ന്യൂഡല്ഹി: പുല്വാമ ഭീകരാക്രമണത്തിന് പിന്നില് പാക്കിസ്ഥാനാണെന്ന് പാക് മന്ത്രിയുടെ വെളിപ്പെടുത്തലില് കോണ്ഗ്രസിനെതിരെ കേന്ദ്രമന്ത്രി പ്രകാശ് ജാവദേക്കര്. പുല്വാമ ആക്രമണത്തിന് പിന്നില് ഗൂഢാലോചന നടന്നിട്ടുണ്ടെന്ന മുന് ആരോപണത്തിന്റെ പേരില് കോണ്ഗ്രസ് മാപ്പ് പറയണമെന്ന് ജാവദേക്കര് പറഞ്ഞു. 2019ലെ ലോക്സഭാ തിരഞ്ഞെടുപ്പിന് മുന്നോടിയായി നടന്ന ഭീകരാക്രമണത്തിന് പിന്നില് ഗൂഢാലോചന ആരോപിച്ച് കോണ്ഗ്രസ് രംഗത്ത് വന്നിരുന്നു.
പാക്കിസ്ഥാന് അവരുടെ പങ്ക് സമ്മതിരിച്ചിരിക്കുകയാണ്. ഇനി ഗൂഢാലോചന ആരോപിച്ച കോണ്ഗ്രസ് മാപ്പ് പറയണം- ജാവദേക്കര് ട്വീറ്റ് ചെയ്തു. പുല്വാമ ആക്രമണത്തിലൂടെ നേട്ടമുണ്ടാക്കിയത് ബി.ജെ.പിയാണെന്നും സുരക്ഷാ വീഴ്ചയില് കേന്ദ്രസര്ക്കാര് മറുപടി പറയണമെന്നും പുല്വാമ ആക്രമണത്തിന്െ്റ ഒന്നാം വാര്ഷികമായ ഇക്കഴിഞ്ഞ ഫെബ്രുവരിയിലും രാഹുല് ഗാന്ധി പ്രസ്താവിച്ചിരുന്നു.
പ്രധാനമന്ത്രി നരേന്ദ്ര മോഡിയും പാക്കിസ്ഥാനും തമ്മിലുള്ള ഗൂഢാലോചനയാണ് ആക്രമണത്തിന് പിന്നിലെന്ന് കര്ണാടകയില് നിന്നുള്ള കോണ്ഗ്രസ് ലോക്സഭാംഗം ബി.കെ ഹരിപ്രസാദ് ആരോപിച്ചിരുന്നു. മധ്യപ്രദേശ് മുന് മുഖ്യമന്ത്രിയും കോണ്ഗ്രസ് നേതാവുമായ ദിഗ്വിജയ് സിംഗും സമാനമായ ആരോപണം ഉന്നയിച്ചിരുന്നു.
പുല്വാമ ആക്രമണത്തിന് പിന്നില് പാക്കിസ്ഥാനാണെന്ന് വ്യാഴാഴ്ചയാണ് പാക് മന്ത്രി ഫവാദ് ചൗധരി വെളിപ്പെടുത്തിയത്. അതേസമയം പിന്നീട് അദ്ദേഹം തന്റെ പ്രസ്താവന തിരുത്തിപ്പറഞ്ഞു. തന്റെ പ്രസ്താവന വളച്ചൊടിച്ചുവെന്നും പാക്കിസ്ഥാന് യാതൊരു വിധത്തിലുമുള്ള ഭീകരവാദവും അനുവദിക്കില്ലെന്നും മന്ത്രി പിന്നീട് പറഞ്ഞിരുന്നു.
