തിരുവനന്തപുരം: എസ്എസ്എല്സിയ്ക്ക് റാങ്ക് ജേതാവ്, ബിസിനസിലും എഞ്ചിനീയറിംഗിലും ബിരുദം. ടൂറിസം ഡയറക്ടര്, പൊതു വിദ്യാഭ്യാസ ഡയറക്ടര്, സെക്രട്ടറി, മരാമത്ത് സെക്രട്ടറി കൈവെച്ച മേഖലകളിലെല്ലാം മികവ് തെളിയിച്ച ശേഷം ഒടുവില് സ്വര്ണ്ണക്കടത്ത് കേസില് മുഖ്യ ആസൂത്രകന് എന്ന ആരോപണത്തിലേക്ക് വരുമ്പോള് മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം ശിവശങ്കറിന്റെ വീഴ്ചയ്ക്ക് ശക്തി കൂടും.
ഐഎഎസില് 2023 ജനുവരി 31 വരെ സര്വീസ് ബാക്കിയുള്ളപ്പോഴാണ് നയതന്ത്ര ബാഗേജ് വഴി സ്വര്ണ്ണം കടത്തിയ കേസില് കുടുങ്ങി വീഴ്ച സംഭവിച്ചിരിക്കുന്നത്. കെഫോണ് ഉള്പ്പെടെ മുഖ്യമന്ത്രിയുടെ സ്വപ്ന പദ്ധതികള് ഉള്പ്പെടെ നിയന്ത്രിച്ചിരുന്നത് ശിവശങ്കര് ആയിരുന്നു. ഏറെ മികവു തെളിയിച്ച ഉദ്യോഗസ്ഥന് എന്ന നിലയിലാണു മുഖ്യമന്ത്രി സ്ഥാനത്ത് വന്നപ്പോള് പിണറായി വിജയന് സെക്രട്ടറിയായി ശിവശങ്കറിനെ തിരഞ്ഞെടുത്തത്. സ്പ്രിങഌ വിവാദത്തില് ആരോപണ വിധേയന് ആയപ്പോഴും ശിവശങ്കറെ കൈവിടാതെ ചേര്ത്തു നിര്ത്തുകയാണ് മുഖ്യമന്ത്രി ചെയ്തത്.
പല വകുപ്പുകളോടും ആലോചിക്കാതെ പോലും ഫയലുകളില് ഒപ്പിടാന് കഴിയുന്ന തരത്തിലുള്ള മുഖ്യമന്ത്രിയുടെ ഓഫീസിലെ സ്വാധീനം ഉള്പ്പെടെയുള്ള അമിതാധികാരം ശിവശങ്കറിന് നല്കിയത് സര്ക്കാരിന് തന്നെ വിനയായി. ഐടി വകുപ്പിന്റെ സെക്രട്ടറി സ്ഥാനം കൂടി ലഭിച്ചത് ആ തകര്ച്ചയ്ക്ക് ആക്കം കൂട്ടി.
റവന്യു വകുപ്പില് ഡപ്യൂട്ടി കലക്ടറായി ജോലിയില് ഇരിക്കെ 1995 ലാണ് ശിവശങ്കറിന് കണ്ഫേഡ് ഐഎഎസ് ലഭിച്ചത്. ഉദ്യോഗസ്ഥനെന്ന നിലയില് ശ്രദ്ധേയമായ ഭരണ പാടവം കാഴ്ചവെച്ചതോടെയാണ് മുഖ്യമന്ത്രിയുടെ ഓഫീസിലേക്ക് എത്തുന്നതും അമിതാധികാരം കിട്ടുന്നതും. 2000 മാര്ച്ച് ഒന്നിനായിരുന്നു ഐഎഎസില് സ്ഥിരപ്പെട്ടത്. മലപ്പുറം കലക്ടര് എന്ന നിലയില് കാഴ്ചവെച്ച മികച്ച പ്രകടനം ശിവശങ്കറെ ശ്രദ്ധേയനാക്കി.
കൈകാര്യം ചെയ്ത ടൂറിസം ഡയറക്ടര്, പൊതു വിദ്യാഭ്യാസ ഡയറക്ടര്, സെക്രട്ടറി, മരാമത്ത് സെക്രട്ടറി എന്നീ നിലകളില് മികവു കാട്ടി. വിദ്യാഭ്യാസ ഡയറക്ടറും സെക്രട്ടറിയുമായിരിക്കെ, പൊതുവിദ്യാഭ്യാസ മേഖലയില് അനേകം നവീകരണങ്ങള് കൊണ്ടുവന്നു. സംസ്ഥാനത്തെ വൈദ്യൂതിക്ഷാമം പരിഹരിച്ച് എന്നന്നേക്കുമായി പവര്കട്ട് ഒഴിവാക്കി. ദീര്ഘകാല വൈദ്യുതി വാങ്ങല് കരാറുകളില് ഒപ്പുവച്ചു കൊണ്ട് ഇത് സാധ്യമാക്കിയത് വൈദ്യുതി ബോര്ഡ് ചെയര്മാനായിരിക്കെ ആയിരുന്നു. സ്പോര്ട്സ് സെക്രട്ടറിയായിരിക്കെ ദേശീയ ഗെയിംസിന് മികച്ച രീതിയില് സംസ്ഥാനത്ത് നടത്തി.
തിരുവനന്തപുരം സ്വദേശിയായ ശിവശങ്കര് എസ്എസ്എല്സി പരീക്ഷയില് രണ്ടാം റാങ്ക് നേടിയാണ് കരിയറിലെ പടവുകള് ചവുട്ടിത്തുടങ്ങിയത്. പാലക്കാട് എന്എസ്എസ് എന്ജിനീയറിങ് കോളജില് ബിടെക്കിന് പഠിക്കുമ്പോള് കോളജ് യൂണിയന് ചെയര്മാനായി സംഘാടകനായി മികവ് കാട്ടി. ഗുജറാത്തിലെ 'ഇര്മ'യില് റൂറല് മാനേജ്മെന്റില് പിജി ഡിപ്ലോമ ചെയ്യുമ്പോള് മികച്ച വിദ്യാര്ഥിയെന്ന നിലയില് അധ്യാപകരുടെയും സഹപാഠികളുടെയും പ്രശംസ നേടി. പഠന ശേഷം കുറെക്കാലം റിസര്വ് ബാങ്കില് ഓഫിസറായിരുന്ന ശിവശങ്കര് അവിടെ നിന്നുമാണ് ഭരണ നിര്വ്വഹണത്തിലേക്ക് എത്തുന്നത്.
