്കമുള്ള സംഭവങ്ങളിലും ശാസ്ത്രീയമായി കണ്ടെത്തിയ പല തെളിവുകളും അവഗണിച്ചാണ് പോലീസ് പ്രതികള്ക്കെതിരേ കുറ്റപത്രം തയാറാക്കിയതെന്ന ആരോപണം ശക്തമാണ്.
ഈ സാഹചര്യത്തില് ഫോറന്സിക് വിഭാഗത്തില് പിടിമുറുക്കാന് എഫ്.എസ്.എല്. തലപ്പത്ത് ഐ.പി.എസ്. ഉദ്യോഗസ്ഥനെ പ്രതിഷ്ഠിക്കാനുളള നീക്കമാണ്.
സജിത്ത് പരമേശ്വരന്
