വാഷിംഗ്ടണ്: അമേരിക്കയില് പ്രസിഡന്റ് തെരഞ്ഞെടുപ്പ് നിര്ണ്ണായക ഘട്ടത്തിലേക്ക് അടുക്കുമ്പോള് അമേരിക്കന് പ്രസിഡന്റ് തെരഞ്ഞെടുപ്പ് ചരിത്രത്തില് പുതിയ അദ്ധ്യായം എഴുതിച്ചേര്ക്കനൊരുങ്ങി ജോ ബൈഡന്. വിജയിച്ചാല് ചരിത്രത്തില് ഏറ്റവും കുടുതല് വോട്ടു നേടി യുഎസ് പ്രസിഡന്റായി തെരഞ്ഞെടുക്കപ്പെടുന്നയാളായി ബൈഡന് മാറും. ഇതുവരെയുള്ള വോട്ടെണ്ണല് പൂര്ത്തിയായപ്പോള് 72 ദശലക്ഷം വോട്ടുകള്ക്ക് മുകളില് നേടിക്കഴിഞ്ഞ ബൈഡന് ബാരാക് ഒബാമയുടെ റെക്കോഡാകും പിന്നിടുക.
രണ്ടുതവണ അമേരിക്കയുടെ പ്രസിഡന്റ് പദം അലങ്കരിച്ച ഒബാമ 69.4 ദശലക്ഷം വോട്ടുകള് നേടിയാണ് നേരത്തേ റെക്കോഡ് ഇട്ടത്. ആഗോള മഹാമാരിയായി കോവിഡ് പടര്ന്നു പിടിച്ച് അമേരിക്കയില് തെരഞ്ഞെടുപ്പ് പ്രവര്ത്തനങ്ങള് തടസ്സപ്പെടുമെന്ന ആശങ്ക ഉയര്ന്ന സാഹചര്യത്തില് കൂടിയാണ് ബൈഡന് ഇത്രയും വോട്ടുകള് നേടിയത് എന്നത് അസാധാരണമായി. 102 ദശലക്ഷം പേരാണ് വോട്ടു രേഖപ്പെടുത്തിയത്. നവേഡയിലും പെന്സില്വാനിയയിലും ജോര്ജ്ജിയയിലും വോട്ടെണ്ണല് ഇതുവരെ അവസാനിച്ചിട്ടുമില്ല. ഒന്നേകാല് നൂറ്റാണ്ടോളം വരുന്ന ചരിത്രത്തില് ഏറ്റവും കൂടുതല് വോട്ടുകള് നേടി അധികാരത്തിലെത്തുന്ന പ്രസിഡന്റായി ബൈഡന് മാറും.
പരമ്പരാഗത ഡെമോക്രാറ്റുകളുടെ വോട്ടുകള് പെട്ടിയിലിടുവിക്കാന് സാധിച്ചു
ബൈഡന്റെ വോട്ടുഷെയറില് നിര്ണ്ണായകമായത് പരമ്പരാഗത ഡെമോക്രാറ്റുകളുടെ വോട്ടുകള് പെട്ടിയില് വീഴ്ത്താനായതാണ്. ന്യൂനപക്ഷങ്ങള്, കറുത്തവര്ഗ്ഗക്കാര്, ലാറ്റിനോകള്, ഏഷ്യന് അമേരിക്കന് വംശജര്, വിദ്യാസമ്പന്നരായ വെള്ളക്കാര് തുടങ്ങി 2016 ല് ട്രംപിനെതിരേ ഹിലരി ക്ലിന്റണ് വോട്ടു ചെയ്ത ഡെമോക്രാറ്റ് അനുയായികളുടെ എല്ലാം വോട്ടുകള് തനിക്ക് വീഴ്ത്താനായി ബൈഡന് പ്രചരണത്തില് കഠിനാദ്ധ്വാനം തന്നെ നടത്തി. ഹിലരിക്ക് വോട്ട് ചെയ്തപോലെ തന്നെ സ്ത്രീ വോട്ടര്മാരുടെ വോട്ടുകളും കൃത്യമായി തന്നെ തന്റെ പെട്ടിയില് വീഴ്ത്താന് ബൈഡനു കഴിഞ്ഞു.
ട്രംപിനെതിരേ ഉയര്ന്ന ജനവികാരം
അമേരിക്കക്കാരായ 230,000 പേരെ മരണത്തിലേക്ക് തള്ളിവിടുന്ന രീതിയില് കോവിഡ് 19 മഹാമാരിയെ മോശമായി കൈകാര്യം ചെയ്ത രീതി, അത്തരത്തിലുള്ള പെരുമാറ്റം, കള്ളം പ്രചരിപ്പിക്കല് തുടങ്ങി ട്രംപില് ജനങ്ങള് അനഭിമതമായ എല്ലാ കാര്യവും ബൈഡന് ഗുണകരമായി ഭവിച്ചു. ട്രംപ് പ്രസിഡന്റാകുന്നത് തടയാന് വേണ്ടി മാത്രം ദശലക്ഷക്കണക്കിന് ആള്ക്കാര് പോളിംഗ് സ്റ്റേഷനുകളില് എത്തി.
അമേരിക്കയെ സ്പര്ശിച്ച വംശീയ സങ്കലനം
ബ്ളാക്ക് ലൈവ്സ് മാറ്റര് പ്രസ്ഥാനം 2020 തുടങ്ങിയതല്ല. എന്നാല് മെയ് യില് മിന്നപോളീസില് വെള്ളക്കാരന് പോലീസുകാരന്റെ മുട്ടിന് കീഴില് പിടഞ്ഞുമരിച്ച ജോര്ജ്ജ് ഫ്ളോയ്ഡിന്റെ ക്രൂര കൊലപാതകം അമേരിക്കയില് ഉടനീളം ഉണ്ടാക്കിയ ഞെട്ടല് ചെറുതായിരുന്നില്ല. രാജ്യത്ത് വീതിയിലും നീളത്തിലും സംഭവത്തിന്റെ പ്രതിഷേധം എത്തപ്പെട്ടു. 'എനിക്ക് ശ്വാസം മുട്ടുന്നു' എന്ന ഫ്ളോയ്ഡിന്റെ വിലാപം തെരുവുകളില് അനേകരുടെ ശബ്ദമായി മാറി. ഇത് ബൈഡനും ഡെമോക്രാറ്റിക് പാര്ട്ടിയും ശരിക്കും മുതലെടുത്തു. പോലീസിന് കാലികമായ നവീകരണം ആവശ്യമാണെന്നും അത് ഉറപ്പാക്കുമെന്നും തന്റെ പ്രചരണത്തില് ബൈഡന് ഉറപ്പും കൊടുത്തു. എല്ലായ്പ്പോഴും പ്രസിഡന്റ് തെരഞ്ഞെടുപ്പില് നിര്ണ്ണായകമായി മാറാറുള്ള കറുത്തവര്ഗ്ഗക്കാരുടെ വോട്ടുകള് ഡെമോക്രാറ്റുകള്ക്ക് കൂടുതല് ഊര്ജ്ജം നല്കി.
ട്രംപ് വിശ്വാസം അര്പ്പിച്ചിരുന്ന വര്ക്കിംഗ് ക്ലാസ്സിലെ വെള്ളക്കാരായ വോട്ടര്മാരും ചതിച്ചു
2016 ല് ട്രംപില് വിശ്വാസം അര്പ്പിച്ച നിരക്ഷരരായ വെള്ളക്കാര് പഴയത് പോലെ ഇത്തവണ തുണച്ചില്ല. പലയിടത്തും പ്രത്യേകിച്ച് മദ്ധ്യ പടിഞ്ഞാറന് സ്റ്റേറ്റുകളില് ട്രംപിന് പിന്തുണ കൂടാന് ഡെമോക്രാറ്റുകള് അനുവദിച്ചില്ല. മാത്രമല്ല ട്രംപിനെ പിന്തുണച്ചിരുന്ന വെള്ളക്കാരുടെ പിന്തുണ കുറയുകയും ചെയ്തു.
